سمنگان ولایتی خُلم تومنیدن کیین، فیروزنخچیر تومنی قیشلاقلریدهگی یشاوچیلر، ۱۲-عقرب ده یوز بیرگن زلزلهدن اینگ کوپ جبرلهنیب و قیینچیلیکلر بیلن روپهرهلر. مذکور تومنده یوزلب یشش اوی ییقیلیب، جبرلنگن عایلهلر کیچهوکوندوز ساووق هواده خیمهلرگه پناه آلیشدن باشقه چارهلری یوق.
سمنگان محلی مسئوللرینینگ ایتیشلریچه، فیروزنخچیر تومنیده یوز بیرگن سونگی زلزله، یوزلب عایلهنی جدی قیینچیلیک بیلن روپهره قیلیب و کوپینچه ویرانلیکلرگه سبب بولگن. فیروزنخچیر تومنینینگ قیشلاقلر بوییچه مدیری شاهمحمد امینینینگ ایتیشیچه، اوشبو واقعهده مذکور تومن قیشلاقلریده ۶۰۰ دن آرتیق یشش اوی ویران بولگن.
امینینینگ کوپهیتیریشیچه، بو قیشلاق نیازلری حلی اوچون حاضرگچه حکومت و خصوصی یاردم بیرووچی نهادلر آرقهلی، نقد پول، آزیق-آوقت، خیمه، اوی اوسکونهلری و باشقه بیر قطار نرسه ترقهتیلگن.
فیروزنخچیر تومنی قیشلاقلر بوییچه مدیرینینگ سلاموطندار گه ایتیشیچه: «کوچلی بیر زلزله ایدی که نتیجهده، ۲۲۷ یشش اوی بوتونلی خراب بولگن و باشقه یشش امکانیت گه ایگه ایمس. باشقه ۳۷۸ یشش اوی ایسه قسمی خراب بولگن. شونینگدیک بو تومنده ۵۴ کیشی یرهلنگن و ۱۰۰ دن آرتیق چاروه تلف بولگن. قوشمحله، فقیرآباد، رحمتآباد، چنارگهبالا و پایین قیشلاقلری کوپ خراب بولگن»
شوندهی بیرحالده، زلزلهدن جبرلنگن عایلهلر، یاردملرنینگ فایدهلی بولمهگنی و وقتیده بیریلمسلیگیدن خواطر بیلدیریب، مسئول نهادلر و یاردم بیرووچی تشکیلاتلرنینگ تیزلیککه توجه قیلیشلرینی سورهگنلر.
اولرنینگ کوپهیتیریشلریچه، یاردملر تیزلیککه بیریلمهگنی صورتده، ییتیب کیلهیاتگن قیشده، جدی قیینچیلیکلر بیلن روپهره بولهدیلر. شونینگدیک اویلری بوزیلگن عایلهلر، اولرگه باشپنه قوریلیشی، آزیق-آوقت، ایسیق کییم و یاقیلغی مادهلر بیریلیشینی ایستهگنلر.
فیروزنخچیر تومنیده محل آقسقاللریدن صاحبخان، عایلهلرنینگ کوپراق جبرلنیشی آلدی آلینیشی اوچون اولرگه کوپینچه بشری یاردملر یرهتیلیشیگه نیاز بارلیگینی ایتگن. «هوا ساووق و خیمه آستیده حیات کیچیریش قیین دیر. ایستهگیمیز شو که بیر هیئت تعیین بولیب و کیین جبرلنگن هر بیر عایله گه بیر اوی و بیر دهلیز قوریلسین که اهالی قیشده آرام بولسین. اهالیدن کوپ قطاری اویلرینی قوریشگه امکانیتلری یوق. یالغیز بیر نیچه کیشی اویلرینی قیته قورماقده. اهالینینگ اقتصادی وضعیتی یامان دیر.»
شونینگدیک اوشبو تومندهگی آقسقاللردن باشقه بیری عجبخان، ترقهتیلهدیگن یاردملرنینگ ییترلی بولمهگنینی بیان قیلیب و ایتیشیچه: «کوچلی زلزله ایدی و هیچ کیم گه هیچ نرسه قالمهدی. حتا تندیرلر هم خراب بولدی که نهادلر بیزلرگه پیشیریلگن نان ترقهتهدی. جبرلنگنلرگه نقد پول، اون، خیمه یاردم بیریلهدی، بیراق بو ییترلی ایمس. بیزلر مدرن بیر اوی قوریلیشینی ایستمهیمیز، فقط بیر باشپنه بولسه، ییترلی دیر.»
افغانستان شمالیده یوز بیرگن ۶.۳ درجه ریشترلیک زلزله، سمنگان، بلخ، سرپل و بدخشان ولایتلریده کوپینچه ییش اوینی بوزگن که، بو اویلرنینگ بوش اورنی، عایلهلردن کوپ قطارینینگ خیمهلرده تیریکچیلیک قیلیشگه مجبور قیلگن.
معلوماتلر اساسیده، یوز بیرگن مذکور زلزله نتیجهسیده، ۲۶ کیشی اولیب، بیر مینگدن آرتیق کیشی یرهلنگن و شونینگدیک اوچ مینگدن آرتیق یشش اوی ویران بولگن.
