کابل شهری نینگ ۲۲ ناحیه‌سیده جایلشگن پل شینه منطقهسیده، ایسیق قویاش آستیده آواره بولگن عایله‌لر و کییم-کیچگی بولمه‌گن باله‌لر، کیچه و کوندوز نی سرک‌لر ده باش‌پناه‌سیز شکلده اوتکزه‌دیلر. آواره بولگنلردن قطاری تیریکچیلیکلری نینگ آغیر وضعیتی‌دن شکایت قیلیب ایتیش‌لریچه، اوشبو اردوگاه نی ترک ایتیش اوچون نیچه مرته کابل بلدیه‌سی تامانیدن هشدار بیریلگن. اولر گه کوره، بیش کون آلدین کابل بلدیه‌سی اولر نی جبر و زوره‌وانلیک بیلن اوی‌لریدن چیقریب و اوی وسیله‌لری نی توپراق آستی قیلگن.
توقیز باله آنه‌سی بولمیش زرغونه نینگ ایتیشیچه، اویی ویران بولگنی‌دن کیین، باله‌لری ایسیق قویاش آستیده کسل بولگن. اونینگ کوپه‌یتیریشیچه: «تورت-بیش کون‌دن بیری دربدرمیز. هیچ نرسه‌میز یوق. حیات کیچیریش اوچون اویی‌میز یوق. باله‌لریمیز سرک‌لرده قالگن. باله‌لر نینگ ایغلگنی پیتده، کلتک‌له‌یدیلر. باشیمیز اوستیده بلدوزر بیلن کیلدیرلر و اوی نی باشیمیز گه ویران قیلدیلر. برچه وسیله‌لریمیز توپراق اوستی بولدی هیچ نرسه آلالگنیمیز یوق.»
شونینگدیک اویی ویران بولگنلردن بیری غفور نینگ ایتیشیچه، برچه نرسه‌سی و پولی نی قولدن بیرگن و کیتیش اوچون هیچ بیر جایی یوق. اونینگ کوپه‌یتیریشیچه: «اویی‌میز نی ییقدیلر. کییم-کیچکی‌میز توپراق آستی بولدی. نان بولمه‌گنی صورت‌ده، باله‌لریمیز آچ قاله‌دی. پولی‌میز یوق که بیر طرف گه بارسه‌ک. ایکی قیز دیوار آستیده قالیب هلاک بولدی.»
سرک یانیده، عایله‌سی بیلن یولدن اوتیب قیته‌دیگنلر تامانیدن بیر یاردم قولگه کیلتیریش نی کوتیب تورگن نورین نینگ ایتیشیچه، اوی‌لر نینگ ویران بولینیشی و دیوار نینگ ییقیلیشی چاغیده، ایکی عیال اولیب و بیر قطار کیشی یره‌لنگن.
بیزلرنینگ فیسبوک صحیفه‌میزگه باش اورینگ!
بلدیه آرقه‌لی اویی ویران بولگن محل یشاوچیلردن باشقه بیری نسیمه نینگ ایتیشیچه: «بیر قطاری کیشی اولیب و یره‌لندی. ایکی عیال دیوار آستیده قالیب اولدی و قرین‌داش‌لریمیزدن بیر عیال ایسه یره‌لندی.»
بو آره‌ده دیوار نینگ ییقیلیش چاغیده یره‌لنگن شکیلا نینگ ایتیشیچه، اویی نینگ ویران بولیشی چاغیده، اونینگ اوی‌دن چیقیشی گه هم رخصت بیریلمه‌گن.
ناروی مهاجرلر کینگشی، اوتگن کون بیر گزارش ترقه‌تیش بیلن ایتیشیچه، سرپرست حکومت زوره‌وانلیک بیلن ایچکی آواره‌لر نی کابل نینگ پل شینه اردوگاهی‌دن چیقرگن و ۴ و ۱۵ یاشر ایکی باله مذکور اردوگاه نینگ ویران بولیش چاغیده، هلاک بولگن.
افغانستان ده ناروی مهاجرلر کینگش مدیری نیل ترنر اوشبو گزارش‌ده ایتیشیچه: «کابل رسمی‌لری، زیان کوره‌دیگن عایله‌لر نی چیقریش بیلن، افغانستان ده آواره عایله‌لر گه ینگی قیین‌چیلیک‌لر ایجاد قیلگن. رسمی‌لردن اولر نی چیقرمه‌ی و اولردن حمایت قیلیش‌لری نی ایسته‌گن.»
بیزلرنینگ توییترده هم تعقیب قیلینگ!
بیراق کابل بلدیه‌سی زوره‌وانلیک رفتار خصوصیده‌گی ادعا نی رد قیلیب ایتیشیچه، پل شینه منطقهسیده آواره‌لر اردوگاهی ییری دولت گه تیگیشلی دیر و غصب‌دن چیقریلگن. کابل بلدسه‌سی سوزلاوچیسی نعمت‌الله بارکزی نینگ سلام‌وطندار گه ایتیشیچه: «تورلی اسم‌لر بیلن تورلی کیشی‌لر تامانیدن غصب بولگن ۱۰۰ جریب ییر، بلدیه گه قیته بیریلدی. مذکور کیشی‌لر ادعاسی نی رد قیله‌میز. بیر هفته آلدین اولر نی خبر بیرگن ایدیک.»
کابل نینگ پل شینه منطقهسیده آواره‌لر اردوگاهی‌ده حیات کیچیره‌دیگن عایله‌لر، ییل‌لردن بویان تورلی سبب‌لر بیلن باشقه ولایت‌لر و قوشنی مملکت‌لردن آواره بولگن ایدیلر که، اوشبو اردوگاه، اولر نینگ یالغیز باش پناه‌سی ایدی؛ بیراق حاضر ایسه قیته سرک‌لرده قالیب و آواره بولگنلر.
