جوزجان یشاوچی‌لریدن یوزلرچه‌سی بیر اعتراض آرقه‌لی، ولایت مقامی نینگ کیریش ایشیگی‌نی باغلب ایشلاوچی‌لرگه کیریش اوچون رخصت بیرمه‌گن‌لر. اعتراضچی‌لرنینگ آگاه‌لنتیریش‌لریچه، اوشبو ولایتده افغان گاز تصدی‌سی و برشنا شرکتی رهبرلیگی‌گه دخالت قیلینگن صورتده، کینگ بیر اعتراض آرقه‌لی ولایت مقامی و بلخ- شبرغان قتناو یولی‌نی بوغله‌یدیلر.
اولرنینگ آگاه‌لنتیریش‌لریچه، جمهورلیک ریاستی نینگ سابق اورین باسری مارشال عبدالرشید دوستم رخصت بیرمه‌گن صورتده، مذکور اداره‌لرده ینگیدن تعین‌لنگن مسوول‌لرگه فعالیت قیلیش اوچون رخصت بیرمه‌یدیلر.
عین‌حالده، جوزجان ولایت مقامی نینگ سرپرستی عبدالقادر مالیه نینگ ایتیشیچه، آرین مصمم نام‌لی بیر کیشی افغان گاز تصدی‌سی نینگ ینگی باشلیغی صفتیده مالیه وزیرلیگی‌دن مکتوب آلیب کیلگن، بیراق قطار جنجل‌لر بیلن روپه‌ره بولگن.
جوزجان ولایت مقامی نینگ سرپرستی‌گه کوره، اوشبو قیین‌چیلیک‌نی حل قیلیش و افغان گاز تصدی‌سی نینگ ینگی باشلیغی‌نی تانیشتیریش اوچون جمهورلیک ریاستی‌گه مکتوب یوبارگن‌لر، لیکن حاضرگه‌قدر جواب قیتریلمه‌گن و بو اداره نینگ برحال باشلیغی عبدالقیوم دیر.
بیراق، افغان گاز تصدی‌سی نینگ ینگی باشلیغی آرین مصمم نینگ ایتیشیچه، ۱۳۹۹- ییل ۱ سرطان دن باشلب جوزجان ولایتی بوییچه افغان گاز تصدی نینگ باشلیغی صفتیده تعین‌لنگن، لیکن اوشبو اداره نینگ سابق باشلیغی انجنیر عبدالقیوم اونینگ ایشی‌گه توسیق بولگن.