ایران، بو مملکت «سیاسی و اجتماعی ترتیبینی بوزیشگه اورینیش» همده امریکا و اسرائیل گه همکارلیک قیلیش عیبی بیلن تورت سیاستچینی قولگه آلگن.
خلقارا ییتکرمهلرنینگ بوگون (۲۰-دلو/ ۹-فبروری، دوشنبه)، گزارش بیریشیچه، قولگه آلینگن کیشیلر آرهسیده اصلاحات جبههسی باشلیغی آذر منصوری، سابق دیپلمات محسن امینزاده و پارلماننینگ سابق وکیلی ابراهیم اصغرزاده شامل بولیب و تورتینچی کیشینینگ کیملیکی معلوم قیلینمهگن.
ایران قضاییه قوهسی، اوشبو کیشیلرنی «ترتیبسیزلیک یرهتیش اوچون کینگ کولملی فعالیتلرنی تشکیل ایتیش و اونگه رهبرلیک قیلیش» گه عیبلب و ایتیشیچه، اولر اعتراضچیلر حرکتلرینی آقلشگه اورینگن.
قولگه آلینیشلر، جنوری آییدهگی ناآراملیکلر بیلن بیرگه یوز بیرگن که اونینگ جریانیده مینگلب کیشی اولیب و قولگه آلینگن. مذکور اعتراضلر باشده اقتصادی بحران سبب باشلهنیب و کیین ایسه حکومتگه قرشی عمومی حرکتگه اَیلنگن.
ایران رسمیلری، اعتراضچیلرنی «تروریست» دیب، اسرائیل و امریکا نی اوشبو ناراضلیک نمایشلرده ارهلشیشگه عیبلهگن. گزارشلر، بو مملکت بویلب اعتراضلر جریانیده آلتی مینگدن آرتیق کیشینینگ اولگنینی بیان قیلگنی بیرحالده، ایران دولتی رسمی رقمنی اوچ مینگ ۱۷۷ کیشی دیب اعلام قیلگن.
اعتراضلر و کیسکینلیکلرگه عکسالعمل اولهراق امریکا، اعتراضچیلرگه قرشی زورهوانلیکدن فایدهلنیش ایران گه هجوم بولیشگه سبب بوله آلهدی دیب آگاهلنتیرگن و شونینگدیک تهران هم، تشقی هجوملر عملگه آشیریلگنی صورتده «منطقهای اوروش» یوز بیریشی احتمالیدن آگاهلنتیرگن.
