اسلام امیرلیگی مدافع وزیرلیگی بیر بیانیه آرقهلی اعلام قیلیشیچه، اوشبو وزیرلیک هوا کوچلری پنجشنبه کیچه، ۲۸-جوزا/۱۸-جون، پاکستاننینگ خیبرپشتونخواه و بلوچستان ایالتلریده داعشگه تیگیشلی مرکزلرنی کوچلی هجوملر بیلن نشانگه آلگن.
مذکور وزیرلیککه کوره، اوشبو مرکزلر اَیریم استخباراتی دایرهلر بیلن همکارلیکده افغانستان حدودیگه قرشی هجوملرنی ریجهلشتیریش و اویوشتیریش اوچون فایدهلنیب و شونینگدیک اوتمیشده هم اولردن نیچه قانلی هجوم ریجهلشتیریلیب و عملگه آشیریلگن.
بیانیهده کیلیشیچه: «اوشبو هجوملر بلوچستان ایالتی چاغی تومنیگه تیگیشلی شکرآب جنگل گردی منطقهسیده و قلعهی عبدالله تومنیگه تیگیشلی گلستان منطقهسیده عملگه آشیریلیب و نتیجهده، داعشلر و فتنهچی عنصرلرنینگ قوشمه مرکزلرینی نشانگه آلیندی.»
شونینگدیک مدافعه وزیرلیگینینگ ایتیشیچه: «خیبرپشتونخواه ده اورکزی ایجنسی گه تیگیشلی قمبرخیل منطقهسیده، داعشنینگ خراسان بولیمیگه باغلیق بولگن بیر مرکز نشانگه آلینگن که اونگه بو گروهنینگ اَیریم اساسی رهبرلری هم باریب-کیلهر ایکن.»
مذکور وزیرلیکنینگ کوپهیتیریشیچه، دستلبکی معلوماتلر اساسیده اوشبو عملیات نتیجهسیده آلدیندن تعیینلنگن و مهم نشانلر موفقیتلی بیلن نشانگه آلینگن. مدافعه وزیرلیگیگه کوره، افغانستان بوندن بویان امنیت و برقرارلیگیگه قرشی هیچ قندهی تهدیدنی چیدهمهیدی.
