پایتخت کابل یشاوچیلریدن ایریملری استقلال کسلخانهسیده کیچه تاماندن طبی خذمتلر جملهدن شفاکار ییتیشمسلیگی، بستر یوقلیگی و اوز وقتیده دوالنمسلیک کبی قیینچیلیکلر بیلن روپهره ایکنلریدن شکایت قیلماقده. اولرنینگ ایتیشیچه، ایریم حالتلرده حتا ایمرجنسی کسللر اوز وقتیده قبول قیلینمهیدی – بو مسئله کابل یشاوچیلرینی تشویشیگه سبب بولگن.
کابللیک ۲۴ یاشلی روینا، نیچه آی ایلگری کیچه تاماندن سینگلیسینی توغروق اوچون استقلال کسلخانهسیگه آلیب بارگن ایدی، بو کسلخانهدهگی شفاکارلر یامان معامله بیلن کسلینی قبول قیلیشمهگنینی بیلدیرهدی.
او شوندهی دییدی: «تورت-بیش آی اول سینگلیم حاملهدارلیکنینگ توقیزینچی آییده ایدی، کیچه ساعت ۱۱:۳۰ ده باشی آغریب قالدی. اونی استقلال کسلخانهسیگه آلیب باردیک، بیراق شفاخانه گه ییتگنیمیزچه احوالی انچه آغیرلشدی. شفاکارلر گه توغیشی یقینلیگینی ایتدیک، اولر ایسه بوش اورین یوق دیب جواب بیریشدی، جوده التماس قیلدیک قولیمیزدن کیلگنیچه حرکت قیلدیک لیکن شفاکارلر قوپال معامله قیلیشدی و بو بیز گه باغلیق ایمس، قییرگه خواهلهسنگیز آلیب بارینگ دییشدی.»
کابل یشاوچیلریدن باشقه بیری ولیدنینگ ایتیشیچه، بیر کیچه آتهسینینگ کوکرهگیده کوچلی آغریق تاپیلیب و اونی استقلال کسلخانهسیگه آلیب باریشگن، بیراق اونینگ سوزلریگه کوره، شفاکار یوقلیگی سببلی کسل گه ضرور درجهده طبی یاردم کورسهتیلمهگن و اولر باشقه کسلخانه گه مراجعت قیلیشگه مجبور بولیشگن. اونگه کوره: «بیر کیچه ساعت ۱:۰۰ اطرافیده آتهمنینگ بیردن کوکرهگی قتیق آغریب قالدی. اونی تیزلیک بیلن شفاخانه گه آلیب باردیک. ییتیب بارگنیمیزده شفاکار یوق دییشدی. بو یورهک خروجی بولیشی ممکنلیگینی نیچه بار ایتگن بولسک هم، اعتبار بیریشمهدی و کوتیشنی بویریشدی. آتهمنینگ احوالی ایسه حقیقتن دقیقه گه یامانلشیب بارردی. آخری اونی باشقه کسلخانه گه آلیب باریشگه مجبور بولدیک، بیراق یولده هوشسیزلنیب قالدی. شفاخانهنینگ بیپروالیگیدن جوده رنجیدیک.»
۲۳ یاشلی ناجیه، نیچه کون آلدین کیچه ساعت ۸:۰۰ اطرافیده آپاندیسی بولگن سینگلیسینی استقلال کسلخانهسیگه آلیب بارگن؛ بیراق احوالی آغیرلیگیگه قرهمسدن شفاکارلر اونی قبول قیلیشمهگنینی ایتهدی.
او شوندهی دییدی: «بیر کونی کیچقورون ساعت ۸:۳۰ ده سینگلیم آپاندیسی بولیب قالگندی، حتا اورنیدن توره آلمسدی اونی شفاخانه گه آلیب باردیک، ییتیب بارگچ، ناگرانلر اروهچهسیده بولیمگچه آلیب باردیک، بیراق بولیم ایشیگیدن ایچکریگه هم کیریتیشمهدی.، باشقه شفاخانه گه آلیب بارینگلر دییشدی حتا عادی بیر کوریک هم اوتکزیشمهدی.»
استقلال کسلخانهسیده نسایی-ولادی متخصصی نظیفه طبیبزاده، بستر آزلیگی و کسللر کوپلیگی سببلی، کسلخانه امکانیتی محدود بولیب و ایریم کسللر باشقه شفاخانهلر گه یوباریلیشینی معلوم قیلهدی.
