نیچه هفته آلدین سمنگان و بلخ ولایتلریده یوز بیرگن اولیملی زلزله اوشبو ولایت یشاوچیلرینی تورلی قیینچیلیک بیلن روپهره قیلدی؛ اوشبو زلزلهده یشش اویلر بوزیلیب و یشاوچیلردن کوپینچه قربانلیک آلدی و یوزلب عایلهنی نامعلوم کېلهجک بیلن یوزمه-یوز قیلدی. اېندی سمنگان ولایتی فیروزنخچیر تومنیده زلزلهدن قوتیلگن کیشیلر، باشقه دشمنلیک بیلن یوزلشگن؛ ساووق، کسللیک، اطراف-محیط افلاسلنیشی و ناتوانلیک.
هوا ساووشی بیلن بیرگه، زلزلهدن جبرلنگنلر آرهسیده موسمی کسللیکه چلینگنلر سانی خواطرلی شکلده آشگن. فیروزنخچیر تومنیده زلزلهدن جبرلنگن عایلهلر، ۱۲-عقربده یوز بیرگن زلزلهده یشش اویلری بوزیلگن، حاضر نازک خیمهلر و طبی امکانیتسیز بیر حالده ساووق هواده حیات کیچیریشماقده.
بالهلر و عیاللر بو فاجعهنینگ اصلی قربانلری دیر. سنچیق، زکام، ایسیتمه، نفس قیسیلیشی، یوتهلیش و بوغیز آغریق، بو عایلهلر اورتهسیده کېنگهیب و کونسهیین بو کسللیکه چلینگنلر سانینی آرتیرماقده.
فیروزنخچیر تومنی یشاوچیسی بولمیش گلچهره شوندهی دیېدی: «بالهلریم و اۉزیم کسل من؛ همهسی کیچیک باله و سوت ییمهدی؛ همهسی سنچیق بولگن. کمبغل و محتاج میز. شفاکار آلدیگه باریش اوچون پولیمیز یوق.»
فیروزنخچیر تومنی یشاوچیلریدن باشقه بیری بیبی گه کوره: «۵ بالم بار؛ همهسی کسل، سنچیق و ایسیتمهلری بار و یوتهلیشهدی. هېچ نرسه ییمهیدیلر. کلینیکلر گه آلیب باردیک آق دارو بیریشدی لېکن ساغلمهدیلر.»
اوشبو عایلهلر، ساغلیق خذمتلردن فایدهلنه آلمسلیکدن نالیب و حکومتدن اولر گه ساغلیق مرکز قوریب بیریشنی سورهیدیلر. فیروزنخچیر تومنی «فقرآباد» و «رحمتآباد» قیشلاقلری اهالیسی، مالی منبعلر آزلیگیدن شکایت قیلیب ایتیشلریچه، زلزله طفیلی اوی-جایلری بوزیلگچ اقتصادی توانلری سیزیلرلی درجهده کمهیگن شو سببلی کسللرینی دوالهی آلمسلیککه سبب بولگن.
مذکور قیشلاق یشاوچیلریدن بولمیش جانمحمدنینگ ایتیشیچه: «بو ییر ساغلیق سیار کمپ اېدی حاضر یوق. بیز اوچون بولیشی کېرهک اېدی، قیشنینگ اوچ آییده یشاوچیلر گه طبی خذمت کورستسه اېدی. سمنگان مرکزی یا کی مزارشریف گه کسلخانه گه باریش گه قوربیمیز یېتمهیدی. بو ییرده اهالی خیمه آستیده حیات کیچیرماقده.»
بو قیشلاق یشاوچیلریدن باشقه بیری نوید شوندهی دیېدی: «زلزلهده اویلریمیز پرچهلنیب کیتدی؛ خیمهده تیریکچیلیک قیلهمیز. ایکی کوندن بیری کسل من؛ بو ییرده دارو هم یوق؛ پولیمیز هم یوق – شخصی شفاکار آلدیگه باریش اوچون. کیچهلر خیمه ایچی جوده هم ساووق بولهدی. هېچ نرسهمیز یوق آزیق-آوقت و کمپل یاردم بیرسینلر.»
فیروزنخچیر تومنیده ساغلیقنی سقلش مسئوللری، یشاوچیلر اورتهسیده موسمی کسللیکلر کوپهیشینی تصدیقلهیدی. فیروزنخچیر تومنیدهگی کلینیک مسئولی عبدالروف گه کوره، بار امکانیتلریدن قوللنیب و کسللر گه طبی خذمت کورسهتیشماقده و جدی کسلی بولگنلرنی سمنگان ولایتی کسلخانهسیگه یوباریش گه مجبور بولهدیلر.
او شوندهی دیېدی: «بو ییرده کسللردوالنیش اوچون کیلهدی؛ بیراق کوپینچهسی یوتل، سنچیق یا کی موسمی کسلللیکلر گه چلینگن. بار امکانیت گه قرهب طبی خذمت کورستهمیز و دوالنیش امکانیتی بولمهگنلرنی سمنگان ولایتی کسلخانهسیگه یوللـهیمیز.»
فیروزنخچیر تومنی یشاوچیلری، طبی خذمتلردن فایدهلنه آلمهیاتگن فقط ضرر کورگن عایلهلر اېمس؛ بلکی بو معما باشقه حدودلرده هم یشاوچیلرنی جدی قیینچیلیک بیلن یوزمه-یوز قیلگن.
