کانگو ده بیرلشگن ملتلر تشکیلاتی تینچلیکنی سقلش ماموریتینینگ اعلام قیلیشیچه، بیرلشگن دموکراتیک کوچلر گروهیگه تیگیشلی عصیانچیلر آرقهلی، اوتگن بیر هفتهده کانگو دموکراتیک جمهوریتی شرقیده عملگه آشیریلگن بیر قطار هجوملرده، کمیده ۸۹ تینچ اهالی هلاک بولگن.
«انبیسی» خبری ترماغینینگ بوگون (۱-قوس، شنبه)، گزارش بیریشیچه، اوشبو گروه اینگ ینگی موردده بیر کسلخانه گه هجوم قیلیب و بو کسلخانهنینگ توغروق بولیمیده ۱۱ عیال شامل کمیده ۱۷ کیشینی اولدیرگنلر.
بیرلشگن ملتلر تشکیلاتی تینچلیکنی سقلش ماموریتیگه کوره، مذکور هجوملر ۱۳ دن ۱۹-نوامبر آرهسیده، کانگو شمالیده جایلشگن کیوو ولایتیده عملگه آشیریلگن.
کانگونینگ شرقی منطقهسی، سونگی آیلرده قوراللی گروهلر جملهدن M23 گروهی و بیرلشگن دموکراتیک کوچلرینینگ عصیانچیلری آرقهلی هجوملر کوچهیشیگه گواه بولگن.
بیرلشگن دموکراتیک کوچلری (ADF)، ۱۹۹۰-ییلنینگ سونگی دههلریده اوگاندا دهگی ناراض قوراللی گروهلر توپلهمیدن شکللهنیب و ۲۰۰۲-ییلده اوگاندا اردوسینینگ حربی عملیاتیدن کیین، کانگو توپراغیگه انتقال تاپگن.
گزارشلر اساسیده، بیرلشگن دموکراتیک کوچلری داعش گه بیعت قیلیب و اونینگ حمایتی آستیده کانگو ده تینچاهالیگه قرشی هجوملریگه دوام بیرماقده.
