اسلام امیرلیگی رسمیلری، افغانستان گه سودا توارلری عادی شکلده تشیلماقدهلیگینی معلوم قیلدیلر.
اسلام امیرلیگی سوزلاوچیسی ذبیحالله مجاهد، ۱۲ حوت/۳ مارچ، سهشنبهدن چهارشنبه گه اوتر کیچه، ایکس صحیفهسیده بیر بیانیه ترقهتیب، خواف-هرات تیمیر یولی آرقهلی افغانستان گه سودا توارلری عادی شکلده تشیلماقدهلیگینی یازگن.
بیانیه گه کوره، ۴۲ واگن سمنت و ۲ واگن « امدیاف» تختهلری شامل سودا توارلری یوکلنگن تیمیر یولی هرات ولایتی روزنک بیکتی گه ییتیب کیلگن و کیچه دوامیده آزیق-آوقت و یاقیلغی ماده یوکلنگن باشقه بیر تیمیر یول بو بیکت گه ییتیب کیلیشی کوتیلهدی.
بیانیه اساسیده، قریب ۹۰۰ واگن ایران حدودلریدن افغانستان مقصدی گه حرکت قیلگن و عادی شکلده افغانستان گه ییتیب کیلیشی ممکن.
اسلام امیرلیگی سوزلاوچیسی، سوداگرلردن سببسیز نرخ-نوالرنی کوترمسلیکلرینی سورهگن.
آلدینراق، ایران ییتکرمهلری امریکا واسرائیلنینگ بو مملکت گه هجوم قیلگنی و اوروش دوام ایتهیاتگنی سببلی، بو مملکت آزیق-آوقت محصولاتلری صادراتینی توختهتگنینی ایتگن ایدیلر.
