سرپرست حکومت صناعت و سودا وزیرلیگی، افغانستان اوشبو قویاش ییل نینگ دستلبکی بیش آی ده مملکت‌لر بیلن تورت میلیارد ۶۰۰ میلیون دالرلیک سودا آلیش-بیریش قیلگنینی معلوم قیله‌دی. اوشبو وزیرلیک نینگ کوپه‌یتیریشیچه، افغانستان تورت میلیارد ۹۱ میلیون دالرلیک توار وارد و ۵۰۶ میلیون دالرلیک توار صادر قیلگن.
سرپرست حکومت صناعت و سودا وزیرلیگی نینگ معلوماتی اساسیده، افغانستان نینگ قویاش اوشبو ییل دستلبکی بیش آی ده صادرات رقمی بیر ییل آلدینیگه نسبتن ۱۰ فایز کمه‌یگن.
صناعت و سودا وزیرلیگی سۉزلاوچیسی آخوندزاده عبدالسلام جواد سلام‌وطندار بیلن اۉتکزگن صحبتیده، پاکستان نینگ افغانستان بیلن سودا شرطنامه‌لری گه عمل قیلمسلیگینی صادرات رقمی کمه‌یش عاملی عنوان قیلگن.
بیزلرنینگ فیسبوک صحیفه‌میزگه باش اورینگ!
اونینگ کوپه‌یتیریشیچه: «۱۴۰۲-ییل نینگ دستلبکی بیش آی ده مملکت صادراتی قریب ۵۶۸ میلیون دالر و واردات رقمی قریب اوچ میلیارد ۲۱۱ میلیون دالر بولگن اۉتگن بیر ییلی گه نسبتن ۱۰ فایز کمه‌یگنیدن درک بیره‌دی. مملکت صادرات رقمی کمه‌یش دلیلی پاکستان نینگ افغانستان بیلن سودا شرطنامه‌لری گه عمل قیلمسلیگی دیر.»
صناعت و سودا وزیرلیگی نینگ معلوماتی اساسیده، قویاش اوشبو ییل نینگ دستلبکی بیش آی ده افغانستان کوپراق پاکستان، هندوستان، بیرلشگن عرب امیرلیگی، قزاقستان، اۉزبېکستان، ایران، تورکیه، چین، عراق، قرغیزستان، امریکا قۉشمه ایالتلری، سعودی عربستان، اسپانیا، هالند، روسیه، جرمنی، بلژیک، انگلستان و کانادا گه توار صادر قیلگن.
افغانستان اوشبو ییلده کوپراق پخته، هنگ و هنگ اوروغی، تاش کومیر، مه‌ییز، الکول‌سیز ایچیملیک، زعفران، قیمت‌بها تاشلر، میوه‌لی شربت، بادام مغزی، پیاز باشقه طبی اوسیملیک‌لر، قاره زیره و قوروق انجیر صادر قیلگن.
بیزلرنینگ «ایکس» ترماغی ده هم تعقیب قیلینگ!
افغانستان و پاکستان سودا و صناعت قۉشمه اتاق مسئوللری، افغانستان نینگ پاکستان بیلن سودا جریانی سیاسی و امنیتی قیینچیلیک بیلن دوچ بولگن و بو معما پاکستان بیلن سودا کېله‌جگینی ییلمه-ییل قیینچیلیک بیلن روپه‌ره قیلماقده.
افغانستان و پاکستان سودا و صناعت قۉشمه اتاق باشلیغی نقیب‌الله صافی نینگ سلام‌وطندار گه ایتیشیچه: «سیاسی، حربی و پاکستان نینگ ایچکی قیینچیلیک‌لری انده-سنده یول توسیلیشی گه سبب بوله‌دی و بو معما ایکّی تامانلمه سودا اوستیگه سلبی تأثیر قوییشی ممکن؛ مثال اوچون میلادی ۲۰۱۴-ییلده پاکستان بیلن قریب اوچ میلیارد دالرلیک توار آلیش-بیریشیمیز بار اېدی و بو رقم ییلمه-ییل کمه‌یب بارماقده.»
افغانستان نینگ صادرات جریانیده پاکستان تامانیدن قیینچیلیک یره‌تیلیشی بیلن بیرگه، ۲۰ کوندن بېری افغانستان نینگ صادرات محصولات‌لرینی یوکله‌گن کامیون‌لر پاکستانده قومی قرمه قرشی‌لیک‌لر باعث بو مملکتده توخته‌تیلگن.
افغانستان و پاکستان سودا و صناعت قۉشمه اتاق باشلیغی نینگ کوپه‌یتیریشیچه: «بو قیینچیلیک‌لر حل اېتیلیشینی اېسته‌یمیز؛ مثال اوچون پاکستانده حاضر قومی قرمه قرشی‌لیک‌لر یول توسیلیشی گه سبب بولگن بو مسئله نظرگه آلینیشی درکار. بو پاکستان نینگ عادی یولی اېمس که توسیلگن بولسه؛ بلکه ایکّی مملکت نینگ سودا یولی توسیلگن.»
اقتصادی ایش بیلرمان‌لر، کېله‌جکده افغانستان نینگ صادرات رقمی کمه‌یشینی جبران قیلیش اوچون، ایچکریده تولیدلرنی کوچلنتیریش، توارلرنی صادر قیلیش اوچون بدیل یول قیدیریش و پاکستان یولیده‌گی قیینچیلیک‌لر حل اېتیلیشینی تکلیف قیله‌دیلر.
اقتصادی ایش بیلرمان عبدالنصیر رشتیا گه کوره: «بیرینچیدن مملکت ایچیده‌گی ایشلر اوستون قرار بیریلیشی درکار؛ کیېن اېسه بدیل یول قیدیریلیشی لازم. صادرات اوچون هېچ نرسه بولمسه یول کېره‌ک اېمس.»
افغانستان حاضرگی کونده سوداگرلیک توارلرینی کوپراق پاکستان یولی آرقه‌لی صادر قیلماقده و بدیل یوللردن قوللنیش اوچون سعی-حرکت‌لر حاضرگه قدر ایجابی نتیجه بیرمه‌گن.
