رنگ بیلن تیل هیدی و صناعت اورگنووچی قیزلرنینگ گپلشیش و بیرگهلیکده ایشلهشیش سیسی کیچیک نقاشلیک ایشخانه فضاسینی تولدیرگن.
کابلنینگ پلسرخ منطقهسیده جایلشگن مستطیل شکلده بولگن بیر اتاقنینگ دیوارلری رنگ-برنگ تابلولر بیلن توله دیر. مذکور اتاقده بیر قطار قیزلر پنسللر و نقاشلیک برسلری بیلن نقاشلیک قیلماقدهلر.
میزلر یانیدن بیر قیز آهسته آهسته قدم اوریب و صناعت اورگنووچیلردن قطاریگه بعضی نرسهلرنی اورگتماقده. بو ییرگه قریب ۲۰ ته قیز ییغیلیب و نقاشلیک و رساملیک اورگهنیش بیلن شغللنگنلر.
کابل یشاوچیسی بولمیش ۲۱ یاشر ماهگل، اوچ ییل آلدین «مانالیزا» صناعتی ایشخانهسینی آچگن. اوشبو کیچیک صناعتی اتاق حاضر خاتین-قیزلرنینگ صناعت اورگنیشی اوچون بیر جایگه اوزگرگن.
اونینگ ایتیشیچه، بالهلیک چاغیدن رنگلر و نقاشلیککه قیزیقیب و ۶-صنف اوقووچیسی بولگنیده بو صناعتنی اورگهنیش گه باشلهگن؛ بیراق بیر کون اوشبو بولیمده ایشلب و باشقهلر گه صناعت اورگهتیشینی توشینمهس ایکن.
بیزلرنینگ «ایکس» ترماغی ده هم تعقیب قیلینگ!
ماهگلنینگ ایتیشیچه، سیاسی توزوم اوزگرگنیدن کیین کانکور سیناوینی اوتکزگن؛ لیکن قیزلر یوزیگه بیلیم یورتلر ایشیگی یاپیلگنیدن کیین، تحصیلدن محروم قالگن.
بیلیم یورتلر ایشیگی یاپیلگنی بیلن، ماهگل اتاقینینگ بیر چیکهسیده اولتیرمهی، رنگ و نقاشلیک تختهسینی آلیب، ینگی بیر یولگه آدیم باسگن که بو آدیم بوگون قیزلردن کوپ قطارینی بیر ییرگه ییغگن. «سیناونی اوتکزگنیمدن کیین، ایرتهسی کون ثبتنام قیلیش کونی ایدی که قیزلر یوزیگه بیلیم یورتلر ایشیگی یاپیلدی. اوندن کیین نیچه آی اویده ایدیم؛ بیراق توشیندیم که بو رقم اویده قالیش حل یول ایمس و باریب بیر چاره-تدبیر کوریش کیرهک.»
ماهگل قولیگه توکیلگن رنگلرنی بیر رومالچه بیلن سیریب و ایتیشیچه، مذکور نقاشلیک ایشخانهسی بیلن جمعیتده اوزی و عیاللر حضورینی سقلش خصوصیده سعیوحرکت قیلماقده. اونگه کوره، بو ییر تشقی تاماندن بیر نقاشلیک ایشخانهسیگه اوخشهیدی؛ لیکن بو ییر اورگهنیش اوچون سعیوحرکت قیلهیاتگن قیزلر اوچون امید نوری دیر.
ماهگل بو ایشخانهنی ۱۷ مینگ افغانی بیلن آچگن. او حاضر هر کونی ایرتنگدن آخشمگچه رنگلر و تابلو آرهسیده قیزلر و اوغیل بالهلر گه صفردن یوزگچه نقاشلیک نی اورگتهدی. «اوز ایاغیمده توختهش ایستهدیم. ۹ آی ایشلهدیم و ۱۷ مینگ افغانیم بار ایدی، اوشه پول بیلن ایشخانهم نی آچدیم. باشده کوپ کیچیک بیر جای ایدی و آیده ۶ مینگ افغانی کرایه بیرهر ایدیم. شو رقم بو ایشخانه گه میز و چوکی ساتیب آلدیم. کیین صناعت اورگنووچیلر کیلدیلر و سفارشلریمیز هم بار ایدی. پول ییغیب و بو گالریگه صرفلهدیم.»
مذکور عیال، عینکلری نی کوزیگه تاقیب، کوپ دقت بیلن رنگلرنی قوشماقده و ایکی صناعت اورگنووچی هم اونینگ یانیده اولتیریب و قیزیقیش بیلن اونینگ نقاشلیگی نی کوزهتماقدهلر. او پلت اوستیده قوشگن رنگلرنی قیزلردن بیریگه بیریب و افغانستان ده صناعت بازاری کسادلیگینی بیان قیلهدی.
حاضر نقاشلیک و استادلیک مذکور صناعتچی عیالنینگ ۲۴ ساعتلیک ایشیگه اوزگرگن؛ بیراق ینه هم او بو یول آرقهلی اونچهلیک درآمد قولگه کیلتیرمسلیگینی بیان قیلیب و ایتیشیچه، یاشلر اینیقسه قیزلر اورگهنیش و رنگلر بیلن وقتلرینینگ اوتیشیگه قیزیققنلر؛ لیکن مذکور تابلولرنی ساتیب آلیشگه اونچهلیک قیزیقمهیدیلر. «افغانستان ده صناعت بازاری اونچهلیک یخشی ایمس، لیکن اویده قالیشدن کوره یخشی دیر. آیده اونچهلیک درآمد قولگه کیلتیرمهیمن، آیده اینگ کوپ درآمد مینگه قالسه، ۴-۵ مینگ افغانی دیر. بو ییردن قولگه کیلهدیگن پولنی، قیته بو ییرگه صرفلهیمن.»
