کابلده جنایت‌لر کوپه‌یگنیدن سونگ، جمهورلیک ریاستی نینگ بیرینچی اورین باسری امرالله صالح، جمهور رئیس بویروغی آرقه‌لی، کابل امنیتی‌نی تامین‌لش خصوصیده، مسوولیت آلگنی‌نی بیلدیرگن.
بیراق، حربی ایش بیلرمانلر جمهورلیک ریاستی نینگ اوشبو قرارینی تبلیغاتی، ناتوغری و امنیتی نهادلرنی کوچ‌سیز قیله‌دیگن عمل عنوان قیلگنلر.
حربی ایش بیلرمانلردن بیری جاوید کوهستانی نینگ ایتیشیچه، اوشبو قرار کابل امنیتی وضعیتی‌نی یخشی‌لنتیریش اوچون ایمس، بلکیم رسانه‌یی تبلیغات دیر.
شونینگدیک، حربی ایش بیلرمانلردن باشقه بیری اسدالله ندیم نینگ سلام‌وطندارگه ایتیشیچه، جمهور رئیس نینگ اوشبو بویروغی امنیتی نهادلر ایشیگه دخالت قیلیش دیر و جناب غنی نینگ بو اقدامی ارگ نینگ امنیتی نهادلر برابریده‌گی ایشانچ‌سیزلیگی‌نی کورسته‌دی.
جناب ندیم گه کوره، جناب صالح مسوولیتی‌نی آلیش بیلن کابلده جنایت رقمی کمه‌یگن حالده، صالح جنابلری جنایتچی شبکه‌لر صاحبی بولگنی‌نی کورسته‌دی و اوشبو شبکه‌لردن سیاسی ابزار صفتیده استفاده قیله‌دی.
باشکنت یشاوچیلری، کابل نینگ امنیتی مسوولیتی صالح جنابلریگه تاپشیریلگنی خصوصیده فرقلی فکر بیلدیره‌دیلر.
کابل یشاوچیلری نینگ ایتیشیچه، حکومت توغری پروسه‌نی قولگه آلمه‌گن حالده، اوشبو قرارلر خلق نینگ قیین‌چیلیگی‌نی حل قیلمه‌یدی.
لیکن، باشقه بیر قطار یشاوچی‌لر، جمهور رئیس نینگ اوشبو قراریدن حمایت بیلدیرگنلر.
