سوریهنینگ حلب شهریده محلی رسمیلرنینگ گزارش بیریشیچه، کُردلر رهبرلیگیده دمکراتیک کوچلری نیچه کونلیک توقنشوولردن کیین آتیش کیسین بوییچه کیلیشوو بیلن، حلب شهرینی ترک قیلیب و بو شهرنینگ بوتونلی نظارتی سوریه دولتی کوچلری قولیگه توشگن.
حلب حاکمی عزام الغریبنینگ بوگون ایرتهلب (۲۱-جدی/ ۱۱-جنوری، یکشنبه)، ایتیشیچه، شیخ مقصود و اشرفیه محلهلریدن دمکراتیک کوچلرینینگ چیقیشی بیلن، حاضر حلب «بو کوچلرنینگ حضوریدن بوتونلی بوشهتیلگن.»
الغریبگه کوره، دمکراتیک کوچلرینینگ چیقریلیش جریانی سوریه اردوسی بیلن هماهنگلیک بولگن حالده، اوتوبوسلر آرقهلی کیچه پیتی عملگه آشیریلگن.
شوندهی بیرحالده، دمکراتیک کوچلری قوماندانی مظلوم عبدینینگ تصدیق قیلیشیچه، بو گروه خلقارا واسطهچیلیک بیلن آتیش کیسین برقرار بولیشی و تینچاهالی، یرهلنگنلر همده جنگریلرنینگ تینچ شکلده چیقریلیشی تامینلنیشی بوییچه کیلیشووگه ایریشگن. اونگه کوره، اوشبو بوشهتیلیش سوریهنینگ شمال و شرق منطقهلری تامان عملگه آشیریلگن.
آتیشمهلر، سوریه ملی اردوسیگه دمکراتیک کوچلرینینگ قوشیلیشی اوچون مذاکرهلر نتیجه بیرمهگنیدن کیین باشلنگن.
گزارشلر اساسیده، مذکور توقنشوولر جریانیده کمیده ۳۰ کیشی اولیب و ۱۵۰مینگدن آرتیق کیشی اویلرینی ترک قیلیشگه مجبور بولگن.
