کنر ده شفاکارلردن قطارینینگ ایتیشلریچه، حاملهدارلیک دورهسیده حددن تشقری موبایلدن فایدهلنیش، آنه و چقهلاقنینگ ساغلیگینی خوف بیلن روپهره قیلهدی. اولرنینگ آگاهلنتیریشیچه، بو ایش اویقوسیزلیک، فشار پس توشیشی و آنهده موشکلر (عضله) آغریقلرگه سبب بوله آلهدی. کنر ولایتی کسلخانهسیدهگی شفاکارلردن پلوشهنینگ ایتیشیچه، حاملهدارلیک دورهسیده حددن تشقری موبایلدن فایدهلنیش چقهلاقنینگ رشد قیلیشی و اونینگ سلوللریگه زیان ییتیشتیریب و بو مسئله آنه بیلن چقهلاقنینگ ساغلیگی توغریسیده سلبی تاثیرلرگه سبب بولیشی ممکن. او، حاملهدار عیاللردن، اوزلری و چقهلاقلری ساغلیگی و شونینگدیک وقتدن آلدین توغیش خوفی کمهیشی اوچون حددن تشقی موبایلدن فایدهلنمسلیکلرینی ایستهگن.
پلوشهنینگ کوپهیتیریشیچه: «گرچند بو توغریده حاضرگچه تدقیقات بولماقده؛ لیکن اونینگ سلبی عاقبتلری هم بیان بولگن. تدقیقات گه کوره، حاملهدار بیر عیال کوپینچه وقت موبایلدن فایدهلنسه، بو ایش چقهلاق میهسی رشد قیلیشیگه سلبی تاثیر قیلیشی ممکن. موبایلدن چیقهدیگن الکترومقناطیسی موجلر، جنین مغزی سلوللرینی تاثیر آستیده قویه آلهدی. شونینگدیک بو موضوع اویقوسیزلیککه سبب بولهدی که اویقوسیزلیک آنه و چقهلاقنینگ ساغلیگیگه سلبی تاثیری بار. گزارشلردن قطاریگه کوره، موبایلدن حددن تشقری فایدهلنیش وقتدن آلدین توغیلیش خوفینی کوپهیتیرهدی. انه شوو سبب، حاملهدارلیک دورهسیده موبایلدن کوپراق فایدهلنیلمسلیگی، تندن اوزاقراق قوییلیشی، کیچهلر آنه یانیگه قوییلمسلیگی و هدفوندن فایدهلنیشی کیرهک. موبایل اورنیده کتاب اوقیب و فیزیکی فعالیتلرنی انجام بیرسینلر.»
کنر ولایتی کسلخانهسیدهگی شفاکارلردن باشقه بیری اکرامالله دانشنینگ ایتیشیچه، گرچند موبایلدن فایدهلنیش توغری شکلده جنین گه تاثیری یوق؛ لیکن آنه اوچون جسمی قیینچیلیکلرگه سبب بولیب و نتیجهده، باله گه هم زیان ییتیشهدی. اونینگ کوپهیتیریشیچه: «موبایلدن فایدهلنیش مستقیم شکلده جنین گه تاثیری یوق؛ بیراق حددن تشقری موبایلدن فایدهلنیش اوزون مدتده آنه گه تاثیری بولهدی؛ فشار پس توشهدی، اویقوسیزلیک، موشک آغریق و بیل آغریق اورته گه کیلهدی. آنه گه بو قیینچیلیکلر تاپیلگنیده، جنین گه هم زیان ییتیشهدی. جنیننینگ عصبی سیستمی ضعیف بولیب، رشد قیلیشی قیینچیلیک بیلن روپهره بولهدی و جنین توییب آوقتلنمهیدی.»
