اوتگن هفته افغانستان شمالیده یوز بیرگن زلزله، نهفقط سمنگان ولایتی تومنلریگه زیان ییتیشتیرگن؛ بلکیم بلخ ولایتیده هم عایلهلردن قطاری اویلرینی قولدن بیریب و یامان بیر وضعیت بیلن روپهره بولگنلر.
افغان قیزیل آی جمعیتینینگ معلوماتی اساسیده، اوشبو زلزله نتیجهسیده بلخ ولایتی کشنده تومنیده قریب ۵۰۰ اوی بوتونلی و قسمی شکلده بوزیلیب و شونینگدیک مذکور تومن یشاوچیلریدن ایکی تهسی قربان بولگن.
کشنده تومنیده زلزلهدن جبرلنگنلردن قطارینینگ ایتیشلریچه، نیازلری حل بولمهگنی صورتده، ییتیب کیله یاتگن قیش موسومیده کوپینچه قیینچیلیک بیلن روپهره بولیشلری ممکن.
اوشبو تومن یشاوچیلریدن عبدالصمدنینگ ایتیشیچه: «ایکی اوییمیز بار ایدی، زلزلهدن بوزیلدی. بوگون دولتنینگ یاردم بیریشی اوچون کیلگنمیز. عایلهده ۱۲ کیشیمیز و قرضدارمیز و اویلریمیزنی قیته توزته آلمهیمیز.»
شونینگدیک کشنده تومنی یشاوچیلریدن باشقه بیری نصیراحمد، وضعیتلری حقیده ایتیشیچه: «قیشلاغیمیزده شهید و یرهلنگن بار ایدی. اویلریمیز بوزیلدی. یرهلنگن کیشیلر کابل و مزارشریف گه یوباریلدی. منطقهلردن قطارینینگ یولی بند بولیب و کلینیکلرگه بارهدیگن یوللر یاپیلگن. قیینچیلیکلریمیز کوپ دیر و حل بولینیشی کیرهک.»
افغانستان شمالیده زلزله یوز بیرگنیدن کیین، اوتگن کون بیرینچی مرته ملک سلمان جمغرمهسی و قیزیل آی جمعیتی، کشنده تومنیده زلزلهدن زیان کورگن ۶۰۰ عایله گه یاردم بیرگن. مذکور یاردملردن فایدهلنگن کیشیلردن بیری غلامحضرتنینگ ایتیشیچه: «زلزله اهالیگه کوپ زیان ییتیشتیردی. فقط شوگون ترقهلگن یاردملردن فایدهلندیک. حاضرگچه هیچ سروی بولمهگن و اهالی وضعیتیدن خبر آلینمهگن. زلزلهدن جبرلنگن کیشیلر اوچون بو یاردملر ییترلی ایمس و کوپراق یاردم بیریلیشی کیرهک.»
افغان قیزیل آی جمعیتینینگ عمومی باشلیغی شهابالدین دلاور، زیان کورگن بولیملرنی کوریش اوچون بلخ ولایتی کشنده تومنیگه سفر قیلگن. اونینگ ایتیشیچه، بو نهاد هماهنگلیگی بیلن بلخ و سمنگان ولایتلریده، تورت مینگ عایلهگه نقدی و اوچ مینگ عایلهگه ایسه آزیق-آوقت بیلن بیر قطار نرسه یاردم بیریلیشیگه قرار آلینگن. «زلزله بلخ و سمنگان ولایتلریده اهالی گه زیان ییتیشتیرگن. بیزلر تورت مینگ عایله گه ۱۰ مینگ ۵۰۰ افغانیدن یاردم بیرهمیز. ایکی مینگ عایله گه آزیق-آوقت و بیر مینگ عایله گه هم بیر قطار نرسه ترقتهمیز.»
اوتگن هفته بلخ و سمنگان ده یوز بیرگن زلزلهده، ۲۷ کیشی اولیب، قریب ۱۰۰۰ کیشی یرهلنگن و شونینگدیک یوزلب یشش اوی بوزیلگن که مینگلب کیشینینگ آواره بولیشیگه سبب بولگن.
