کانلر و پترولیم وزیرلیگی، بدخشاننینگ آلتین کانلریده ۱۰۰ مینگدن آرتیق کیشی مستقیم و نامستقیم طرزده ایشلهماقدهلیگینی بیلدیردی.
اوشبو وزیرلیک، ۲۶ دلو/۱۵ فبروری، یکشنبه کونی ایکس صحیفهسیده بیر بیانیه ترقهتیب، بو کیشیلر بدخشاننینگ شهربزرگ، یاوان، کوهستان، راغستان، خواهان و ارغنجخواه تومنلریده، آلتین کانلرینی قزیب چیقریش و اونگه باغلیق تخنیکی ایشلر بیلن ایشلماقدهلیگینی معلوم قیلگن.
بیانیه گه کوره، بدخشانده آلتین کانلرنی قزیب چیقروچی کمپنیهلر ۲۲۳ میلیون افغانی عوضیگه ۱۷ ترقیاتی لایحهنی اجتماعی خذمتلر بولیمیده باشلهگن. اوشبو لایحهلر کوکچه دریا اوستیده بیش کوپریک قوریش، سرکلرنی قیته قوریش، سوو ییتکزیش ترماقلرنی قوریش و باشقه آست قورمه لایحهلرنی عملگه آشیریشنی اوز ایچیگه آلهدی.
کانلر و پترولیم وزیرلیگی، بدخشانده آلتین کانلرینی قزیب چیقریش نهفقط حدود یشاوچیلری اوچون ایش فرصتی بلکیم، منطقه اقتصادی یخشیلنیشیگه ایجابی تأثیر قوییشینی ایتهدی.
بدخشان افغانستاننینگ کان منبعلریگه بای ولایتلریدن حسابلنهدی، اونینگ بعضی تومنلریده آلتین کانلری اوتمیشدن بیری حدود یشاوچیلرینینینگ دقتینی تارتگن. بو ولایتده زرشویلیک کوپراق عنعنهوی شکلده و کوکچه دریا سوویدن قوللنیب عملگه آشیریلهدی؛ بیراق سونگی ییللرده قراردادی کمپنیهلر گه تاپشیریلیشی بیلن، ترتیبلی و تخنیکی شکلده آلتین کانلری قزیب چیقریلماقده.
