اسرائیل اردوسی لبنان جنوبیده عسکرلرینینگ اولیب و یرهلنگنیگه جواب، بو مملکتنینگ بیر قطار بولیملریگه هجوملرینی باشلهب و اونینگ نتیجهسیده بیر کیشی اولیب و باشقه ۱۲ کیشی یرهلنگن.
الجزیرهنینگ بوگون (۱۵-اسد/۶-اگست، پنجشنبه)، لبنان ساغلیقنی سقلش وزیرلیگیدن نقل قیلیب گزارش بیریشیچه، اسرائیل هوا هجومی لبنان جنوبیده جایلشگن تبنین شهرچهسینی نشانگه آلگن.
اسرائیل اردوسینینگ عرب تیلیده سوزلشهدیگن سوزلاوچیسی الا واویه، ینه بیر مرته المنصوری یشاوچیلریگه جبری شکلده باشقه جایگه چیقیش بویروغینی بیریب و اولردن کوپینچه هجوم اویوشتیریلیشیدن آلدین شمال تامان حرکت قیلیشلرینی سورهگن.
لبنان ساغلیقنی سقلش وزیرلیگینینگ معلوماتی اساسیده، ۲-مارچ دن حاضرگچه اسرائیلنینگ اویوشتیرگن هجوملریده تورت مینگ ۳۳۳ کیشی اولیب و ۱۲ مینگ ۲۵۰ کیشی یرهلنگن.
لبنان جنوبی دهگی توقنشوولر، ایتالیا پایتختی رم ده لبنان و اسرائیل مذاکرهلری دوامی بیلن بیرگه، دوام قیلماقده.
اوشبو مذاکرهلر جون آییده امریکا حمایتی بیلن کیلیشیلگن دایره اساسیده آلیب باریلماقده. مذکور کیلیشوو اساسیده، اسرائیل و لبنان حزباللهنینگ قورالسیزلشتیریلیشی، لبنان جنوبیدن اسرائیل اردوسینینگ باسقیچمه-باسقیچ چیقیشی و «پایلوت منطقهلری» گه موسوم سیناو منطقهلرده لبنان اردوسینینگ جایلشیگه متعهد بولگن.
حزبالله نیچه مرته اسرائیل بیلن توغری مذاکرهلرنی رد قیلیب و قوراللرینی تاپشیریشنی هم قبول قیلمهگن.
