ننگرهارنینگ یشیل منطقهلریدن کوپ قطاری توختهگن و شور سوولر سبب، حاصل بیریش امکانیتینی قولدن بیرگن. ننگرهار ده دهقانلردن قطارینینگ سلاموطندار گه ایتیشلریچه، ییرلردن اضافه سوولر کیتیشی اوچون مناسب سیستم یوقلیگی، نهفقط حاصللر میزانینی کمهیتیرگن، بلکیم ایکینچیلیک ییلردن قطاری حاصل بیریشدن قالگن.
حاصللر کمهیشی توغریسیده ننگرهار ولایتی مومندره تومنیدهگی دهقانلردن نظیفاللهنینگ ایتیشیچه: «قیش و کوکلم موسوملریده یاغینگرچیلیکلر کوپ بولگنی پیت، ییرلرده سوولر توختهشی قیینچیلیگی کوپهیهدی؛ چونکه ییر یخشی جذب قیله آلمهیدی و حاصللریمیزدن ۴۰ فایزی کمهیهدی.»
ننگرهار دهگی دهقانلردن باشقه بیری گلمحمد خان، ایکین موسومیده سوولر توختهشینی ضررلی دیب و ایتیشیچه، سوولر کیتهدیگن کاناللری یاپیلیشی، اونینگ ایکینچیلیک فعالیتینی قیینلشتیرگن معمالردن دیر. «بوغدای موسومیده سوولر توختهیدی و بند بولهدی و بو زیان ییتیشتیرهدی. مذکور سوولر بند قالگنیده، ایکیلگن محصولیمیز گه زیان ییتیشتیرهدی. سوولر توختهشی حاصلیمیزنینگ ۳۰ فایزینی کمهیتیرهدی. حکومت سوو کیتهدیگن یوللر ایشینی باشلهسین، بیزلر هم حمایت قیلهمیز.»
ایکینچیلیک ییرلریدهگی حبوباتدن کوپینچه حاصل قولگه کیلتیرهدیگن دهقانلردن فهیم و زلاند، سوو کیتیشی اوچون ستندرد سیستملر یوقلیگیدن خواطر بیلدیریب و ایتیشلریچه، محصوللر کمهیشی اصلی سببی، توپراق شورلیگی و سوونینگ بند بولیشی دیر.
فهیمنینگ ایتیشیچه: «بوغدای و ارپه موسومیده، ییرلریمیزده سوونینگ بند بولیش قیینچیلیگی کوپ دیر. سوولر توپلنیشی یا-ده توپراق شورلیگی حاصللرنی کمهیتیرهدیگن عامللردن دیر، موسوم زیان کورهدی و حاصللریمیز کمهیهدی. چقور خندقلر قازهمیز و بو ایش اوچون بیلچهلردن فایدهلنهمیز.»
شونینگدیک زلاندنینگ ایتیشیچه: «مینیمچه، ایشلش اوچون اینگ بویوک توسیق پول و اوسکونه دیر. مسئوللردن ییرلرده بند قالگن سوولرگه کیتیش یوللر قازیلیشی قیینچیلیگی حلی اوچون پول و اوسکونه بیریلیشینی ایستهیمیز.»
ننگرهار ده ایکینیچیلیک متخصصی ذبیحالله دولتزی، سوو کیتهدیگن سیستملرگه توجهسیزلیکنی ضررلی دیب و بو توغریده ایتیشیچه: «ننگرهار ده سوو کیتهدیگن مناسب سیستم بولمهگنی صورتده، فنی نقطهی نظریدن توپراق جودهیم بوزیلهدی، ایکینچیلیک حاصللر کمهیهدی و توپلم شکلده دهقانلر درآمدی کمهیهدی. مناسب سووغاریش، کلسیم گه ایگه کیمیاوی کودلردن فایدهلنیش و مناسب وقتده ایکین، توپراق شورلیگیده یاردم بیرهدیگن یوللردن دیر.»
ننگرهار ایکینچیلیک، سووغاریش و چاروهچیلیک ریاستینینگ مطبوعات مسئولی اجمل سبحانی، ییرلر اصلاح بولیشی، کاناللر قوریلیشی و سوو کیتهدیگن یوللرگه تیگیشلی لایحهلر باشلهنیشیدن ایشانچ بیریشی بیرحالده؛ لیکن بودجه کملیگینی اصلی توسیقلیکلردن دیب و ایتیشیچه، اوشبو قیینچیلیک حلی اوچون بیر قطار برنامهلرنینگ قولگه آلینیشی ممکن. «سونگی تیکشیریشلر اساسیده، ایکینچیلیک ییرلردن قریب ۱۸ فایزی توپراقنینگ شورلیگی و سوولر بندلیگی همده سوولر کیتیشی یوللرینینگ یامان وضعیتی سبب، تولیدی امکانیتینی قولدن بیرگن. مذکور قیینچیلیکلر کوپراق کوز کنر، غنیخیل، بهسود، مومندره، گوشته، کامه و بتیکوت تومنلریده کوزگه کوریلهدی. حاضر اوشبو ایکینچیلیک قیینچیلیکلر حلی اوچون ریاستیمیز ییترلی بودجه گه ایگه ایمس؛ بیراق یقینلرده ایتیلگن قیینچیلیکلر حل بولهدی.»
سوو کیتیش یولی ایکینچیلیک ییرلر اوچون کوپ مهم بیر نیاز دیر که سوو مدیریت بولیشی، توپراق صفتی سقلهنیشی و حاصللر کوپهیشیده اساسی اورینگه ایگه دیر. سوو جذبیگه توسیق بولهدیگن ییرنینگ طبیعی شکلی یا-ده یاغینگرچیلیک میزانی کوپ بولگن منطقهلرده، سوو بندلیگی نهفقط اوسیملیک ریشهسینی بوزهدی، بلکیم توپراقنی شور قیلیب، ایکینچیلیک ییرلر صفتی و حاصل بیریش میزانینی هم کمهیتیرهدی.
