کوز فصلی ییتیب کیلیشی و قطر پایتختی دوحه شهریده افغانستانلیکلرارا سوزلشوولر باشلگنیدن بویان، طالبان گروهی مملکت نینگ بیر قطار ولایت‌لریده اوروش نی شدت‌لنتیرگن.
هرات ولایتی کینگش باشلیغی نینگ اورین‌باسری توریالی طاهری گه کوره، طالبان گروهی اوچ کوندن بویان هرات ولایتی نینگ ۴۰ کیلومترلیگیده قرار تاپگن، کروخ تومنی مرکزی اوستیگه هجوم اویوشتیرماقده.
هرات ولایتی حاکمی نینگ سوزلاوچیسی جیلانی فرهاد، طالبان گروهی کرخ و پشتون زرغون تومنی اوستیگه هجوم قیلگنی نی تصدیقله‌یدی، لیکن امنیتی کوچلر تامانیدن طالبان هجومی نینگ آلدی آلینگنیدن خبر بیرگن.
اوتگن کونی طالبان گروهی تخار ولایتی نینگ خواجه بهاوالدین و دشت قلعه تومن‌لری اوستیگه هجوم قیلیب، امنیتی کوچلردن ۳ ته سینی اولدیرگن ایدی.
عین حالده، طالبان گروهی اوتگن کیچه جوزجان ولایتی فیض‌آباد تومنی نینگ تپه‌زیارت پوسته اوستیگه هجوم قیلیب، ۳ پولیس و مردمی کوچلردن ۱ ته سینی اولدیرگن.
جوزجان ولایتی نینگ ولایت کینگش اعضاسی شیر محمد نور، مرکزی و محلی حکومت مسئوللری، فیض‌آباد تومنی نینگ امنیت نی تامین قیلیشده ناکام بولگنی نی ایتگن.
باشقه بیر تاماندن هم فاریاب ولایتی نینگ امنیتی مسووللری، هوایی کوچلر هجومی نتیجه‌سیده طالبان گروهیدن ۹ ته سی اولیب و ۱۲ ته سی یره‌لنگنی نی ایتگنلر.
کندز ولایتی هم طالبان گروهی نینگ هجومیدن امان قالگن ایمس.
جمعه کونی طالبان گروهی کندز ولایتی علی‌آباد تومنی اوستیگه نیچه تاماندن هجوم اویوشتیرگن کیم نتیجه‌ده، بیر پولیس پوسته‌سی اولرنینگ نظارتی گه اوتگن.
کندز ولایتی علی‌آباد تومن پولیس قومندانی طالبان گروهی هجومی خصوصیده سلام‌وطندار گه ایتیشیچه، امنیتی کوچلر و طالبان گروهی آره‌سیده یوزبیرگن آتیشمه‌ده، امنیتی کوچلر ۶ ته‌سی هلاک و باشقه ۸ ته‌سی یره‌لنگن. شونینگدیک امنیتی کوچلردن ۶ ته‌سی طالبان قولیگه اسیر بولگن.
طالبان گروهی نینگ هجومی خصوصیده افغانستان ملی مدافعه وزیرلیگی نینگ فکرینی آلیش اوچون موفق بولمه‌دیک.
کوز فصلی ییتیب کیلیشی و قطر پایتختی دوحه شهریده افغانستانلیکلرارا سوزلشوولر باشلگنیدن بویان، طالبان گروهی نینگ هجومی پروان، پکتیا، فاریاب، نیمروز، غور، هلمند و کندهار ولایت‌لریده کوپه‌یگن.
عین حالده امریکا نینگ افغانستانده‌گی ایلچیسی راس ویلسن، طالبان گروهیدن هلمند ولایتیده‌گی هجوم لری نینگ توخته‌تیش‌لرینی سوره‌گن.