هرات مرکزی قماقخانه‌سیده محبوس‌لری نینگ اعتراض‌لریدن ۴ کون اوتگنیدن سونگ، هرات ولایتی کینگشی اوشبو واقعه نینگ یاشیرینچ تامان‌لرینی آچیق‌لگن.
اوتگن هفته “چهارشنبه” کونی شام چاغیده، هرات مرکزی قماقخانه‌سی نینگ ۵- بلاک ده بولگن محبوس‌لری تامانیدن توزلگن غرفه‌لر پولیس کوچلری تامانیدن بوزیلگنی سبب، اولر اعتراض بیلدیرگن و اعتراض‌لری زوروانلیک‌که اوزگریب نتیجه‌ده ۸ محبوس هلاک و باشقه ۱۲ محبوس یره‌لنگن.
هرات ولایتی کینگش باشلیغی کامران علیزایی نینگ محلی مسئول‌لر اینقسه پولیس کوچلری نینگ دقت‌سیزلیگی و یلغانچی‌لیگیدن تنقید قیلیب ایتیشیچه، اوتگن هفته اوتکزیلگن حربی ییغینده آلینگن قرارلرگه کوره، قماقخانه‌ده بولگن بوتون موبایل‌لرنینگ توپله‌نیشی کیره‌ک ایدی.
جناب علیزایی نینگ کوپه‌یتیریشیچه، پولیس کوچلری هماهنگ‌لیک بولمه‌گن بیرحالده، موبایل‌لرنی توپلب، غرفه‌لرنی تخریب قیلیب و ناراض‌لیک بیلدیرگن محبوس‌لرگه قرشی اوق آتگن.
هرات ولایتی کینگش باشلیغی نینگ اوشبو ولایت مرکزی قماقخانه مسئول‌لرینی فساد گه غیب‌لب ایتیشیچه، اوشبو قماقخانه‌ده پولیس همکارلیگی بیلن محبوس‌لر تامانیدن کمیده ۴۰ غرفه قوریلگن و هر بیر غرفه نینگ قوریلیشی‌گه محبوس‌لردن ۱۰۰ مینگ دن باشلب ۱۵۰ مینگ افغانی پول آلینگن.
عین‌حالده، هرات حاکمی سوزلاوچیسی جیلانی فرهاد نینگ ایتیشیچه، کابل دن اوشبو ولایت‌گه کیلگن هیات ایکی کوندن بویان بو واقعه‌نی جدی شکلده تیکشیرماقده.
هرات قماقخانه‌سی مسئول‌لری بوتوغریده فکر بیلدیرمه‌گن، بیراق کیم‌لیگی سیرقالیش‌نی ایسته‌گن بیر منبع نینگ سلام‌وطندارگه ایتیشیچه، مذکور واقعه‌دن سونگ، قماقخانه مدیری اوزگرگن.
منبع نینگ کوپه‌یتیریشیچه، قطار خطرلی محبوس‌لر قماقخانه ایچیدن هرات ده آدم اوغیرلاوچیلیک‌نی رهبرلیک قیله‌ریکن، بیراق اولر پولیس تامانیدن آخته‌ریلگن‌لریدن سونگ، جنجل‌لرنی کینگی‌تیرگن.
منبع گه کوره، خطرلی محبوس‌لر ساغلیک مرکز، مکتب و باشقه بیرقطار جای‌لرنی اوت بیرگن و نتیجه‌ده هرات قماقخانه‌سیگه ۱۵۰ مینگ دالر زیان ییتیشتیرگن.
بوتوغریده پولیس مسوول‌لری فکرینی آلیش اوچون سعی و حرکت قیلدیک، بیراق موفق بولمه‌دیک.