شوندهی بیرحالده، عیاللردن قطاری هم موبایلدن فایدهلنیشنینگ سلبی تاثیرلرینی بیان قیلهدیلر. کنر ولایتی شیگل تومنینینگ «کناسیر» قیشلاغی یشاوچیسی بولمیش فاطمهنینگ ایتیشیچه، حاملهدارلیکده موبایلدن فایدهلنیش اونینگ باش آغریققه چلینیشی، کوریش قابلیتی کمهیشی و قیتریشیگه سبب بولگن. اونینگ کوپهیتیریشیچه: «موبایل کیرهکلی و بعضا ضرورت تاپیلهدیگن بیر نرسه دیر؛ لیکن حاملهدارلیکده موبایلدن کوپ فایدهلندیم، باشیمده بیر آغیرلیکنی حس قیلدم، کوزلریم درست کورمهیدی و حتا یورهگیم بوزیلهر ایدی. بو حقیقت دیر که حاملهدارلیک دورهسیده حددن تشقری موبایلدن فایدهلنیشنینگ ضرری بار اینیقسه عصبی و یورهک سیستمیگه تاثیر قویهدی. حاملهدار عیاللر حددن تشقری موبایلدن فایدهلنمهسینلر؛ چونکه آنه زیان کورگنیده، چقهلاق هم زیان کورهدی؛ آنه سالم بولگنیده، چقهلاغی هم سالم دنیا گه کیلهدی.»
کنر یشاوچیلریدن باشقه بیری ثنا، برچه عیاللردن موبایلدن فایدهلنیشنینگ کمهیتیریشلرینی ایستهیدی. اونینگ ایتیشیچه، چقهلاغیگه زیان ییتیشمسلیگی اوچون موبایلدن اونچهلیک فایدهلنمهیدی. اونینگ کوپهیتیریشیچه: «اوچ دقیقه فایدهلنهمن و اوندن کوپراق فایدهلنیشنینگ ضرری بار. ایکی بالهم بار. اولرنی یخشیراق تربیه قیلیش اوچون موبایلدن اونچه فایدهلنمهیمن چونکه اولرگه فکرم بولمسه برققه قول اوریشلری یا-ده اوزلریگه زیان ییتیشتیریشلری ممکن. یالغیز ایشلریم یکونلنگنیده فایدهلنهمن؛ چونکه اوی ایشلری بار، بالهلرنی باقیش و بعضا هم کسللیک بولهدی. بالهلرگه سوت بیریشده موبایلدن فایدهلنهمن.»
شونینگدیک روانشناسلرنینگ آگاهلنتیریشیچه، نهفقط حاملهدار عیاللر، بلکیم موبایلدن فایدهلنهدیگنلردن برچهسی اونینگ حددن تشقری فایدهلنیشینینگ سلبی تاثیرلرینی بیلیشلری کیرهک. کنر ده سیدجمالالدین افغانی بیلیم یورتیدهگی روانشناس استادی اسدلله کلیوالنینگ ایتیشیچه، حاملهدارلیک دورهسیده موبایلدن حددن تشقری فایدهلنیش عیاللرنی حقیقی حیات و اجتماعی علاقهلردن اوزاقلشتیرهدی. اونینگ کوپهیتیریشیچه: «حاملهدار عیاللر موبایلدن کوپ فایدهلنسه، حقیقی دنیادن و اجتماعی علاقهلردن اوزاقلشهدی و بو حقیقی حیات و اجتماعی علاقهلردن فایدهلنه آلمسلیگیگه سبب بولهدی. موبایلدن حددن تشقری فایدهلنیش اضطراب و اویقوسیزلیککه سبب بولهدی که بو موضوع جنین و آنه سلامتلیگیگه سلبی تاثیرلرنی قویهدی و جنین رشدیگه هم سلبی تاثیر قیلهدی.»
موبایلدن فایدهلنهدیگن کیشیلردن، فایدهلنیش زمانینینگ مدیریت قیلیشلری سورهلگن؛ فقط نیاز بولگن وقتده موبایلدن فایدهلنیب و اونینگ بیلن ضروری ایشلرینی انجام بیرسینلر. موبایلدن حددن تشقری فایدهلنیش، ساغلیق قیینچیلیکلرگه علاوه اجتماعی علاقهلر و حیات نظمیگه هم زیان ییتیشتیرهدی.
