قیش فصلی عرفهسیده، بلخ یشاوچیلریدن بعضیلری اوشبو ولایتده یاقیلغی مادهلر قیمتلیگی و ساتیب آلیشگه قوربلری یېتمسلیگینی ایتهدیلر. اولر گه کوره، بازارلرده بیر سیر یاغاچ و تاش کومیر قیمتی ۱۰ دن ۲۰ افغانی آشگن.
مزارشریف یشاوچیسی احمدصفا، باغلیق نهادلردن نرخ-نوالرنی کنترول قیلیشینی سورهیدی.
او شوندهی دیېدی: «یاغاچ و تاش کومیر قیمت بولگن. هر سیری ۱۰ دن ۲۰ افغانی فرق قیلگن. ساتیب آلیشگه قوربیمیز یېتمهیدی. آلدین ۶۰ سیر تاش کومیر ساتیب آلردیک، بیراق ایندی ۱۰ سیردن آرتیق آلالمهیمیز. دولت دقت قیلسین، چونکه ایش هم یوق.»
مزارشریف یشاوچیلریدن بولمیش جمالالدین، نرخ-نوالر آشیشی بارهسیده شوندهی دیېدی: «نرخلر اوتگن ییللر گه نسبتن کوپ فرق قیلکن، بیراق یشاوچیلرنینگ ساتیب آلیش گه قوربی یېتمهیدی. اقتصادی قیینچیلیک بار، ایش یوق.»
یاقیلغی ماده ساتوچیسی محمدفیروز، تاش کومیر سالیغی یوقاریلیگی و یاغاچ آزلیگینی، قیمتلر آشیشی گه سلبی تأثیر قویگنینی ایتهدی.
اونینگ ایتیشیچه: «بو ییل قیشلاقلرده یاغاچ آز، چونکه سوو یوق اېدی. اوتگن ییل توتنینگ بیر خروار یاغاچینی ۱۵۰۰ افغانی ساتیب آلردیک، بیراق بو ییل ۲۵۰۰ افغانی ساتیب آلهمیز. اونی میدهلش، دکان اجارهسی و اونی آلیب کیلیش قۉشیمچه قیلینهدی و نهایی قیمتنی آشیرهدی. قیمت ساتیش گه مجبور میز.»
ساتوچیلردن باشقه بیری یوسف هم شوندهی دیېدی: «بلدیه هر سیر اوچون ۵۵ افغانی نرخنامه بیلگیلهگن، بیراق اۉزیمیز گه ۶۲ افغانی توشهدی. دولت تاش کومیر سالیغینی کمهیتیریشی کېرهک. بیر تُن تاش کومیر سالیغی حاضر ۱۶۰۰ افغانی دیر – آلدین ۱۰۰۰ افغانی اېدی. نرخلر عمومی مارکیتده کنترول بولیشی درکار.»
شو بیلن بیرگه، مزارشریف بلدیهسی مسئوللری، بازارنی کنترول قیلیش اوچون دولت نهادلریدن عبارت بیر کمیسیون تشکیل قیلینگنینی ایتهدیلر.
بلدیه سۉزلاوچیسی مصطفا محمدی شوندهی دیېدی: «بلخده انیق کمیسیون بار- دولت نهادلری مسئوللریدن عبارت. اولر شهرنی نظارت و کنترول قیلیشهدی. نرخ-نوالر کنترول بولیشی اوچون سعی-حرکت قیلهمیز و بو ایش اوچون هردایم نرخنامه ترقهتیلهدی.»
برق تقچیلیگی، عایلهلرنینگ درآمدی یېتمسلیگی، کیتمه-کیت قورغاقچیلیک و یشاوچیلرنینگ عنعنهوی یاقیلغی مادهلر گه قرهملیگی، هر ییلی یاقیلغی ماده بازاری گه باسیمنی آشیریب و قیمتلر آشیشیگه آلیب کیلهدی.
