خلقارا طلبهلر کونی بیلن بیرگه، قریب اوچ ییلدن بیری بیلیم یورت ایشیکلری اولر اوچون یاپیق قالگن، اوقیشدن محروم بولگن قیزلر ېنه بیر بار بیلیم یورتلرنینگ قیته آچیلیشینی طلب قیلماقدهلر. قیز طلبهلر بیلن بیرقطارده، بیر قنچه اوغیل طلبهلر هم قیزلرنینگ تعلیمنی دوام اېتیریشی مملکتنینگ علمی و اجتماعی کېلهجگی اوچون ضرور اېکنینی تأکیدلهیدیلر.
کابللیک مارینا هاشمی، کابل بیلیم یورتیده تورک تیلی و ادبیات بولیمی طلبهسی، تیزیم اۉزگریشی طفیلی بیلیم یورتنینگ تورتینچی سمسترینی توگته آلمهگنینی ایتهدی. اونینگ سۉزلریگه کوره، اوقوو مقصدلریگه ایریشه آلمسلیک اونی روحی معمالر و توشکونلیککه دچار قیلگن.
اما شونگه قرهمی، او بیلیم یورت ایشیکلری اسلامی قاعدهلر و تعلیمی میزانلر گه عمل قیلگن حالده، ېنه قیزلر یوزیگه آچیلیشیگه امید بیلدیرهدی.
او شوندهی دیېدی: «بیلیم یورتلر آچیلسین؛ سیزلرنینگ هر قندهی قانونلرینگیز گه عمل قیلهمیز و حاضرگچه عمل قیلگنیمیزدهی اما التماس قاعدهلر سببلی بیلیم یورتلرنی یاپیب قویمنگ، بیز اوقیش گه دوام بیریش اوچون آچینگیزلر.»
شونینگدیک، پروانلیک زینت، قابلهلیک تورتینچی سمستر طلبهسی بیلیم یورتلر ایشیگی یاپیلگچ تعلیمدن محروم قالگنینی ایتهدی، اونینگ سۉزلریگه کوره، مقصدلریدن اوزاقلشیش و ایچکی بوشلیق حسی اونی بیزاوته قیلماقده.
او هم، بیر کون آنهلر و چقهلاقلر اولیمینی کمهیتیریش بارهسیدهگی آرزوسینی عملگه آشیریش امکانیگه ایگه بولیشیگه امید قیلهدی.
او شوندهی دیېدی: «اگر عیاللر اوقی آلمسه، جمعیتنینگ باشقه ساحهلری هم ضرر کورهدی، بیراق اینیقسه آنهلر اولیمی مهم دیر. بیز گه عیال شفاکارلر کېرهک – کیم اولرنی اولیمدن قوتقرهدی؟ چقهلاقلر و آنهلر اولیم درجهسی آشهدی. کمیده آنهلر حیاتینی سقلش مقصدیده مسئول شخصلر اعتبار قرهتیشی لازم.»
بیلیم یورتلرنینگ آچیلیشی فقط اوقیشدن محروم بولگن قیزلرنینگ طلبی اېمس؛ بلکی بیر قطار اوغیل طلبهلر هم تعلیمدهگی معمالر، یېترلی امکانیتلرنینگ یوقلیگی و ایش بیلن باغلیق خواطرلر گه قرهمی، قیزلرنینگ بیلیم یورت گه قیتیشی جمعیت اوچون ضرور و فایدهلی دیب حسابلهیدیلر.
اولرنینگ ایتیشیچه، عیاللرنی تعلیم تیزیمیدن چیقریب تشلش نهفقط مملکتنینگ علمی رواجلنیشیگه ضرر یېتکزهدی، بلکی اجتماعی و اقتصادی توزیلمهلر گه هم سلبی تأثیر کورستهدی.
