فرزندلر آرهسیده عدالتسیزلیک حسی، آنهلیک مسئولیتینی بجره آلمهگنلیک تویغوسی و اوزینی قدرسیز حس ایتیش، چقهلاقلرینی ایمیزه آلمهگن بیر قطار آنهلر اوچون قوشمه تجربه دیر؛ بو قیغو حتا ییللر اوتسهده اولرنی ترک قیلمهگن. روانشناسلرنینگ ایتیشلریچه، ایمیزه آلمسلیک طفیلی تشویش آنهلرنینگ روحی سلامتلیگینی تهدید قیلیشی ممکن. قدرسیزلیک حسی، وجدان عذابی، تنقید و سوز قیلینیشدن قورقیش، تشویش و افسردهلیک، مذکور قیغونینگ کورمسلیکدن کیلیش عاقبتلریدن دیر.
روانشناسلردن بیری سیدعصمت هاشمینینگ سلاموطندار گه ایتیشیچه، ایمیزیش آنهلر اوچون حساس بیر دوره بولیب و آنه هر قندهی سبب بیلن چقهلاغینی ایمیزه آلمهگنی صورتده، روحی بحران باسقیچیگه کیریب و اونینگ بیر قسمی صفتیده اضطراب حسی نمایان بولهدی. «بیر آنه چقهلاغینی ایمیزه آلمسه، اونده کوپینچه قیینچیلیکلر تاپیلیب و توغیشدن کیینگی قیینچیلیکلرگه زمینه یرهتیشی ممکن. اضطراب کبی روحی قیینچیلیکلر اورته گه کیلهدی. بو توغریده عایلهلر مهم رول اوینه آلهدی. آنهلر بو قیینچیلیکلر بیلن روپهره بولگنیده، حمایت قیلسینلر، تورموش اورتاقلری یانیده توختهسینلر، یخشی شکلده صحبت قیلسینلر، اولر بیلن یخشی شکلده یاندشسینلر و آنهلرگه آراملیک بیر محیطنی یرهتسینلر.»
شونینگدیک روانشناسلردن باشقه بیری شرفالدین عظیمی، عایله اینیقسه تورموش اورتاقنینگ قوللب-قوتلشیگه تاکید قیلیب و ایتیشیچه، آنهلر بو دورهده عاطفی حمایتگه کوپراق نیازی بار. «چقهلاغینی ایمیزه آلمهگن آنهلر اوزلرینی ییترلی بولمهگن توشینهدیلر. وجدان عذابی چیکهدیلر. اولردن قطاریگه توغیشدن کیین افسردهلیک و اضطراب تاپیلهدی. عایلهلر عاطفی حمایت قیلیش بیلن مذکور عیاللرگه یاردم بیره آلهدیلر.»
نسایی-ولادی متخصصی زرغونه محبتنینگ سلاموطندار گه ایتیشیچه، چقهلاققه ایمیزیش اونینگ ساغلام آوقتلنیشیگه سبب بولهدی؛ لیکن آنهلرده ایمیزیش چاغیده درست آوقتلنمسلیک، جسمی قیینچیلیکلر و وسواسلر کبی بیر قطار موردده، اولر چقهلاقلرینی ایمیزه آلمهیدیلر. بو توغریده اونینگ کوپهیتیریشیچه: «آنهلرده سوت قوریشیگه سبب بولهدیگن عامللر ایسه، آنهلرنینگ ییترلی معلومات ایگه بولمسلیگی، عصبی قیینچیلیکلر، ییترلی آوقتلنمسلیک و اجتماعی عامللر که عیاللردن قطاریگه کوره، ایمیزیش تنهلری چیرایلیگی بوزیلیشیگه سبب بولهدی. بو نرسهلر استه-سیکین آنهلرده سوتنینگ قوریشیگه سبب بولهدی.»
باشقه بیرتاماندن، دین عالملردن شفیعالله احمدینینگ ایتیشیچه، اسلامده چقهلاقلر آوقتلنیشیگه اعتبار قرهتیلیش توغریسیده تاکید بولگن؛ لیکن آنهلر ایمیزیشگه قادر بولمهگنی صورتده، اولرنی قارهلمهیدی. «آنهده سوتی بولمهگنی یا-ده چقهلاق آنه کوکرهگینی آلمهگنیده، آنهگه هیچ قندهی گناه کیلمهیدی. تینگری تعالا شوندهی بویورهدی: -هیچ کیمنی اونینگ قوتی و قابلیتیدن آرتیق وظیفهگه مجبور قیلمهگن-. لیکن آنه خبرسیزلیک یا-ده اعتبارسیزلیک سبب چقهلاقنی ایمیزمسه و بو، بالهنینگ ضرر کوریشیگه سبب بولگنی صورتده، او پیت آنه گناهکار حسابلنهدی. چونکه باله تربیهسی و آزیقلنیشی اینیقسه بیرینچی آیلرده جوده مهم دیر.»
