کنر معارف ریاستیده مسئوللرنینگ ایتیشلریچه، اوشبو ولایت چوکی (څوکی) تومنیده تعلیم جریانی سونگی زلزلهدن کیین قیته عادی وضعیتگه اَیلهنیب و بو تومندهگی بوزیلگن مکتبلرنینگ قیته قوریلیشی اوچون سعیوحرکتنینگ دوامی بار.
مسئوللرگه کوره، جاری ییل ۹-سنبلهده یوز بیرگن زلزله، معارف بولیمیگه هم آغیر زیانلرنی ییتیشتیرگن که اونینگ نتیجهسیده، ۳۰۰ دن آرتیق اوقووچی و اوقیتووچی اولیب و یرهلنگن.
کنر معارف ریاستینینگ مالی و اداری آمری عزیزالرحمان پیوستون، اوشبو ولایتده یوز بیرگن زلزله زیانلری توغریسیده ایتیشیچه: «سونگی زلزلهده ۳۸ اوغیل و ۳۵ قیز اوقووچی شهید، ۸۱ اوغیل و ۸۰ قیز اوقووچی یرهلندی. شونینگدیک بیر سرمعلم و ۱۲ اوقیتووچی و معارف خادملری زیان کورگن.»
پیوستونگه کوره، چوکی تومنیده ۲۵ مکتبگه زیان ییتیشگن که اولردن ۸ تهسی بوتونلی و ۱۷ تهسی ایسه قسمی شکلده بوزیلگن. شونینگدیک ۱۵ ته دینی مدرسه هم ویران بولگن.
تعلیک دوامی اوچون وقتینچهلیک صنفلر یرهتیلیشی
تعلیم جریانی توختهتیلیشی آلدی آلینیشی اوچون کنر معارف ریاستی، خلقارا و ایچکی نهادلر همکارلیگی بیلن عاجل اقداملرنی عملگه آشیرگن. پیوستوننینگ کوپهیتیریشیچه، بیرلشگن ملتلر تشکیلاتینینگ بالهلرنی قوللب-قوتلش صندیغی (یونیسف) و «جلاله» جمغرمهسی همکارلیگی بیلن، چوکی تومنیده وقتینچهلیک ۹۵ ته محلی صنف و ۱۷۵ ته خیمهنی توزهتگنلر.
عزیزالرحمان پیوستوننینگ کوپهیتیریشیچه: «جلاله جمغرمهسی حمایتی بیلن، قرطاسیه گه نیازی بولگن ۷۲ ته محلی صنفگه درسلیک یرهتیلدی. شونینگدیک یونیسف همکارلیگی بیلن کنر ده ۲۰۰ ته محلی صنف توزهتیلدی که ۹۵ تهسی چوکی تومنیده جایلشگن.»
مسئوللرگه کوره، زلزله یوز بیرگنیدن اوچ کون اوتگچ، یونیسف همده بیر قطار ایچکی موسسهلر یاردمی بیلن چوکی تومنیدهگی مکتبلرده درس بیریش جریانی قیته باشلنگن.
کنر معارف ریاستیگه کوره، بوزیلگن مکبتلرنینگ قیته قوریلیشی و قسمی بوزیلگن مکتبلرنینگ ترمیملنیشی، اولرنینگ اصلی اولویتلریدن دیر. کنر معارف ریاستینینگ مالی و اداری آمرینینگ ایتیشیچه: «مکتبلرنینگ قنچه بوزیلگنی تیکشیریلیشی اوچون گروهلریمیزگه ایش بیریلیب و اونینگ گزارشی معارف وزیرلیگیگه یوباریلگن. بو جریاننینگ کوزهتیشگه متعهدمیز.»
بوندن آلدین اسلام امیرلیگی معارف وزیرلیگی، افغانستان شرقیده یوز بیرگن سونگی زلزلهده ۲۰۰ مینگ دینی مدرسهلر و مکتبلر اوقووچیلرینینگ تعلیمی جریانی تاثیرلنگنینی معلوم قیلگن ایدی.
معارف وزیرلیگی سوزلاوچیسی ادارهسینینگ معلوماتی اساسیده، یالغیز کنر ده ۲۶۸ اوقووچی اولیب و ۸۶۲ اوقووچی ایسه یرهلنگن.
۹-سنبله، شرقی ولایتلردن قطاریده آلتی درجه ریشترلیک زلزله یوز بیریب و اینگ کوپ کنر ولایتیده جانی و مالی زیانلر ییتیشگنی ثبت بولگن.
مذکور زلزلهده، ایکی مینگ ۲۰۰ دن آرتیق کیشی اولیب، اوچ مینگ ۶۰۰ دن آرتیق کیشی یرهلنگن و شونینگدیک قریب ۷ مینگ یشش اوی بوتونلی و قسمی شکلده ویران بولگن.