کمپیوتر ساینس بولیمی طلبهسی میلاد فرهمند، تخنیک کدرلرنینگ یېتیشمسلیگی، ایش و اقتصادی قیینچیلیکلر گه اشاره قیلیب ایتیشیچه، عیاللرنینگ تعلیمنی دوام ایتیریشی عایلهنینگ برقرارلیگی و کېلهجک اولاد تربیهسیده مهم رول اوینهشینی ایتهدی.
اونگه کوره: «ایش امکانیتلری یوق، اقتصادی معمالر و ملَکهلی علمی کدرلرنینگ یېتیشمسلیگی معما توغدیرماقده و عینن شو معما برچه طلبهلر دوچ کېلهیاتگن مسئله دیر. عیاللر و قیزلر تعلیم آلیشی جوده قدرلی دیر. بو جمعیت رواجیگه یاردم بیرهدی، چونکی بیز هر دایم ایتگنمیز؛ بیر ایرکک اوقیسه، اوزی اۉزگرهدی، بیراق بیر عیال اوقیسه بیر عایله اۉزگرهدی.»
طلبهلردن باشقه بیری سهیل شیرزاد، قیزلرنینگ تعلیم اهمیتی گه تأکیدلب، اسلام قاعدهلری انابت گه آلینیب بیلیم یورتلر ایشیگی قیزلر یوزیگه آچیلیشینی سورهیدی. اونینگ ایتیشیچه: «بیزنینگ مسئول شخصلردن، حکومت رهبرلری و تعلیم ادارهلردن التماسیمیز شو کی، قیزلر اوقیشی اوچون اسلامی و شریعت گه موافق محیط یرهتسینلر، شونده اولر اۉز تعلیم و اوقیشلرینی دوام ایتره آلیشهدی.
باشقه تاماندن، تعلیم ساحهسیده بیلرمانلردن بعضیلری، بیلیمنینگ اهمیتی و قیزلرنینگ علمی همده متخصص کدرلر ترکیبیدهگی رولیگه اعتبار قرهتیب، بیلیم یورتلرنینگ یاپیق قالیشینی کتته بوشلیق دیب حسابلهیدیلر.
تعلیم بوییچه بیلرمان جمالالدین سلیمانی گه کوره، قیزلرنینگ تعلیمدن محروم قالیشی اجتماعی قرهملیکلرنی آشیرهدی. او تعلیم اهمیتی و بیلیم یورتلر آچیلیشی ضرور دیېدی: «اگر بو وضعیت دوام اېتسه، کېلهجکده مملکت آرقهده قالهدی، تعلیمدن اوزاقلشهدی و باشقه مملکتلر گه قرهم بولیب قالهدی؛ وضعیت دوام اېتسه تورلی روحی و اجتماعی تأثیرلر یوزه گه کېلهدی.»
بیلیم یورت استادی عبدالحنان قیلیچ ارسلان اېسه قیز طلبهلر یوقلیگینی مملکتنینگ علمی و اجتماعی پایدیواری اوچون ضررلی دیب حسابلهیدی.
او شوندهی دیېدی: «طلبهلرنینگ مملکت کېلهجگینی قوریشده رولی مهم دیر، چونکی بیلیم و طلبهسیز بولمهگن جایده هېچ بیر مملکت جمعیت یا کی ملت برقرار بوله آلمهیدی. طلبهلرنینگ محنتی اساسیده مملکت رواجلنهدی و گللب-یشنهیدی. اگر طلبه اوقیشنی دوام ایتیره آلمسه، بو نهفقط شخص و عایله گه بلکی جمعیت، ملت و مملکتدهگی اجتماعی، روحی و اقتصادی جهتدن سلبی تأثیر کورستهدی.»
خلقارا طلبهلر کونی میلادی ۱۹۴۱-ییلده لندن خلقارا طلبهلر کینگشی تامانیدن بیلگیلنگن. بو کون مملکتده نشانلنهیاتگن بیر پیتده، قیزلر اوچون بیلیم یورت ایشیکلری یاپیق قالگنیگه قریب اوچ ییل بولدی.
