مملکت شمالیده ۱۲-عقرب، دوشنبه کونی یوز بیرگن زلزله، جانی تلفات و مالی زیانلرگه علاوه، سمنگان ولایتیده معارف بولیمیگه هم کوپینچه زیان ییتیشتیریب، اونلب مکتب و دینی مدرسهنینگ بوتونلی و قسمی شکلده ویران قیلگن.
سمنگان ولایتی خُلم تومنینینگ «صیاد» قیشلاغیدهگی اوقووچیلریدن قطارینینگ ایتیشلریچه، زلزله یوز بیرمهگنیدن آلدین بیر دنیا قیزیقیش و امید بیلن مکتب تامان بارهر ایکنلر؛ بیراق حاضر ایسه درس گه اونچهلیک قیزیقمهیدیلر.
اوشبو اوقووچیلردن مروهنینگ ایتیشیچه، یوز بیرگن زلزلهده مکتبلری بناسی جدی شکلده بوزیلیب و هر کونی قورقوو و خواطر بیلن مکتب تامان حرکت قیلهدیلر. «مکتبیمیز زلزلهده بوزیلدی و اولتیریش امکانیت یوق. قورقوو و خواطر بیلن مکتب بارهمیز. درست درس اوقه آلمهیمیز. معارف وزیرلیگیدن مکتبیمیزنینگ تیزلیککه قیته قوریشلرینی ایستهیمیز که خوش و آرام درس اوقهیلیک.»
شونینگدیک آلتینچی صنف اوقووچیسی بولمیش رابعهنینگ بو توغریده ایتیشیچه: «زلزلهده مکتبیمیز بوزیلدی. تیزلیک بیلن قیته قوریلیشی کیرهک، چونکه هر کونی قورقوو بیلن مکتب کیلهمیز و هر دقیقه مکتب چپه بولهدی دیب توشینهمیز. بو رقم درس اوقوش کوپ قیین دیر.»
باشقه بیر تاماندن، مذکور تومندهگی دولتی مکتبلردن بیرینینگ مدیرهسی سلما نوزادهنینگ سلاموطندار گه ایتیشیچه، مهندسلر صنفلرنینگ جدی شکلده چپه بولیش تهدید بیلن روپهره بولگنی اوچون هیچ کیمنینگ مکتب بنالریگه بارمسلیگینی ایتگن؛ بیراق مناسب جای یوقلیگی سبب، اوقووچیلرگه بوزیلگن صنفلرده درس بیریشگه مجبورلر. «مهندسلر، اوشبو مکتب بنالریگه هیچ کیمنینگ بارمسلیگینی ایتگن، چونکه جدی تهدید دیر. جای یوقلیگی قیینچیلیگی سبب، اوقووچیلرگه بو ییرده درس بیریب و امتحانلرینی آلیشگه مجبورمیز.»
شونینگدیک سمنگان ولایتی خُلم تومنی معارف مسئوللری، بو تومندهگی زیان کورگن دولتی مکتبلردن قطارینینگ وضعیتینی خواطرلنتیرووچی دیب، حکومت و یاردم بیرووچی نهادلر آرقهلی بو مکتبنینگ قیته قوریلیشینی ایستهگنلر.
سمنگان ولایتی خُلم تومنی معارف آمری صبغتالله عکرمهنینگ ایتیشیچه، زیان ییتیشگن مکتبلرنینگ ترمیملنیش امکانیتی یوق و اولر ستندرد شکلده ینگیدن قوریلیشی کیرهک. «مکتبلریمیز بنالرینینگ ترمیملنیش امکانیتی یوق که پول ییغیب بوزیلگن بولیملرینی توزهتسهک. بو بنالرنینگ ستندرد شکلده قوریلیشی کیرهک. مکتبلر بنالرینینگ زلزله برابریده چیدهملی بولیشی کیرهک.»
بولرگه علاوه، سمنگان معارف ریاستیده مسئوللر، دولتی مکتبلر و دینی مدرسهلر قیینچیلیگی حلی اوچون سعیوحرکت بولیشینی بیان قیلیب و یوز بیرگن مذکور زلزله نتیجهسیده، ۹۰ دن آرتیق مکتب و دینی مدرسهنینگ زیان کورگنینی تصدیقلهگن.
سمنگان معارف باشلیغی محرابالدین اقبالنینگ ایتیشیچه: «سونگی زلزلهده ۹۳ ته مکتب و دینی مدرسه بوزیلگن. بو آرهده ۱۳ مکتبنینگ بناسی بوتونلی بوزیلگن که اونینگ قوریلیشی کیرهک و باشقه ۸۰ تهسی قسمی شکلده بوزیلگن که ترمیم بولیشگه نیازی بار.»
۱۲-عقرب، دوشنبه کونی ایرتهلب، افغانستان شمالیده ۶.۳ درجه ریشترلیک زلزله یوز بیرگن که نتیجهده، ۲۷ کیشی اولیب و ۱۰۰۰ دن آرتیق کیشی یرهلنگن همده قریب ۲ منیگ یشش اوی بوزیلگن.
