کابل و اسلامآباد اورتهسیدهگی سیاسی کېسکینلیکلردن سۉنگ، ایککی هفتهدن بیری تورخم، اسپینبولدک، غلامخان، دندپتان و انگور اده چېگره بندرلری افغانستان و پاکستان اورتهسیدهگی برچه سودا و ترانزیت یوکلرینی یېتکزیش یوزیگه یاپیلیب و یوزلب یوک تاشووی موتر چېگرهلرنینگ ایکی تامانیده توختهب قالگن.
افغانستان و پاکستان سودا قۉشمه اتاقینینگ اجرائیه باشلیغی نقیبالله صافی گه کوره، اوشبو مدت دوامیده ایکیله مملکت هر کونی میلیونلرچه افغانی زیان کورگن.
اونینگ ایتیشیچه: «ایکی هفته بولهدی بوتون یوللر یاپیق پاکستان تامانیدن. ایکیله تامانگه یوک تاشووچی موترلر توختهب قالگن و ایکیله مملکت گه میلیونلرچه افغانی ضرر یېتکزهدی؛ بو وضعیت چوزیلگن حالده اهالی و سوداگرلر کوپراق ضرر کورهدی.»
بیراق اسلام امیرلیگی صناعت و سودا وزیرلیگی اهالی گه، افغانستان توارلرینی منطقه بازارلری گه یېتکزیش اوچون مقابل یول تاپیش گه سعی-حرکت قیلماقدهلیگیدن ایشانچ بیلدیرهدی.
صناعت وسودا وزیری نورالدین عزیزی، بوگون ویدیو فایلده شوندهی دیگن: «ایکی مملکت اورتهسیده یوزهگه کیلگن معمالر سببلی یوللر یاپیلگن، افغانستان محصولاتی صادر قیلینمهیپتی و ترانزیت پاکستان تامانیدن توختهتیلگن. بیز حاضر منطقهده افغانستان محصولاتلری اوچون ماس بازار بوله آلهدیگن عاقلانه مقابل یوللرنی تاپیشگه حرکت قیلهیپمیز. شو یونهلیشده ایزلنیشلر و سعی-حرکتلر ېنهده کوچهیگن.»
اقتصادی بیلرمانلر فکریچه، افغانستان و پاکستان اورتهسیدهگی چېگره بندرلرنینگ یاپیق قالیشی، اوزاق وقت ایچیده هر ایکیله مملکتنینگ اقتصادیات و ترانزیتی گه جدی ضرر یېتکزیشی حقیده آگاهلنتیرهدیلر.
اقتصاد بیلرمانی قطبالدین یعقوبی و امیدالله قاسمزینینگ ایتیشیچه، بو وضعیتدن قوتیلیش یگانه یولی – تیمیر یول وهوا یولَکلرینی تاپیب و فایدهلنیش دیر.
اوتگن جمعه کونی، پاکستان عملدارلری بو مملکت و افغانستان اورتهسیدهگی سیاسی و امنیتی قیینچیلیکلر حل ایتیلمهگونچه، بو ایکیله مملکت اورتهسیده بولگن چېگرهلر یاپیق قالیشینی ایتگنلر.
