چېگره بیلمس شفاکارلر تشکیلاتینینگ گزارشی گه کوره، کنر زلزلهسی سۉنگی اون ییلده افغانستانده اېنگ اولیملی طبیعی آفتلردن بیری بولیب، اونده ۲۲۰۰ کیشی هلاک بولگن و ۳۰۰۰ دن آرتیق کیشی یرهلنگن شونینگدیک مینگلب آدملر آواره بولگن. بو تشکیلات مسئوللری، زلزلهدن کېینگی ایلک کونلرده ضررلنگن حدودلردهگی اوچ کسلخانه گه تیزکار طبی یاردم یوباریلگنینی ایتهدیلر.
چېگره بیلمس شفاکارلرنینگ کوپهیتیریشیچه، بو تشکیلات کنر ولایتینینگ نورگل تومنیده پتان کمپیده ۲۴ ساعت خذمت قیلووچی طبی مرکز تشکیل قیلگن و بوندن تشقری، اۉز خدمتلرینی شوماش قیشلاغیدهگی آری گمبه گه هم کېنگهیتیرگن.
کنرده چېگره بیلمس شفاکارلر طبی بولیمی مسئولی عصمتالله عصمت شوندهی دیېدی: «فاجعهنینگ دستلبکی کونلریده چېگره بیلمس شفاکارلر ضررلنگن حدودلردهگی اوچته کسلخانه گه تیزکار طبی یاردم جونتدی. کېین سپتمبر اورتهلریده کنر ولایتینینگ نورگل تومنیدهگی پتان کمپیده ۲۴ ساعت ایشلاوچی کلینیک تشکیل قیلیندی و اکتوبر اورتهلریدن باشلب خذمتلریمیز شوماش قیشلاغیدهگی آری گامبا کمپی گه کېنگهیتیریلدی.»
چېگره بیلمس شفاکارلر تشکیلاتی مسئوللری، سپتمبر دن اکتوبر آیینینگ آخریگچه بولگن دورده اولرنینگ طبی جماعهلری افغانستان شرقیدهگی زلزلهدن تأثیرلنگن حدودلرده ۷۵۰۰ دن آرتیق بیمارنی دوالهگنینی قوشیمچه قیلهدیلر. اولرنینگ اکثریتی ایچ کیتیشی (اسهال)، تنفسی عفونتلر و تیری معمالریگه چلینگن.
فقط جسمانی معمالر اېمس – کنر اهالیسی سنبله آییده زلزلهدن کېین روحی ضربهلردن هم اذیت چیکماقده.
کنرده چېگره بیلمس شفاکارلر ساغلیق گروهینینگ اعضاسی ناهیده نور گه کوره، آمان قالگنلرنینگ اکثریتی روحی تاماندن جراحت آلگن. او شوندهی دیېدی: «کورهمیز کی ضررلنگن حدودلردهگی آدملر امیدسیزلیک و توشکونلیکه توشگن. بیمارلرنینگ بیری شوندهی دیېدی قیزی یانیده تاپیلگندیک حس قیلهدی چونکی حلی هم اونی یوقاتگنیگه ایشانمهیدی.»
باشقه تاماندن، کنردهگی زلزله جبردیدهلرینینگ ایتیشیچه، هوا ساوویب باریشی بیلن اولرنینگ قیینچیلیکلری و تشویشلری هم آرتیب بارماقده.
آری گمبه کمپی یشاوچیلریدن بولمیش سید جلال شوندهی دیېدی: «قیش یولده و بو چادرلرده یششنینگ علاجی یوق. کیچه یامغیر یاغدی و بالهلریمیز و عیاللریمیز جوده قینهلیشدی.»
چېگره بیلمس شفاکارلر تشکیلاتی مسئوللرینینگ تأکیدلشیچه، طبی خذمتلر کورسهتیش بیلن بیر قطارده، کنر زلزلهسی عاقبتیده آواره بولگنلر اوچون شخصی و گروهی روانشناسلیک مصلحت دستورلرینی هم یولگه قوییشگن. هفتهسیگه قریب ۲۵۰ کیشی اوشبو اوچرهشوولرده قتنشهدی.
چېگره بیلمس شفاکارلر، قیش فصلی یقینلشر اېکن، افغانستان شرقیدهگی زلزلهده تأثیرلنگن حدودلرده موسمی کسللیکلرنینگ کوپهیشی احتمالیدن خواطر بیلدیرماقده و آمان قالگنلرنی قیشنینگ ساووقلریدن حمایه قیلیش اوچون زودلیک بیلن چارهلر کوریشنی طلب قیلهدی.