حاضر اوشبو نقاشلیک ایشخانهسیده، کمیده ۲۰ قیز و ۵ اوغیل باله اَیری وقتلرده نقاشلیک اورگنماقدهلر. ماهگلگه کوره، صناعت گه قیزلرنینگ قیزیقیشی و اولر یوزیگه باشقه تعلیمی مکانلرنینگ یاپیق قالگنی سبب، صناعت اورگهنیش توغریسیده قیزلر سانی کوپهیگن. «اورگنووچیلردن کوپ قطارینی قیزلر تشکیل بیرهدی و اوغیل بالهلر سانی آز دیر. قیزلر سانی ۱۸-۲۰ ته و اوغیل بالهلر سانی ایسه ۵ ته دیر. بیر کوندن کیین کیلهدیگنلر ۵۰۰ افغانی و کونده کیلهدیگنلر ایسه بیر مینگ بیرهدیلر. بو ایشخانهده صناعت اورگنووچیلرگه صفردن یوزگچه اورگتهمن.»
مذکور نقاشلیک ایشخانهنینگ بیر چیکهسیده، نقاشلیک پالتینی قولیگه آلیب و کوپ دقت بیلن بیر تابلو یوزیگه ایشلماقده. او ۱۲-صنفنی بیتیرگن ۲۱ یاشر دیر. زینب ایکی ییل آلدین کانکور سیناوینی اوتکزیب و کابل بیلیم یورتینینگ عربچه ادبیاتی فاکولتهسیگه یول تاپگن ایکن.
اوشبو قیز رنگلرنی بیر بیری بیلن قوشهیاتگنی بیرحالده ایتیشیچه، نقاشلیک قیلیش چاغیده فکری قیینچیلیکلر و چیکلاولردن اوزاقلشهدی. «نقاشلیک قیلهدیگنیم پیتده وقتنینگ اوتیشینی بیلمهیمن. حسمنی رسم بیلن بیان قیلهمن، نقاشلیک بیلن برچه قیینچیلیکلریمنی اونوتهمن. صناعت دنیاسیده اوزیمنی خورسند حس قیلهمن.»
بیزلرنینگ فیسبوک صحیفهمیزگه باش اورینگ!
مذکور ایشخانهده ایکی ییلدن بیری نقاشلیک اورگهنیش بیلن شغللنگنلردن باشقه بیری صبرینه دیر. او کابل بیلیم یورتی اقتصاد فاکولتهسینی بیتیریب و کوپینچه سعیوحرکت بیلن اوزیگه بیر ایش تاپه آلمهگن.
مذکور صناعتچینینگ ایتیشیچه، روحی و روانی قیینچیلیکلردن قاچیش مقصد نقاشلیکنی اورگهنیشگه یوز کیلتیرگن که حاضرگی کونلرده صناعت و رنگلر اونینگ بیر پناهگاهسی بولگن. «تشقریده ایشلهگن کیشیلردن ایدیک و برچه نرسه اوزگرگنیدن کیین کوپ تاثیر قویدی مینگه؛ بیراق رنگلرنی قوشیش بیلن فکرم مشغول بولیب و وقتنی اوتیشینی بیلمهیمن و قیینچیلیکلریمنی اونوتهمن.»
کابلنینگ دولتی مکتبلریدن بیریدهگی اوقیتووچی بولمیش ۳۳ یاشر فرشته معصومی، کونیدن یریمینی مذکور صناعتی ایشخانهده اوتکزیب و نقاشلیک تمرین قیلهدی. آلتی ییل نقاشلیکنینگ تورلی بولیملریده ایشلهگن معصومیگه کوره، صناعت اینیقسه نقاشلیک و تورلی دیزاینلر اونینگ اوچون جذاب دیر.
اونینگ کوپهیتیریشیچه، ایش و حیات باسیملریدن مذکور صناعتی ایشخانهگه پناه کیلتیرهدی. طبیعت توغریسیده بولگنی صورتنی رنگلش بیلن شغللنگن فرشتهنینگ ایتیشیچه: «کوپراق طبیعت توغریسیده ایشلشگه قیزیقهمن. گرچند افغانستان ده صناعتنینگ اونچهلیک درآمدی یوق؛ بیراق بو ییرده کوپ اوزیمنی آرام حس قیلهمن.»
مونالیزا صناعتی ایشخانهسی مسئولی بولمیش ماهگل، بیر کونی اوزی و باشقه قیزلرنینگ بیلیم یورت گه باریشی، ایشخانهسینینگ کینگهیشی و صناعتی اثرلرینینگ خلقارا بویوک کورگزمهلرده نمایشگه قوییشنی آرزو قیلهدی. او دایرهای شکلده بولگن بیر میز یانیده توختهب و درسلریگه دوام بیرهدی. او قولی گه بیر پنسلنی آلیب و یانیدهگی ایکی صناعت اورگنووچیسیگه قندهی قلم گه باسیم کیلتیرمسدن موازی چیزیقلرنینگ چیزیشینی اورگتماقده.