او شوندهی دییدی: «مثلاً بیزنینگ بولیمده ۲۰ ته اورین بار، بیراق بعضاً کیچهسی کسللر سانی ۷۰-۸۰ نفر گه ییتهدی. توغروقلر بولهدی یا کی ۲۴ ساعت دوامیده ۲۰ تهگچه عملیات اوتکزیلهدی. ریکوری و باشقه بولیملر هم تولیب کیتهدی. شوندهی حالتلرده برچه کسللرنی قبول قیلیش امکانیتیمیز بولمهیدی و ایریملری باشقه کسلخانهلر گه یوباریلهدی.»
استقلال کسلخانهسی باش شفاکاری جاوید یوسفنینگ ایتیشیچه، اوشبو شفاخانهده کسللر کوپلیگی و بستر ییتیشمسلیگی، کسللر اوز وقتیده دوالنیش جریانینی قیینچیلیک بیلن دوچ قیلگن. اونگه کوره: «بو مسئله انیق، کسللر سانی جوده کوپ. اگر بوش اورین بولمسه یا کی کسل اوچون اجرهتیلگن خانه موجود بولمسه، بو البته معمالرنی کیلتیریب چیقرهدی. بوش اورین بولمهگنده اوزیگه خاص قیینچیلیکلر یوزه گه کیلهدی. کسلنی قبول قیلیش یا کی اوز وقتیده دوالنمسلیک، بو اونینگ ساغلیغیگه شونچهلیک سلبی تأثیر کورستهدی.»
شو بیلن بیرگه، اسلام امیرلیگی ساغلیقنی سقلش وزیرلیگی مسئوللری استقلال کسلخانهسیده کیچه تاماندن طبی خذمتلر ییتیشمسلیگی حقیده هیچ نرسه دیمسه-ده، بیراق کیچه تاماندن طبی خذمتلر یخشیلنیشی اوچون بوتون یشاوچیلر گه ستندرد خذمت کورسهتیلیشیگه سعی-حرکت قیلینهیاتگنینی ایتهدیلر.
ساغلیقنی سقلش وزیرلیگی سوزلاوچیسی شرافتزمان امرخیل سلاموطندار بیلن صحبتده شوندهی دییدی: «ساغلیقنی سقلش وزیرلیگی هر بیر یشاوچیگه ستندرد گه ماس طبی خذمت کورسهتیشگه حرکت قیلماقده. ایریم حدودلرده کسللر سانینینگ کوپلیگی سببلی معیین قیینچیلیکلر یوزه گه کیلهدی. شونگه قرهمی، بیزنینگ اساسی مقصدیمیز مملکتنینگ تورلی ولایتلریده ساغلیق مرکزلری ۲۴ ساعت خذمت کورسهتیش دیر.»
طب ساحهسیده بیلرمان فدامحمد پیکاننینگ فکریچه، کیچه تاماندن یخشی طبی خذمت کورسهتیلیشی اوچون ساغلیق مرکزلر صفتی و خادملر ظرفیتی آشیریلیشی کیرهک. او شوندهی دییدی: «بونینگ ییچیمی بار و بو ساغلیقنی سقلش تیزیمینینگ برقرارلیگی اوچون جوده مهم دیر. شفاخانهلر صفتی یخشیلنیشی کیرهک، شونده شفاخانهلردهگی کسللر یوکلمهسی کمیهدی. خذمتدن قانیقیش تیزیمی هم تکامللشتیریلیشی لازم. اینگ مهمی ایسه، طبیات خادملری یخشی تیارلنیشی، ملَکه آشیریش و اوقوو تریننگلریدن اوتیشی کیرهک.»
کابل یشاوچیلری، استقلال کسلخانهسیده کیچه تاماندن طبی خذمتلر ییتیشمسلیگیدن عینحالده نالیماقده – سونگی ییللرده مرکز و ولایتلرده یشاوچیلر طبی امکانیتلر آزلیگی، یامان معامله قیلیش، کسللر کوپلیگی، بوش بسترلر ییتیشمسلیگی و کوپ کوتیش کبی قیینچیلیکلر بیلن روپهره بولگن.