شوندهی بیرحالده، چقهلاقلرینی ایمیزه آلمهگن آنهلردن قطارینینگ ایتیشیچه، ایمیزه آلمسلیک طفیلی قیغو، اولرده گناه، ناراحتلیک و وجدان عذابی تویغوسیگه سبب بولگن. ۵ باله آنهسی بولمیش رویدا حمیدینینگ ایتیشیچه: «قیزلریم دنیا گه کیلگنیده، کوپ سوتیم بار ایدی و راحت ایدیم، لیکن اوغیللریم دنیا گه کیلگنیده، سوتیم بولمهیدی و بو وضعیت مینی اوچون کوپ قیین ایدی. دایم اوزیمنی عادل بولمهگن بیر آنه دیب توشینهمن، چونکه قیزلریم سوتیمدن فایدهلندی و اوغیللریمنی ایمیزه آلمهدی. اوغیللریم برابریده بو بیر تشویش کبی بولگن مینگه و اونوته آلمهیمن.»
شونینگدیک ۲ باله آنهسی بولمیش نجیلانینگ ایتیشیچه، بالهلریگه سوت بیره آلمسلیک سبب، دایم بالهلری برابریده خواطر و عدالتسیزلیک حسی بیلن روپهره بولگن. «قیزیم اوچ آیلیک بولگن و اونگه قوروق سوت بیرهمن. روحی تشویش بیلن روپهره بولگنمین. بو وضعیت مینگه قیین و اوزیمگه باشقه باله دنیا گه کیلتیرمهیمن دیهمن چونکه آنه سوتی بولمسدن اینیسقه ییغلهگنی بیرحالده، بیر چقهلاقنی کته قیلیش کوپ قیین دیر.»
شونینگدیک قندوز ولایتی یشاوچیلری بولمیش ۲ فرزند آنهسی نگاره و ۱ فرزند آنهسی کوثرنینگ ایتیشلریچه، چقهلاقلرینی ایمیزه آلمسلیک اولر اوچون حیاتنینگ اینگ آغیر تجربهسی بولگن. اولرنینگ اورغولشیچه، بو قیینچیلیک یالغیز فزیکی بیر مسئله ایمس، بلکیم جدی روحی بیر قیینچیلیک دیر.
بو توغریده نگارهنینگ ایتیشیچه، اوزینی ییترلی بیلمسلیک، باشقهلرنینگ قرهشلریدن قورقیش و چقهلاقنینگ ضرر کوریشیدن خواطرلنتیش سبب، زمان اوتیشی بیلن اضطراب، اویقوسیزلیک و حتا افسردهلیککه روپهره بولگن. «ایکی بالهمده هم سوتی یوق ایدی و قوروق سوت بیلن اولرنی کته قیلدم. تورموش اورتاغیم، قین آتهم و قین آنهم دایم نیگه سوتینگ یوق و قچانگچه قوروق سوت ساتیب آلهیلیک دیب منت قیلهر ایدیلر. هر کیم هر نرسه دیهر ایدی. بالهلریم برابریده اوزیم نی کم حس قیلهمن. اهالی سوزی و عایلهمنینگ یاندهشووی هم مینگه تاثیر قیلگن. قورقهمن که ینه بالهم بولسه و اوی همده تشقریده قیینچیلیک بیلن روپهره بولسم.»
شونینگدیک بو توغریده کوثرنینگ ایتیشیچه: «چقهلاغیم دنیا گه کیلگنیده، کوکرهگیمنی آلمس ایدی و انه شوو سبب قوروق سوت بیلن کته قیلدم و دایم شونی توشینهر ایدیم که نیگه بالهم مینی سوتیمنی آلمهدی دیب. تشویش قیلیش اوچون روحی قیینچیلیک تاپیدم. حاضر بیراز یخشی بولگنمین، لیکن یادمدن چیقمهیدی. سینهم گه سوت ییغیلگنی اوچون حتا عملیات بولدم. چقهلاغیمنی ایمیزه آلمهگنیم اوچون کوپ قیینچیلیکلرنی کوردیم.»
ایمیزه آلمسلیک طفیلی قیغو، آنهلر آرهسیدهگی کینگ ترقهلگن بیر حالت بولیب و بو هورمونی تغییرلر، چقور عاطفی بیر تجربهدن اجرهلیش و گناه تویغوسی طفیلی اورته گه کیله آلهدی. روانشناسلرنینگ ایتیشلریچه، بو قیغو مدیریتی اوچون آنهلر جسمی و عاطفی سلامتلیگیگه اعتبار قرهتیب، ییترلی شکلده اوخلهب و ساغلام آوقتلنیشی همده تورموش اورتاق، عایله یا-ده دوستلری بیلن صحبت قیلیشلری کیرهک.
