مملکت شمالیده یوز بیرگن زلزلهدن کیین، سعودی عربستان ده حیات کیچیرهدیگن سمنگان یشاوچیلریدن قطاری، زلزلهدن جبرلنگنلرگه یاردم ییغیش و ترقهتیش اوچون بیر کمیسیون آچگنلر. اوشبو کمیسیون، سوداگرلر، سرمایه یاتقیزووچیلر و جمغرمهلردن یاردم ییغیش و اونی نیازمند عایلهلرگه ترقهتیش مقصد آچیلیب، حاضرگچه اوچ میلیوندن آرتیق افغانینی سمنگان دهگی ۷۰۰ عایله گه ترقهتگن.
مذکور کمیسیون اعضاسینینگ کوپهیتیریشیچه، بو یاردملر میدانی تیکشیروو همده نیازمند و جبرلنگن عایلهلرنینگ تانیشتیریلگنیدن کیین، اولرگه ترقهتیلگن. بو کمیسیون اعضالریدن بیری ذبیحاللهنینگ سلاموطندار گه ایتیشیچه: «سعودی عربستان دهگی سمنگانلیک ایناغهلریمیز حمایتی بیلن بیر کمیسیون آچدیک و جبرلنگن عایلهلر سروی بولگنیدن کیین ۷۳۲ عایله گه یاردم بیردیک. اوشبو عایلهلر سمنگان ولایتی حضرتسلطان، فیروزنخچیر و خُلم تومنلریده جبرلهنیب و همکارلیککه نیازلری بار ایدی.»
سمنگان دهگی جبرلنگنلر، مذکور مردمی کمیسیوننی اجتماعی بیردملیک و بحراننی باشقریشده یشاوچیلرنینگ کونگیللی اشتراکی نمونهسی دیب و ترقهتیلگن بو یاردملردن خورسندلیک قیلگنلر.
سمنگان ولایتی فیروزنخچیر تومنی یشاوچیسی و جبرلنگنلردن نادر، مردمی کمیسیون آرقهلی ترقهتیلگن یاردملردن خورسندلیک قیلیب و سلاموطندار گه ایتیشیچه: «زلزلهده اوییمیز بوزیلدی، سمنگانلیک ایناغهلریمیزدن نقد پول ترقهتگنلری و وضعیتینی سورهگنلری اوچون منتدارلیک قیلهمیز . باشقه ایناغهلریمیز و نهادلردن، بیزلرگه یاردم بیریشلرینی ایستهیمیز.»
شونینگدیک اوشبو تومن یشاوچیلریدن باشقه بیری نجیبنینگ ایتیشیچه: «یقیندن کیلیب و وضعیتیمیزنی کورگنلری و یاردم بیرگنلری اوچون سعودی عربستان دهگی ایناغهلریمیزدن منتدارلیک قیلهمیز، چونکه منطقهمیزگه کوپ زیان ییتیشگن ایدی. اویلر و مسجدلر هم بوزیلگن.»
سمنگان ولایتی خُلم تومنی یشاوچیسی و مردمی کمیسیون یاردملریدن فایدهلنگنلردن باشقه بیری عبدالرحمان، عایلهلرگه باشپنه قوریلیشی اوچون حمایتی برنامهلرنینگ کوپراق بولیشینی ایستهگن. «زلزلهده اوچ قیشلاق بوتونلی بوزیلدی. شهید و یرهلنگن کیشیلر هم بار ایدی. اوزیمنینگ ایکی بالههم یرهلندی. کوپ یامان بیر کون ایدی. سوداگرلر، ایناغهلریمیز و یاردم بیرووچی نهادلردن، بیز بیلن همکارلیک قیلیشلرینی ایستهیمیز. قیش ییتیب کیلماقده و هوا ساووق بولگن. باشپنهمیز یوق.»
مملکت شمالیده ۱۲-عقرب ده یوز بیرگن زلزله، انسانی تلفات گه علاوه کوپینچه ویرانلیکلرگه هم سبب بولگن. بو واقعه توغریسیدهگی معلومات اساسیده، سمنگان، بلخ و سرپل ده ۲۶ کیشی قربان بولیب، بیر مینگدن آرتیق کیشی یرهلنگن و شونینگدیک اوچ مینگدن آرتیق یشش اوی خراب بولگن.
