اسرائیل باش وزیری بنیامین نتانیاهو ادارهسی، تورکیه عدلیه وزیرلیگینینگ نتانیاهو اینترپلنینگ «قیزیل بیلدیریشنامهسی» آرقهلی خلقارا قیدیروگه بیریش حقیدهگی طلبی گه مناسبت بیلدیریب، بو مملکتنی ایکی یوزلمچیلیکده عیبلهگن.
ییتکرمهلرنینگ معلوماتیگه کوره، اسرائیل بو طلبنی رجب طیب اردوغاننینگ اوشبو مملکت رهبریتی و عسکرلرینی قورقیتیشگه قرهتیلگن «اچینرلی اورینیشی» دیب اتهگن.
نتانیاهو ادارهسی بیاناتیده، اسرائیل تورکیهنینگ ایکی یوزلمچیلیگیدن اوزاق وقتدن بیری حیرتده. اردوغان کُردلرنی قیرگن، حماس ترورچیلریگه باشپنه بیرگن و اوز خلقی گه ظلم اوتکزگن دیکتاتور دییلگن.
شونینگدیک، اسرائیل تامانی اردوغان اوزینینگ اسرائيل گه قرشی تجاوزینی سوریه گه هم یاییشگه اینتیلهیاتگنینی قید ایتیب، بو مملکت منطقهدهگی برقرارلیکنی بوزیشگه قرهتیلگن هر قندهی اورینیش و امنیت تهدیدیگه قرشی قطعی چارهلر کوریشده دوام ایتیشینی بیلدیرگن.
ایسلهتیب اوتهمیز، اولراق تورکیه عدلیه وزیرلیگی بنیامین نتانیاهو گه نسبتن اینترپل آرقهلی «قیزیل بیلدیریشنامه» چیقریشینی سورهگندی. تورکیه بو طلبنی غزه گه یول آلگن «جهان صمود کیمهلری» گه قرشی عملیات یوزهسیدن آچیلگن ایش دایرهسیده ایلگری سورگن. تورکیه نتانیاهونی نسل کشلیک، انسانیت گه قرشی جنایتلر و قییناقلرده عیبلهماقده.
