پاکستانده افغانستانلیک مهاجر بالهلرنینگ تعلیمدن محروم قالیشی، عایله اعضالرینینگ تشویشیگه سبب بولگن. پاکستانده افغانستانلیک ایکی مهاجر مغفرت سحر امینی و شمس، اقتصادی قیینچیلیک، یشش قانونی حجتلری یوقلیگی، اینیقسه مهاجرلر یوزیگه مکتبلر ایشیگی یاپیقلیگی و مهاجرت ساحهسیده بولگن چیکلاولر سببلی، مینگلب افغانستانلیک باله اوقیشدن محروم قالگنینی ایتهدیلر.
اولر گه کوره، بو احوال بالهلرنینگ کیلهجگیگه دایر عایلهلری تشویشیگه سبب بولگن. سحر امینی شوندهی دییدی: «پاکستانده افغانستانلیک بالهلرنینگ قیینچیلیگی، مکتبلرده شامل بولیش اوچون قانونی حجت یوقلیگی دیر. مهاجر عایلهلر اقتصادی قیینچیلیک، مجبوری چیقریش سببلی بالهلرینی مکتب گه یوباره آلمهیدیلر. بو احوال مینگلب بالهنینگ تعلیمدن محروم قالیشیگه سبب بولگن.»
پاکستانده مهاجر شمس هم شوندهی دییدی: «مهاجرلر اوچون مکتبلر حاضر یاپیق و بالهلر تعلیمدن محروم قالگنلر. نهفقط مکتبلر بلکی مدرسهلر و عالی درگاهلر ایشیگی هم یاپیق و عایلهلر بالهلرینینگ کیلهجگیدن تشویشده.»
پاکستانده افغانستانلیک مهاجر بالهلرنینگ تعلیمدن محروم قالیشی، فقط اولرنینگ مکتبدن اوزاق قالیشیگه خلاصه بولمهیدی؛ بلکی بو احوال اولرنینگ روحی سلامتلیگیگه هم تأثیر قویگن.
پاکستانده افغانستانلیک مهاجرلردن نوید سروری و محمدصابر شیرزادنینگ ایتیشلریچه، تعلیمدن محروم قالیش و مهاجرلر گه بولگن باسیملر آشیریلیشی، بالهلرینی توشکونلیک و ناامیدلیککه دچار قیلگن.
نوید سروری شوندهی دییدی: «بو ییردهگی اکثریت بالهلر ۱۳-۱۴ یا کی ۱۵ یاش ده و روحی نقطهی نظردن بوتونلی توشکونلیککه دوچ بولیب و ناامید بولگنلر. افسوس بیلن پاکستان دولتی هم ییترلیچه افغانستانلیک بالهلر بیلن همکارلیک قیلمهدی و اولرنینگ کوپینچهسی حاضر اوقیشدن محروم دیر.»
محمدصابر شیرزادنینگ ایتیشیچه: «بو احوال پاکستانده افغانستانلیک مهاجر بالهلرنینگ اوستیگه سلبی تأثیر قویگن. حتا تشقری چیقسهی بالهلر گه ایتیلهدی آنه تیل یا کی فارسچه گپیرمه، چونکی افغانستانلیک مهاجرلر گه باسیملر کوپهیگن. مهاجرلرنینگ حیاتیده قورقیش و تشویش تولیق حس قیلینهدی.»
مهاجرت ساحهسیده بیلرمانلرنینگ فکریچه، پاکستانده افغانستانلیک مهاجرلرنینگ تعلیمدن محروم قیلینیشی، مهاجرلر و بالهلر حقوقی گه دایر خلقارا قانون گه قرشی دیر.
مهاجرت ساحهسیده بیلرمان سپوژمی جبارخیل شوندهی دییدی: «پاکستانده افغانستانلیک مهاجرلر یا کی بالهلر جوده کوپ عذابده – بو خلقارا قانون گه ضد دیر؛ چونکی بیر مهاجر باشقه بیر مملکت گه باشپنه سورهب بارسه، او مملکت خلقارا قانون، یونیسف و خلقارا کنوانسیونلر گه اساس مهاجرلرنی قوللب-قوتلش گه مجبور دیر.»
شو بیلن بیرگه، مهاجرلرنینگ قیینچیلیکلرینی حل قیلیش بوییچه کمیسیون سوزلاوچیسی احمدالله وثیق، پاکستانده افغانستانلیک مهاجرلرنینگ قیینچیلیگی مجبوری چیقریش جریانی باشلنگنیدن سونگ کوپهیگن.
او شوندهی دییدی: «بو ینگی قیینچیلیک ایمس؛ پاکستان افغانستانلیک مهاجرلر گه مجبوری چیقیش فرمانینی بیرگندن سونگ، بو مملکتده افغانستانلیک مهاجرلر ایریم قیینچیلیک بیلن دچار بولدی. افغانستان حکومتی و ایلچیخانه پاکستان همده مهاجرت ساحهسیده بولگن تشکیلاتلر بیلن علاقهده، بیراق هلیگچه نتیجه بیرگنی یوق.»
پاکستانده افغانستان ایلچیخانهسی سوزلاوچیسی الف شاه گه کوره، اوقووچیلر و طلبهلرنی قوللب-قوتلشدن تشقری، بالهلرنینگ تعلیم حقوقلرینی حمایه قیلیش جریانینی هم دوام ایتتیریشگه حرکت قیلینماقده. او شوندهی دییدی: «اسلامآباد ده افغانستان ایلچیخانهسی ریجهلی چارهلر بیلن خیبر پختونخواه، بلوچستان، سند، پنجاب و اسلامآباد همده ارولپندی شهرلریده مهاجر بالهلرنینگ تعلیم ساحهسیده بولگن قیینچیلیکنی حل قیلگن.»
پاکستان سونگی آیلرده، افغانستانلیک مهاجرلرنینگ حبس گه آلیش و مجبوری چیقریش جریانینی آشیرگن. بیرلشگن ملتلر تشکیلاتینینگ مهاجرلر بوییچه عالی کمیسارینینگ ایتیشیچه، پاکستانده افغانستانلیک مهاجر بالهلر قانونی یشش حجتلری یوقلیگی و مجبوری چیقریلیشدن قورقیش سببلی اوقیشدن محروم قالگنلر. اوشبو تشکیلاتنینگ گزارشیگه کوره، پاکستانده تخمیناً ۷۷ فایز افغانستانلیک بالهلر مکتب و عالی درگاهلر گه باره آلمهیدی.
