شمالی ولایتلرده ۱۲-عقربده یوز بیرگن زلزله نتیجهسیده، سمنگان ولایتیده ییتکرمه ایشلاوچیلری و خبرچیلردن قطارینینگ اویلری زیان کوریب و اولردن قطاری اقتصادی قیینچیلیکلر و مالی امکانیتلری یوقلیگی سبب، اویلرینی قیته قوریش امکانیتیگه ایگه ایمسلر. مذکور خبرچیلر، مسئول نهادلر و ییتکرمهلرنی قوللب-قوتلاوچی نهادلر آرقهلی عاجل شکلده یاردم بیریلیشینی ایستهگنلر.
سمنگان دهگی خبرچیلردن حسینا حسامنینگ ایتیشیچه، سونگی زلزلهده اویی خراب بولگنیدن کیین، قیین بیر وضعیتده حیات کیچیرماقده. «زلزلهده اویلریمیز بوزیلدی و کوپ زیان کوردیک. اقتصادی قیینچیلیگیمیز بار و اویلریمیزنی قیته قوره آلمهیمیز. اویلریمیز بوتونلی بوزیلگن و قیته قوریلیشیگه نیاز بار. مالی وضعیتیمیز هم یخشی ایمس.»
سمنگان دهگی خبرچیلردن باشقه بیری خالد امیرینینگ ایتیشیچه، زلزله نتیجهسیده اویی جدی شکلده خراب بولیب و اوشبو اویده یشش تینچ ایمس دیر. امیری ییتکرمهلرنی قوللب-قوتلاوچی نهادلردن، جبرلنگن خبرچیلر وضعیتیگه توجه قرهتیشینی سورهگن. «اوییمیز قدیمی ایدی. دیوارلری درز قیلگن و اوی تامی قولب توشگن. محلی بیر ییتکرمهده ایشلهیدیگن بیر ایشلاوچینینگ معایشی آز دیر. اویلریمیزنی قیته قوریشگه امکانیتیمیز یوق. ییتکرمهلرنی حمایت قیلهدیگن نهادلر بیزلرگه یاردم بیرسین.»
سمنگان ده خبرچیلر مصونیت کمیتهسی نمایندهسی فضلالرحمان ساعی، خبرچیلر اویینینگ خراب بولگنینی تصدیقلب، تیزلیککه اولرنینگ قیینچیلیگی حل بولیشینی سورهگن. «قیغو بیلن سونگی زلزلهده خبرچیلر و ییتکرمه ایشلاوچیلریدن قطارینینگ اویی زیان کورگن. خبرچیلر جدی اقتصادی قیینچیلیکلر بیلن روپهره دیر و حقوقلری آز دیر. اوزلری اویلرینی قیته قوره آلمهیدیلر. نهادلر همکارلیک قیلگنی صورتده، اولرنینگ وضعیتی یخشیلنیشی ممکن.»
شوندهی بیرحالده، سمنگان ده محلی مسئوللرنینگ ایتیشلریچه، زلزلهدن جبرلنگن خبرچیلرگه باشقه یشاوچیلر کبی یاردم بیریلهدی. سمنگان حاکمی سوزلاوچیسی فضلالرحمان عثمانینینگ ایتیشیچه: «ییتکرمهلر و خبرچیلرگه پیامیمیز شو که، زلزلهده جبرلنگنلری بیللی بولگنی و نیاز صورتیده، کمیتهلر و ولایت مقامی هماهنگلیگی بیلن اولرگه کیرهکلی همکارلیکلر عملگه آشیریلهدی.»
جاری قویاش ییل ۱۲-عقربده یوز بیرگن زلزله نتیجهسیده، افغانستان شمالی ولایتلریده ۲۶ کیشی قربان بولیب، بیر مینگدن آرتیق کیشی یرهلنگن و شونینگدیک یوزلب یشش اوی خراب بولگن.
