پاکستان افغانستان خوفسیزلیک مسئله‌لری بوییچه خواطر بیلدیرماقده اېکن، اوشبو مملکت نینگ افغانستان ایشلری بوییچه مخصوص وکیلی آصف درانی پاکستان، چین، ایران، تاجیکستان و اۉزبېکستان شامل بیش قۉشنی مملکت، افغانستانده عصیانچی گروه‌لر نینگ فعالیتیدن خواطرده اېکنلرینی ادعا قیلگن.
درانی بو بیانات نی ۲-اسد، سه‌شنبه کونی اسلام‌آباد ده اۉتکزیلگن ییغیلیشده بیان قیلیب و پاکستان‌لیک طالبلر تحریکی (تی‌تی‌پی) مسئله‌سی مملکتی اوچون قرمز چیزیغ اېکن‌لیگینی معلوم قیلگن.
شو بیلن بیرگه، اسلام امیرلیگی آصف درانی نینگ بیاناتی گه مناسبت بیلدیریب ېنه بیر مراتبه افغانستان هېچ بیر مملکت اوچون تهدید اېمس‌لیگیدن ایشانچ بیلدیرگن.
بیزلرنینگ فیسبوک صحیفه‌میزگه باش اورینگ!
اسلام امیرلیگی سۉزلاوچیسی اۉرین باسری حمدالله فطرت نینگ بوتوغریده سلام‌وطندار گه ایتیشیچه: «افغانستان دنیا و منطقه ده‌گی هېچ بیر مملکت اوچون تهدید اېمس، اسلام امیرلیگی هېچ بیر حربی گروه گه فعالیت قیلیش اجازه‌سینی بیرمه‌یدی، افغانستان نینگ بوتون توپراغی خوفسیزلیک و دفاع کوچلری تامانیدن نظارت بولماقده و بو توغریده‌گی خواطرلر ناتوغری دیر.»
بونگه قۉشیمچه، اسلام امیرلیگی ایچکی ایشلر وزیرلیگی سرپرستی سراج‌الدین حقانی «ملی ایش کنفرانسی» ده، افغانستان خوفسزلیک وضعیتی گه دایر بیر قطار مملکت‌لر نینگ خواطرلرینی شایعه دیب بو مملکتده هېچ قنده‌ی خوفسیزلیک معما یوق‌لیگینی بیلدیرگن.
حقانی گه کوره: «افغانستانده‌گی خوفسیزلیک، منطقه ده‌گی بیرقطار اولکه‌لرده یوق‌لیگیدن ایشانچ بیره‌میز، امکانیت نقطه‌ی نظریدن ضعیف بولسک ده، بیراق خوفسیزلیگی‌میز کوپینچه مملکت‌لرده یوق دیر.»
بیزلرنینگ «ایکس» ترماغی ده هم تعقیب قیلینگ!
شو بیلن بیرگه، ایش بیلرمان‌لردن بیرقطاری نینگ ایشانچی گه کوره، پاکستان عصیانچی گروه‌لر و خوفسیزلیک مسئله‌لردن افغانستان برابریده فایده‌لنیش اوچون سعی-حرکت قیلماقده.
اولر گه کوره، پاکستان بونده‌ی سعی-حرکت‌لری بیلن افغانستان نی دنیا هم‌جمعیت آلدی گه ایشانچ‌سیز قیلیب و اوشبو یول آرقه‌لی اۉز منفعتینی تأمینله‌یدی.
سیاسی مسئله‌لر ایش بیلرمانی اکبر سیال نینگ ایتیشیچه: «پاکستان دنیا مقیاسیده افغانستان نی ایشانچ‌سیز قیلیش گه اۉرینه یپتی، پاکستان آت توتگن مملکت‌لر نینگ افغانستان بیلن مناسبتی و همکارلیگی بار، شکایت‌لری بولسه پاکستان آرقه‌لی اېتمه‌یدیلر بلکه ایلچیخانه‌لری و تشقی ایشلر وزیرلیک‌لری آرقه‌لی افغانستان بیلن شریک قیله‌دیلر.»
پاکستان اوچ ییلدن بېری افغانستان خوفسیزلیک وضعیتی گه دایر جنجلی بیاناتی گه دوام بیریب کېلگن و بو بیانات‌لر انده-سنده حتا ایکّی مملکت رسمی‌لری نینگ لفظی تارتیشوولری گه سبب بولگن.
