کابل ده بیر عیال تیکووچیلیک و قول صناعتی ایشخانهسینی آچیش بیلن، باشقه عیاللرگه کسب-کار اورگهنیش و ایش بیلن شغللنیش زمینهسینی یرهتگن.
۲۵ یاشر تفسیر برکینینگ ایتیشیچه، تورت ییل آلدین ایشسیزلیک و اونینگ طفیلی باسیملردن قوتیلیش مقصد، ۱۰۰ مینگ افغانی سرمایه بیلن «مدلین برند» ایشخانهسینی آچیب و ایشینی آنلاین شکلده باشلهگن. اونینگ کوپهیتیریشیچه: «بو ایشدن مقصدیم، عیاللرگه ایش زمینهسینی یرهتیش ایدی که اولردن برچهسی افغانستاننینگ هر بیر چیکهسیده فعالیت قیلهدی.»
شونینگدیک بیر ییلدن بویان فعالیتینی حضوری شکلده هم باشلهگن برکینینگ ایتیشیچه، مدلین برند ایشخانهسیده، گند افغانی، مهرهدوزلیک بولگن کییملر، چپن، مکتب کییمی و باشقه تورلیخیل کییم تولید بولیب و بازار گه چیقریلهدی. «مهرهدوزلیک ایشخانهدهگی اینگ خاص ایشلردن بیری دیر؛ دیزاین قیلگنیمیز هر بیر کییم اوچون بیر عیال کیچه و کوندوز زحمت تارتهدی.»
مدلین برند ایشخانهسی، حاضر برکی و باشقه آلتی عیال اوچون اینگ مهم درآمد منبعسیگه اوزگریب و اولر بو یول آرقهلی، عایله نیازلرینی تامین قیلهدیلر. مدلین برند ایشخانهسیده ایش بیلن شغللنگن عیاللردن قطارینینگ ایتیشلریچه، بو ایشخانه اقتصادلری رواجلنیشی و اجتماع ده حضورلری بولیشیگه یاردم بیرگن.
پروان یشاوچیسی و مهرهدوزلیک بولیمیده ایشلهیدیگن ۲۲ یاشر صدفنینگ ایتیشیچه، مدلین برندده ایشگه باشلشدن کیین عایله اقتصادی وضعیتی یخشیراق بولگن. «بو ایش درآمد تاپیشیمگه سبب بولدی. بو ییرده ایشلش، حیاتیمنی بیراز یخشیراق بولیشی و کوندهلیک خرهجتلریمنینگ تامین قیله آلیشیمگه سبب بولدی.»
کابل یشاوچیسی و بیر ییل آلدین مدلین برندده ایشگه باشلهگن ۲۰ یاشر سعدیهنینگ ایتیشیچه: «بو ایش حیاتیمگه کوپ تاثیر قیلگن. هم مالی مستقللیککه ییتیشدیم و همده مینی اوچون فکری بیر اویین-کولگی بولگن.»
شونینگدیک تیکووچیلیک اورگنهدیگن کابل یشاوچیسی بولمیش ۲۰ یاشر صدفنینگ ایتیشیچه، مدلین برند ایشخانهسیده ایشلش، اونینگ اوچون فایدهلی بولگن. «بو ییرده ایشلماق حیاتنینگ یخشیراق بولیشیگه سبب بولدی. ایشلب چیقریشده دقت قیلیش، گروهی ایشلر، وقتنی مدیریت قیلیش و فنی مهارتلرنی اورگنگنمین.»
اوتگن تورت ییلده، عیاللر و قیزلردن قطاری کیچیک تجارتلرنی یولگه قوییشگه یوز کیلتیریب و عایلهلریگه یاردم بیریش مقصد سعیوحرکت قیلگنلر.
باشقه بیرتاماندن، عیاللر سودا و صناعت اتاق عضوی فریبا نورینینگ ایتیشیچه، عیاللر تجارتینی قوللب-قوتلش اوچون بیر قطار برنامهلری بار. نوریگه کوره: «تدبیرکار عیاللرنینگ قوللب-قوتلنیشی کیرهک. بو ییل سوداگر عیاللر اوچون بیر قطار برنامهلریمیز بار.»
اقتصادی مسئلهلر بیلرمانلرینینگ ایشانچیگه کوره، عیاللرنینگ اقتصادی فعالیتلریدن حمایت بولیشی، عایلهلرنینگ ساتیب آلیش امکانیتی کوپهیشی و اولرنینگ قرهملیگی کمهیشیگه یاردم بیره آلهدی. اقتصادی مسئلهلر بیلرمانلریدن عبدالظهور مدبرنینگ ایتیشیچه: «کیچیک ایشخانهلر اقتصاد اوچون ایجابی اورینگه ایگه بولیب و ایش زمینهسی یرهتیلیشیگه سبب بولهدی. اوشبو تجارتلر اهالینینگ ساتیب آلیش امکانیتینی آشیرهدی.»
کیچیک تجارتلر، حاضر افغانستان دهگی عیاللر اوچون یگانه درآمد تاپیش یولیگه اَیلنگن و بیرلشگن ملتلر تشکیلاتینینگ ترقیاتی دستوریگه کوره، افغانستان ده بو تشکیلاتنینگ حمایتی آستیده بولگن ۸۹ مینگ کیچیک تجارتدن، ۹۱ فایزی عیاللر آرقهلی رهبرلیک بولهدی.
