هر تانگ، قیشلاقده باریب-کیلیش باشلنیشیدن آلدین، غور ولایتینینگ الفاروق تومنی یشاوچیسی ۳۱ یاشلی گلمبوی، کیچیک دکانینینگ ایشیگینی آچهدی. او، دکانیدهگی کیچیک قفسهلر گه تیریب قوییلگن عیاللر اوچون ضرور بویوملرنی ترتیب گه سالیب و خریدارلرنی کوتهدی.
گلمبوی، اوشبو دکانیده عیاللر و بالهلر اوچون تورلی خیل کییم-کیچک و متاعلر، آزیق-آوقت محصولاتلری، آشخانه جهازلری، بالهلر اویینچاقلری همده عیاللر اوچون ضرور بولگن باشقه بویوملرنی ساتیشینی ایتهدی. او شوندهی دییدی: «دکانیمده آشخانه بویوملری، بالهلر کییملری، آزیق-آوقت محصولاتلری – چای، صابون، شیرینلیک، گوگرد، لوبیا، گوروچ، پمیدار، گور، توز و باشقه برچه عیاللر اوچون ضرور بویوملر بار.»
اونینگ ایتیشیچه، بو دکاننی آچیشدن آلدین او کوپلب اقتصادی معمالر گه دوچ کیلگن. بیراق «رفاه اسلامی» تشکیلاتینینگ یاردمی بیلن کیچیک تجارتنی باشلش گه موفق بولگن و شو آرقهلی عایلهسینینگ اقتصادی احوالینی یخشیلشگه حصه قوشگن. اونگه کوره: «رفاه اسلامی تشکیلاتی مینگه یاردم بیردی. اولر بیلیشردی کی باشیده مینده هیچ نرسه یوق ایدی. حاضر ایسه دکان احوالی یخشی بولگن. اول محصولاتلریم کم ایدی، حاضر ایسه جوده کوپ توردهگی محصولاتلر آلیب کیلگن من. آدملر کوپ کیلیب منتدارچیلیک بیلدیرهدیلر و میندن خرید قیلهدیلر. ایشلریم یخشی کیتماقده. محصولاتلریم توگب قالسه ینه ینگی توار آلیب کیلهمن. تشکیلات مینگه ۵۳ مینگ افغانی مقداریده یاردم بیرگن.»
گلمبوینینگ ایتیشیچه، او دکانیدهگی محصولاتلرنی نقد پول گه ساتیشدن تشقری، بوغدای، کرک، قاره کول تیریسی، جون و قروت عوضی گه هم ساتهدی. شو سببلی اونینگ دکانی محلی محصولاتلرنی آلیب-ساتیش جای گه هم ایلنگن.
هر کونی، بو یول آرقهلی بیرمینگ ۵۰۰ دن ایکی مینگ ۵۰۰ افغانی درآمد قیلیشینی قوشیمچه قیلهدی. گلمبوی. او شوندهی دییدی: «اوزیم جوده خورسند من، شونچه فایده کورگنیمدن ممنون من. بیز گه یاردم بیریب، خذمت قیلگهنینگیز اوچون رحمت. اوللری بیزنینگ ایشیمیز و درآمدیمیز یوق ایدی، حاضر ایسه حیاتیمیز تاباره یخشیلنیب رواجلنیب بارماقده.»
بو عیال، محلی مسئوللر و تشکیلاتلردن عیاللرنی اقتصادی جهتدن قوللب-قوتلشنی سورهیدی. شونده اولر درآمد تاپیب، عایلهلرینینگ احتیاجلرینی تأمینلشده ثمرهلی رول اوینهی آلهدیلر.
غور ولایتی عیاللر صناعت و سودا اتاقی مسئوللری هم، تورلی تشکیلاتلرنینگ عیاللرنی کیچیک اقتصادی فعالیتلرینی قوللب-قوتلشی اولرنینگ اقتصادی امکانیتلرینی کینگهیتیریش و اوزینی اوزی تأمینلشگه زمینه یرهتیشی ممکنلیگینی ایتهدیلر.
غور ولایتی عیاللر صناعت و سودا اتاقی باشلیغی اورانوس عارفی شوندهی دییدی: «بیز دولت و نادولت تشکیلاتلردن شونی سورهیمیز کی، تدبیرکار عیاللر اوچون کوپراق دستورلر و امکانیتلر یرهتیشگه حرکت قیلسینلر. شونده عیاللر ایشلب چیقرهیاتگن محصولاتلرینی، شونینگدیک، اوزلریدهگی کونیکمه و ایجادکارلیکنی ینهده رواجلنتیریب، فعالیتلرینی کینگهیتیره آلهدیلر.»
غور عیاللر سودا و صناعت اتاقی مسئوللری، گلمبوینینگ دکاندارچیلیک فعالیتینی اوشبو ولایتنینگ شهر و قیشلاقلریده سودا-ساتیق بیلن شغللنیب، اوز تجارتینی رواجلنتیرهیاتگن عیاللرنینگ اونلب معمالریدن بیری دیب حسابلهیدی.
مسئوللرنینگ ایتیشیچه، حاضرده غور ولایتیده تورلی سودا ساحهلریده ۳۰۰ نفردن آرتیق عیال فعالیت یوریتماقده. اولرنینگ ۲۵ نفری غور ولایتی سودا و صناعت اتاقیدن رسمی فعالیت یوریتیش اوچون جواز آلگن.
گلمبوینینگ حکایهسی شونی کورستهدی کی، کیچیک بیر امکانیت هم محنت و قطعیت بیلن بیرگهلیکده بوتون بیر عایلهنینگ حیاتیده کتته اوزگریشلر گه سبب بولیشی ممکن.
