کابل_قندهار یولی هیداوچیلری و غزنی اهالیسی، اوشبو یول نینگ قیته قوریش ایشلری سُست‌لیگیدن نالیب و پروژه ایشلری تیزلشتیریلیشینی سوره‌یدیلر.
تورت ساعت‌لیک سفر دن کیین ینگی‌لیکده غزنی بیکتی گه ییتیب کیلگن و سفر خسته‌لیگی سیماسی و توپراقلی چنته‌سی دن بیللی محمدجمشید گه کوره، غزنی دن کابل گه قدر یول زیریکرلی بولیب و کوپ ساعت یول یوریدیلر.
او نینگ ایتیشیچه، کابل_قندهار قتناو یولی قیته قوریله‌یاتگنی باعث، یولاوچیلر خامه یوللر بیلن سفر قیلیش گه مجبورلر.
اونگه کوره: «کابل دن کیلگونچه یول کوپ بوزوق، سرک‌لر خامه دیر، میدان‌شهر یولی دن خامه سرککه یول یوریمیز، کوپ قیینچیلیک بیلن روپه‌ره‌میز.»
اوشبو سرک یولاوچیلری دن باشقه بیری امین‌الله نینگ سلام‌وطندار گه ایتیشیچه، قیش موسمی ییتیب کیلگونچه بو یول ایشی یکونلنمسه، یولاوچی تاشووچی کیچیک موترلر نینگ قتنه‌شیشی ممکن‌سیز دیر.
بیزلرنینگ فیسبوک صحیفه‌میزگه باش اورینگ!
اونگه کوره: «بو یول نینگ قیته قوریش ایشی تخمیناً، سکیز یا که توقیز آی آلدین باشلنگن ایدی، پروژه ایشی سست دیر. سرک نینگ ۵۰ فایزی اسفالت بولگن، هوا ساووق بولماقده ایشلرینی تیزلشتیریشنی ایسته‌یمیز چونکه یولاوچیلر کوپ قیینچیلیک بیلن دوچ دیر.»
شونینگدیک، کابل_غزنی قتناو یولی هیداوچیلری دن بیرقطاری، اوشبو یول نینگ خامه‌لیگی و نیچه ساعت یول یوریش‌لری دن شکایت قیله‌دیلر.
غزنی شهری «علی‌لالا» چوکی ده کابل بیکتی ده یولاوچی کوتیب تورگن محمدعلی و مصطفا نینگ سلام‌وطندار گه ایتیشلریچه، سرک قیته قوریلمسلیگی اوچون توپراقلی خامه یول دن قتنه‌شیش گه مجبورلر.
اولر گه کوره، خامه یول ده موترلری تخنیکی قیینچیلیک تاپیب و نیچه ساعت یول یوریدیلر، لیکن یولاوچیلر سابق کبی یول حقی توللـه‌ماقده‌لر.
محمدعلی نینگ ایتیشیچه: «عمومی سرک یانیدن اضطراری سرک توزه‌لگن بیراق توپراقلی، خامه و تاشلیق دیر، هر کونی احتمالاً موتر نینگ بیر تایری اورته دن کیتیشی ممکن.»
مصطفا گه کوره: «اسلام امیرلیگی دن قیش ییتیب کیلگونچه سرک ایشی یکونلنیشینی ایسته‌یمیز، عکس‌حالده کیچیک موتر هیداوچیلری و یولاوچیلر قیینچیلیک بیلن دوچ بوله‌دیلر.»
باشقه تاماندن، یول بوزوق‌لیگی و اوزاق‌لیگی باعث کابل_غزنی یولاوچیلری سانی اوتمیش گه نسبتن کمه‌یگن.
هیداوچیلر گه کوره، غزنی یشاوچیلری یول بوزوق‌لیگی طفیلی آز سفر قیله‌دیلر، شونی اوچون یولاوچیلر سانی کمه‌یگن.
او نینگ کوپه‌یتیریشیچه: «سرک بوزوق‌لیگی اوچون یولاوچی کمه‌یگن، یشاوچیلر مجبور بولمسه سفر قیلمه‌یدی. سرک توزه‌لسه انشاءالله ایشلر یخشی بوله‌دی دیب امید قیله‌میز.»
ایتیش کیره‌ک، میدان‌وردک و غزنی ولایت‌لری ده کابل_قندهار قتناو یولی نینگ قیته قوریش ایشی، اوشبو ییل اسلام امیرلیگی فواید عامه وزیرلیگی تامانیدن باشلندی.
غزنی فواید عامه ریاستی مسئوللری نینگ ایتیشلریچه، غزنی منطقه‌سیده اوشبو یول نینگ ۱۲۲کیلومتری نی قوریش ایشی، ایکی کمپنیه بیلن امضالنگن.
بیزلرنینگ «ایکس» ترماغی ده هم تعقیب قیلینگ!
حاضرگچه ۲۵ کیلومتر سرک نینگ ایشی یکونلنگن و ایکیله کمپنیه کوپریک‌لر و اوشبو یول نی اسفالت گه تیارلش ایشلری بیلن مصروف دیر.
غزنی فواید عامه باشلیغی محب‌الله عباس نینگ سلام‌وطندار گه ایتیشیچه، بو پروژه‌لر ایشی «قلعه‌ی عزیز» منطقه‌سیدن «دشت‌اسفند» گچه، بیر کمپنیه بیلن «دشت‌اسفند» دن غزنی ولایتی مقر تومنی گچه ایکینچی کمپنیه بیلن امضالنگن.
عباس جنابلری، مذکور پروژه‌لر نینگ ایشی سست‌لیگی خصوصیده سوال گه جواب، یشاوچیلر یول ایشی یکونیگچه چیده‌ش‌لرینی طلب قیله‌دی.
اونگه کوره، هوا ساووق بولیشی بیلن اوشبو پروژه‌لر ایشی توخته‌لیب و کیله‌سی ییل فایده‌لنیشگه تاپشیریلیش احتمالی موجود دیر.
کابل_قندهار قتناو یولی جمهوریت توزومی بیرینچی ییل‌لیگی ده اسفالت بولگن. ایکی سنه دن بیری سرک‌لر یانیده ییرلشتیریلگن ماین‌لر پارتلشی و یوک تاشووچی موترلر نینگ قتنه‌شیشی باعث، مذکور یول نینگ ایریم بولیم‌لری بوزیلگن.
حاضر یشاوچیلر، پروژه یکونیدن کیین قانون_قاعده‌لر گه قرشی یوک تاشووچی موترلر نینگ آلدی آلینیشینی سوره‌یدیلر.