قندوز یشاوچیلریدن قطارینینگ ایتیشلریچه، دولتی ساغلیقنی سقلش مرکزلریده ضرور دارولرنینگ کوپینچهسی موجود بولمهی، بار دارولر ایسه طلب ایتیلگن صفتگه ایگه ایمس. اولرگه کوره، کمبغللیک و خصوصی داروخانهلرده دارولر قیمتی یوقاریلیگی سبب، کسللر نیازلری بولگن دارولرنی تامین قیله آلمهیدیلر.
قندوز ولایتی قلعهیزال تومنی یشاوچیلریدن احمدولینینگ ایتیشیچه، اوشبو تومن یشاوچیلری جدی ساغلیق قیینچیلیکلر بیلن روپهره بولیب و بو منطقهدهگی دولتی ساغلیقنی سقلش مرکزلریده صفتلی دارولر یوق دیر.
اونینگ کوپهیتیریشیچه، عایلهلردن کوپ قطاری خصوصی داروخانهلردن دارو ساتیب آلیش امکانیتیگه ایگه ایمس. «بو ییردهگی بار دارولر صفتسیز دیر و آلهدیگنیمیز دارولرنینگ هم کسللر اوچون هیچ فایدهسی یوق. کوپینچه یول یوریب و ولایت مرکزیدن دارو آلیشگه مجبورمیز. شونینگدیک اهالینینگ اونچهلیک اقتصادی وضعیتی هم یخشی ایمس. بو رقم بیر شرایطده، دولتدن قلعهیزال همده قندوز تومنینینگ باشقه کلینیکلریگه کوپراق توجه قرهتیلیشینی سورهیمیز.»
شونینگدیک قندوز ولایتی گلتیپه تومنی یشاوچیسی بولمیش مشهود، دارو یوقلیگی و قیمتلر یوقاریلیگیدن شکایت قیلهدی. اونینگ ایتیشیچه، تومن کلینیگیده صفتلی دارو تاپیلمهی و خصوصی داروخانهلرگه باریشگه مجبور دیر، بیراق اولرنینگ ساتیب آلیش امکانیتیگه ایگه ایمس. «بو ییرده صفتلی دارولر یوق. مرکز گه باره آلمهیمیز، چونکه یوللر بوزیق و ییترلیچه پولیمیز هم یوق. شخصی داروخانهلرده صفتلی دارو بولگنی صورتده، یوقاری قیمت بیلن ساتیلهدی و اولرنینگ ساتیب آلالمهیمیز.»
شوندهی بیرحالده، قندوز ولایتی آقتاش تومنی یشاوچیلریدن سیاوشنینگ ایتیشیچه، حتا ساده کسللیکلر اوچون هم بو تومن کلینیکلریده دارو تاپیلمهی و دارو ساتیب آلیش مقصد ولایت مرکزیگه باریشگه مجبورلر.
او، مسئول نهادلردن اوشبو قیینچیلیک حلی اوچون اقدام قیلیب و اهالینینگ صفتلی ساغلیقنی سقلش خذمتلریدن فایدهلنه آلیش امکانیتی یرهتیلیشینی ایستهگن. «شخصی داروخانهلرده یا صفتسیز دارو بار یا-ده صفتلی دارو بولگنیده هم قیمتی یوقاری دیر. ساده بیر کسللیک اوچون تومندن قندوز مرکزیگچه باریشگه مجبور بولهمیز.»
قندوز ساغلیقنی سقلش ریاستی مسئوللرینینگ ایتیشلریچه، تیزلیککه مذکور ولایت تومنلریدهگی دولتی کلینیکلرگه نیاز بولگن و صفتلی دارولر ترقهتیلیشی ممکن.
قندوز ساغلیقنی سقلش ریاستی سوزلاوچیسی ولید رحیمینینگ ایتیشیچه: «یالغیز بیر قلم دارونینگ افغانستان بویلب کملیگی حس بولهدی و اونینگ وارد بولیشی یونیسف گه تیگیشلی دیر. ساغلیقنی سقلش وزیرلیگی بو توغریده جلسه آلگن. اینگ یقینده بو دارو هم افغانستان گه کیلتیریلهدی و برچه کلینیکلرچه ترقهتیلهدی.»
افغانستان، دارو بولیمیده حاضرگچه واردات گه تیگیشلی بولیب و اوتگن ییللرده بو مملکت بازارینینگ نیازلریدن بویوک قسمی پاکستان دن تامینلنهردی. حاضر مذکور مملکتدن دارو وارد بولیشی چیکلنگنی بیلن، افغانستان بازارلریده دارولردن بیر قطارینینگ کملیگی کوزهتیلماقده.
