حماس جنبشینینگ اعلام قیلیشیچه، غزه ده آتیش کیسین اوچون امریکا جمهور باشلیغی دونالد ترامپ ریجهسینینگ اَیریم بولیملری بیلن کیلیشگن؛ لیکن بو ریجهنینگ بیر قطار بولیملری ینه کوپراق مذاکره بولیشگه نیازی بار.
الجزیره خبری ترماغینینگ بوگون (۱۲-میزان، شنبه)، گزارش بیریشیچه، حماس اوتگن کون ترامپنینگ ۲۰ مادهلیک ریجهسیگه اوز جوابینی تاپشیرگن.
مذکور ریجه عاجل آتیش کیسین، فلسطینلیک محبوسلر بیلن اسرائیللیک گروگه آلینگنلر المشتیریلیشی، خلقارا نظارت آستیده انتقالی دولت شکللنیشی و حماسنینگ بوتولی قورالسیزلنتیریشدن عبارت دیر.
حماسنینگ جوابیده کیلیشیچه، مذکور جنبش ترامپ ریجهسی اساسیده گروگه آلینگن اسرائیللیکلردن برچهسی –تیریک یا-ده جسدلر- المشتیریلیشیگه تیار بولیب و تفصیلاتلرنینگ کوریب چیقیش اوچون واسطهچیلر آرقهلی مذاکرهلرگه کیریشی ممکن.
شونینگدیک حماس، نوار غزهنی عرب و اسلام مملکتلری قوللب-قوتله یاتگن مستقل تکنوکراتلردن تشکیل تاپگن فلسطینلیک ادارهگه تاپشیریشگه تیارلیگینی اعلام قیلگن.
دونالد ترامپ حماس جوابینی قولگه کیلتیریشدن کیین اوز اجتماعی ترماغیده، بو گروهنینگ برقرار صلحگه تیارلیگینی یازیب و اسرائیلدن غزهنینگ بمباردمان قیلمسلیگینی ایستهگن. شونینگدیک قطر و مصر، حماسنینگ جوابیدن قدردانلیک قیلیب و اورغولشیچه، مذاکرهلر اوچون سعیوحرکتلرنینگ دوام قیلیشی ممکن.
اوشبو اوزگریشلر، غزه گه اسرائیل هجوملری دوام قیله یاتگنی بیرحالده، یوز بیرگن. فلسطین ساغلیقنی سقلش وزیرلیگینینگ اعلام قیلیشیچه، ۲۰۲۳-ییل اکتبر آییدن حاضرگچه، غزه گه اسرائیلنینگ اویوشتیرگن هجوملریده ۶۶ مینگدن آرتیق کیشی قربان بولگن.
