بیرلشگن ملت‌لر تشکیلاتی نینگ آزیق_آوقات دستوری و ایکینچیلیک تشکیلاتی قوشمه بیر گزارش ده، افغانستان شامل ۲۲ مملکت دن عبارت دنیا نینگ ۱۸ نقطه‌سیده، آزیق_آوقات خوفسیزلیگی کوپه‌یگنیدن خواطر بیلدیرگنلر.
اوشبو گزارش ده، افغانستان، نایجریا، سومالیا، جنوبی سودان و یمن یوقاری سطح ده آچلیک بیلن روپه‌ره بولیب و تیز انسان پرورلیک یاردم‌لر گه احتیاجی بار مملکت‌لر دیه قید ایتیلگن.
شونده‌ی بیرحالده، افغانستان ده خلق‌ارا آزیق-آوقات دستوری مسئوللری نینگ ایتیش‌لریچه، بودجه کم‌لیگی سبب اوتگن هفته‌ده اوشبو مملکت‌ده نیازمندلر گه یاردم بیریش میزانینی کمه‌یتیرگنلر.
بیزلرنینگ فیسبوک صحیفه‌میزگه باش اورینگ!
افغانستان ده خلق‌ارا آزیق-آوقات دستوری سوزلاوچیسی وحید‌الله امانی نینگ سلام‌وطندار گه ایتیشیچه: «بودجه کم‌لیگی حاضر ایسه دنیا‌ده آزیق-آوقات برنامه‌سی نینگ قوتقریش عملیاتینی تهدید قیله‌دی. انه شوو سبب خلق‌ارا آزیق-آوقات دستوری هر بیر عایله گه ترقه‌تیله‌دیگن آزیق-آوقات مقدارینی کمه‌یتیرگن. خلق‌ارا آزیق-آوقات دستوری کیله‌سی آلتی آی ده نیازمندلر گه یاردم بیریش اوچون ۹۱۸ میلیون دالر گه نیازمند دیر.»
اقتصاد وزیرلیگی، قویاش ۱۳۹۵_ییل ده‌گی سوراو نتیجه‌لری گه نسبتن حاضر مملکت بویلب قشاق‌لر سانی کوپه‌یشینی تصدیقله‌یدی.
اقتصاد وزیرلیگی سوزلاوچیسی عبدالرحمان حبیب نینگ سلام‌وطندار گه ایتیشیچه: «مالی و بانکی تیزیم‌لر گه یره‌تیلگن چیکلاو‌لر، افغانستان سرمایه‌سی موزله‌تیلیشی، اقتصادی آستقورمه‌لر یوق‌لیگی و اقلیم اوزگریشی مملکت بویلب قشاق‌لر میزانی کوپه‌یش عامل‌لریدن دیر.»
شونده‌ی بیرحالده، افغانستان حاضر ایسه هوا اوزگریشی نتیجه‌سیده، قورغاقچیلیک، چیگیرتکه‌لر هجومی و طبیعی واقعه‌لر بیلن روپه‌ره بولگن که، انه‌شوو سبب ۲۰ مینگ جریب ایکینیچ‌لیک ییرلر ویران بولگن.
شو بیلن بیرگه، ایکینچی‌لردن قطاری نینگ ایتیش‌لریچه، بو ییل سوو تاشقین‌لری گه علاوه، چیگیرتکه‌لر هجومی هم اولر نینگ ایکین‌لرینی یوق ایتگن شونی اوچون مملکت‌ده قشاق‌لر سانی کوپه‌یگن.
بیزلرنینگ توییترده هم تعقیب قیلینگ!
چیگیرتکه‌لر هجومی عاقبتیده ایکینچیلیک محصولاتی یوق بولگن سمنگان ولایتی حضرت سلطان تومنی یشاوچیسی عبدالخالق نینگ ایتیشیچه: «منطقه‌میزده‌گی برچه اهالی نینگ محصولی اورته‌دن کیتدی. دولت‌دن یاردم بیریشنی ایسته‌یمیز. هیچ نرسه قالمه‌دی و برچه محصولی‌میزنی چیگیرتکه‌لر اورته‌دن کیتگزدی.»
ایتیش کیره‌ک که، اوتگن ییل مملکت‌ده طبیعی واقعه‌لر نتیجه‌سیده، تورلی‌خیل بولیم‌لر اینیقسه ایکینچیلیک بولیمی گه ایکی میلیارد دالر‌دن آرتیق زیان ییتیشتیرگن.
