دنیا بویلب سگرت و الکترونیکی تماکی واسطهلریدن فایدهلنیش حلی هم جوده یوقاری درجهده اېکنلیگی معلوم بولدی.
جهان ساغلیقنی سقلش تشکیلاتی (JSST) نینگ ینگی حساباتیگه کوره، سیارهده ۱۰۰ میلیوندن آرتیق آدم جملهدن ۱۵ میلیون اوسمیر سگرت چیکیشی انیقلنگن.
حسابات گه قید ایتیلیشیچه، ۱۳-۱۵ یاش آرهلیغیدهگی اوسمیرلر آرهسیده الکترونیکی سگرت و ویپدن فایدهلنووچیلر سانی تخمیناً ۱۵ میلیون نفر گه یېتگن. بو رقملر آته-آنهلر تعلیم موسسهلری اوچون جدی خواطر اویغاتماقده، چونکی نیکوتین استعمالی کوپینچه یاشلیکده باشلنهدی و کېینگی حیاتده تولیق قرهملیکه آلیب کیلیشی ممکن.
شونینگدیک، ۱۵ یاش و اوندن کتتهلرنینگ کمیده ۸۶ میلیونی الکترونکی سگرت چیکیشی معلوم قیلینگن. بو کتتهلر اهالیسینینگ ۱.۹ فایزینی تشکیل اېتهدی – ایرککلر آرهسیده بو کورستکیچ ۲.۳ فایز، عیاللر آرهسیده اېسه ۱.۵ فایز.
جهان ساغلیقنی سقلش تشکیلاتینینگ یوقومسیز کسللیکلر، ناگرانلیک و زورهوانلیکنینگ آلدینی آلیش دیپارتمنتی مدیری ایتین کروگنینگ تأکیدلشیچه، الکترونیکی سگرتلر «نیکوتینگه قرهملیکنینگ ینگی تولقینینی کیلتیریب چیقرماقده.» اونینگ سۉزلریگه کوره، الکترونیکی سگرت چیکیشینینگ «ضررسیز اورنی» صفتیده ریکلمه قیلینسهده، اصلیده اولر بالهلرنی ایرته یاشدن نیکوتین بیلن تنیشتیریب، ساغلام اولادنی خوف آستیگه قویماقده.
کروگ تأکیدلهگنیدیک، بو جریان دنیا بویلب ساغلام تورموش طرزینی ترغیب ایتیش یولیدهگی کوپ ییللیک اصلاحاتلر گه تهدید سالماقده. «الکترونیکی سگرت و ویپلر جمعیتده تماکی استعمالینی کمهیتیریش اېمس، بلکه اونینگ ینگی شکلینی یرهتیب قویدی» دیېدی، او.
جهان ساغلیقنی سقلش تشکیلاتی معلوماتلری گه کوره، ۲۰۰۰ ییلده دنیا بویلب ۱.۳۸ میلیارد کیشی تماکی استعمال قیلگن بولسه، میلادی ۲۰۲۴-ییلده بو رقم ۱.۲ میلیاردگچه کمهیگن. یعنی سۉنگی ۲۰ ییلده چیکیش ۱۲۰ میلیون کیشیگه یا کی ۲۷ فایز گه قیسقرگن.
عیاللر آرهسیده سگرت چیکیش اولوشی میلادی ۲۰۱۰ ییلدهگی ۱۱ فایزدن ۲۰۲۴-ییلده ۶.۶ فایز گه توشگن. ایرککلر آرهسیده اېسه بو کورستکیچ ۴۱.۴ فایزدن ۳۲.۵ فایز گه کمهیگن. بو پسهیشگه قرهمسدن، دنیادهگی هر بیشینچی کتته یاشلی آدم هنوز سگرت چیکیشنی دوام اېتماقده.
جهان ساغلیقنی سقلش تشکیلاتی حساباتی میلادی ۲۰۱۴-۲۰۲۴-ییللر آرهلیغیده دنیا اهالیسینینگ ۷۵ فایزینی قمرهب آلگن ۸۵ مملکت معلوماتلریگه اساسلنگن. شو بیلن بیرگه، ۶۲ مملکت هنوز بالهلر اورتهسیده سگرت استعمالیگه قرشی انیق چارهلر کورمهگن، ۷۴ مملکتده اېسه چیکیووچی محصولاتلرنی ساتیب آلیش اوچون بیلگیلنگن مینیمل یاش چېگرهسی یوق.
متخصصلر فکریچه، بو حالت جهان مقیاسیده نیکوتین گه باغلیکلیکنی ېنهده کوچهیتیرهدی. بیراق جهان ساغلیقنی سقلش تشکیلاتینینگ عمومی خلاصهسی خوشبین – جهانده تماکی استعمالی سیکین-استه کمهیب بارماقده. تشکیلات مملکتلرنی بالهلر ساغلیغینی حمایه قیلیش، ریکلامه و سودا گه چېکلاولر قوییش همده آلدینی آلیش دستورلرنی کوچهیتیریش گه چقیرماقده.
شوندهی قیلیب، رقملر شونی کورستهدی کی، انسانیت نیکوتین گه قرشی کورهشده معلوم نتیجهلر گه ایریشگن بولسهده، بو کورهش حلی یکونلنمهگنی یوق. نیکوتین گه باغلیقلیک ۲۱-عصرنینگ اېنگ کتته ساغلاملیک سیناولریدن بیری بولیب قالماقده.
