سرپل ولایتی صیاد تومنیده یشاوچیلر و دهقانلردن قطارینینگ سلاموطندار گه ایتیشلریچه، کیتمه-کیت قوروقچیلیکلر اولرنینگ ایکینچیلیک حاصللریگه جدی شکلده زیان ییتیشتیرگن. اولرگه کوره، اقلیم اوزگریشلری و سوو تنقیصلیگی، اوسیملیک آفتلری کوپهیشیگه سبب بولگن.
صیاد تومنی «قفلهتون» قیشلاغی یشاوچیلریدن انعاماللهنینگ ایتیشیچه، مذکور تومن یشاوچیلریدن کوپ قطاری قاوون ایکیش بیلن شغللنگن؛ لیکن سونگی ییللرده اورته گه کیلگن اوسیملیک آفت، پالیزلرینی تاثیر آستیده قویگن. «بیر تورلی آفت دیر که پالیزلرده، قاوون و ترووزنی بوزیب و زیان ییتیشتیرهدی.»
صیاد تومنیدهگی دهقانلرنینگ ایتیشلریچه، پالیزلریگه ایکی-اوچ مرته دوا سیپمهگنلری صورتده، حاصل قولگه کیلتیره آلمهیدیلر و بعضا ایسه محصوللریدن برچهسی اورتهدن کیتهدی. اولرگه کوره، حاصللری اورتهدن کیتمسلیگی اوچون اوز پوللری بیلن آفتگه قرشی دارولرنی ساتیب آلیشگه مجبور بولهدیلر.
سرپل ولایتی صیاد تومنی «انگشگه» منطقهسیدهگی دهقانلردن محمد ذاکرنینگ ایتیشیچه: «نیچه ییلدن بیری پالیزلریمیز گه بیر تورلی قورت تاپیلگن و ایکینچیلیک ییرلریمیزنی بوزگن. دارو سیپمهگنیمیز صورتده، حاصل قولگه کیلتیره آلمهمیز. ایکی-اوچ مرته دارو سیپیشیمیز کیرهک، عکسینچه حالده، محصوللریمیزدن برچهسی اورتهدن کیتهدی. بو موضوعنی ایکینچیلیک ریاستی بیلن شریک قیلگنیمیز یوق. اوزیمیز دارو ساتیب آلهمیز و فایدهلنهمیز.»
صیاد تومنی «شاهتوت» منطقهسیدهگی مذکور دهقانلردن باشقه بیری سید مصطفانینگ ایتیشیچه، سونگی ییللردهگی قوروقچیلیک طفیلی اوسیملیک آفتلری کوپهیشی نهفقط قاوون بلکیم ترووز و اسملاق همده بادرنگ کبی پالیزدهگی باشقه محصوللرگه هم تاثیر قویگن. اونگه کوره، شهرگه نسبت منطقهلریده دارولر قیمتی کوپ بولیب و دهقانلردن قطاری دارو ساتیب آلیش امکانیتیگه ایگه ایمس دیر که بو موضوع، حاصللرنینگ جدی شکلده کمهیشی یا-ده پالیزلرنینگ بوتونلی اورتهدن کیتیشیگه سبب بولگن. «نیچه ییلدن بیری قاوونلر زیان کورهر ایدی، حاضر ایسه ترووز هم تاثیرلنگن. اسملاق، بادرنگ و پالیزدهگی باشقه محصوللر هم تاثیر کورگن. منطقهمیزده آفتلرگه قرشی دارولر قیمتی هم کوپ دیر؛ شهر گه نسبت ایکی-اوچ برابر قیمتی بار. اهالی اونی ساتیب آلیش امکانیتیگه ایگه ایمس.»
شوندهی بیرحالده، صیاد تومنی اورینباسری محمدیاسین انس، اوشبو تومننینگ بیر قطار قیشلاقلریده مذکور اوسیملیک آفتلر کوپهیگنی سببینی، اقلیم اوزگریشلری و قوروقچیلیکلر عنوان قیلیب و ایتیشیچه، بو قیینچیلیکنی تیگیشلی مسئوللر بیلن جریان گه قویگن و بو توغریده توجه قرهتیلیش سوزی بیریلگن. «سرپل مرکزی و صیاد تومنی همده نیچه قیشلاقده، اوسیملیک آفتلری کوپهیگن. سوو کم دیر و قوروقچیلیک سبب اوسیملیک آفتلری کوپهیگن. شکرک اسملی کسللیکلر هم بار که کوپراق قاوونگه زیان ییتیشتیرهدی. شونینگدیک بیر تورلی آق رنگلی چیبین هم تاپیلگن که قاوون حاصللرگه زیان ییتیشتیرهدی. دهقانلر ایستهکلرینی ایکینچیلیک ریاستی بیلن شریک قیلگنمیز و اولر اونینگ اورتهدن کیتیشی توغریسیده اقدام بولیشدن ایشانچ بیرگنلر.»
باشقه بیر تاماندن، سرپل ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، قوروقچیلیکلر و اقلیم اوزگریشلری نهفقط ایکینچیلیک حاصللری میزانینی کمهیتیرگن، بلکیم اوتگن ییللرگه نسبت اوسیملیک آفتلری سطحینی هم کوپهیتیرگن.
سرپل ایکینچیلیک، سووغاریش و چاروهچیلیک باشلیغی عبدالقادر وحدتنینگ ایتیشیچه، اوسیملیکلرنی سقلش تیملری، تعیینلنگن وقتده ساحه گه باریب، اوسیملیک آفتلری کوپهیشی آلدی آلینیشی مقصد دهقانلرنینگ پالیزلریگه دوا سیپهدیلر. «قوروقچیلیک و اقلیم اوزگریشلرینینگ تاثیری بار. اوتگن ییللرگه نسبت اوسیملیک آفتلری میزانی کوپهیگن؛ بیراق اوسیملیکلرنی سقلش مدیریتی تعیینلنگن وقتده ساحه گه کیتهدی و پالیزلرگه دوا سیپهدی. بو جریاننینگ دوامی بار و آفتلر کوپهیشینینگ بیراز آلدی آلینگن.»
اوشبو ریاست مسئوللریگه کوره، سرپل ده قوروقچیلیک سوو ییرلریدن ۳۰ فایزی و للمی ییرلریدن ۷۰ فایزینی تاثیر آستیده قوییب و ایکینچیلیک حاصلاتی میزانینی سیزیلرلی درجهده کمهیتیرگن.
