قوریگن اوسیملیکلرنینگ میدهلنیشی سیسی، داروار دملنهلرنینگ خوشبوی هیدی و یانمه-یان ایشلهیاتگن یاش عیاللرنینگ آرام صحبتلری؛ بو ییر هر کونی یاش عیاللردن قطاری آرقهلی سنتی و اوسیملیک دارولر توزهتیلهدیگن بیر ایشخانه دیر. ایشخانهنینگ فضاسی قوریگن اوسیملیکلر هیدی بیلن تولگن؛ تیگیرمانلر آوازی، دارولر پاکتلنیشی و یاش عیاللرنینگ آرام-آرام صحبت قیلیشی، عادی اقتصادی فعالیتدن هم آرتیق سعیوحرکتنی حکایه قیلهدی.
مذکور ایشخانهدهگی ایشلاوچیلردن بیری فرزانه انوری، نیچه ییللیک تجربهسی توغریسیده ایتیشیچه: «بو ییرده تورت ییلدن بیری ایشلهیمن. کوپراق معده، بوبرهک تاشی، قاره سریغلمه و سریق سریغلمه دارولرینی توزتهمیز.» اونینگ یانیده، بو ایشخانه گه کیلمسدن آلدین اوسیملیک دارولر توغریسیده اونچهلیک بیلگیلری بولمهی و حاضر ایسه بو توغریده مهارتلری سیزیلرلی درجهده آشگن یاش عیاللر ایشلماقده.
بو ایشخانهدهگی ایشلاوچیلردن باشقه بیری شیماگل صمدینینگ ایتیشیچه: «بوندن آلدین اوسیملیکلرنی بیراز تانیدیم؛ لیکن اولردن قندهی فایدهلنیش، بو اوسیملیکلرنینگ نیمه گه فایدهلی بولگنی و نیمه تاثیری بولگنینی بیلمس ایدیم. بو ییرگه کیلگنیمدن بیری، اولرنینگ فایدهلنیش طرزینی اورگندیم.»
اوشبو تعلیم و تجربه، فقط اورگهنیش بیلن یکونلنمهیدی، بلکیم عیاللردن کوپ قطاری اوچون عایلهوی اقتصادی وضعیتیده سیزیلرلی اوزگریشلرنی یرهتگن. بو ایشخانهدهگی ایشلاوچیلر عیاللرنینگ ایتیشلریچه، بو ایش آرقهلی قولگه کیلتیرهدیگنلری درآمد، گرچند آز بیراق کوندهلیک حیاتلریگه تاثیر قویگن.
مذکور ایشخانهدهگی ایشلاوچیلردن سمیه حیدریگه کوره: «یوزده-یوز حیات نیازلری توعریسیده بیر یاردم بولهدی، هم مینی اقتصادیمگه یاردم بیرهدی هم پولیمنی ذخیره قیلهمن همده بالهلریمگه اوسیملیک دارولردن فایدهلنهمن که ضرری یوق. حاضر قیینچیلیکلریمیزدن بیر بولیمینی حل قیلهدی.»
باشقه بیرتاماندن، اوسیملیک دارو ساتووچیلردن الهام احمدینینگ ایتیشیچه، کونده اوسیملیک دارو آلیش اوچون ۱۵ کسل اونینگ یانیگه کیلهدی. «بو ییرگه هم کیچیک همده کته یاشلی کیشیلر کیلهدی. کونده اورتچه ۱۰ دن ۱۵ کسل بیزگه مراجعت قیلهدی. بو ییرگه کیلهدیگن کیشیلردن کوپ قطاری کمبغل دیر. کیمیایی دارولر جودهیم قیمت دیر؛ لیکن بیزلرنینگ دارولریمیز قیمت نقطهی نظریدن ارزانراق دیر.»
اوشبو ایشخانه بیش ییل آلدین تدبیرکار بیر عیال آرقهلی آچیلیب و حاضر ۵۵۵ عیال مستقیم و نامستقیم شکلده ایش بیلن شغللنگن. بو ایشخانه مسئولی شکریه احمدینینگ ایتیشیچه، بو ییرنی آچگنیدن اصلی مقصد اجتماعی و اقتصادی قیینچیلیکلر سبب اویدن تشقیده ایش فرصتیگه ایگه بولمهگن عیاللرگه ایش زمینهسی یرهتیلیشی دیر. «بو ایشنی آز سرمایه بیلن باشلهدیم و حاضر تورت-بیش بولیمیمیز بار و سرمایهمیز حاضر ۵۰۰ مینگ افغانیگه ییتیشگن. اوشبو ایشخانهده ۱۰۰ قلمدن آرتیق اوسیملیک دارولر تیارلنهدی.»
شوندهی بیرحالده، هرات ده اقتصادی مسئلهلر بیلرمانلریدن عبدالرحمان کریمی، بو کبی ایشخانهلر اورنینی جمعیت و عیاللر اقتصادی وضعیتی یخشیلنیشیده مهم بیلیب و ایتیشیچه: «کسب-کار درآمد کوپهیشی، مالی نظارت، خودکفالیککه ایگه بولیش بولیمیده اوزیگه ایشانچنینگ آشیشی و مهارتلر یخشیلنیشی، محلی جمعیت مستحکملنیشی و ایش زمینهسی یرهتیلیشیگه سبب بولهدی که محلی و ملی اقتصاد گه یاردم بیرهدی.»
اوشبو کیچیک ایشخانه، آز امکانیت بیلن اوز حیاتلریگه ینگی یولنی توزهتگن عیاللرنینگ سعیوحرکتی نمونهسی دیر؛ بو یول اوسیملیک دارولر یورهگیدن اوتیب، مالی مستقللیک و امید تامان یکونلنهدی.
