مملکت شرقیده جایلشگن لغمان، یشاوچیلریدن کوپ قطاری ایکینچیلیک آرقهلی درآمد قولگه کیلتیرهدیگن ولایتلردن دیر. حاضر ایسه بو ولایت مرکزی حدودلریدهگی «بدیعآباد» منطقهسیده، ۹۰ جریب ییرگه چیلان (عناب) کوچتلری ایکیلیشی باشلنگن که بو لایحه، اوشبو ولایتده صنعی اورمانلرنی رواجلنتیریش بوییچه کینگراق دستورنینگ بیر قسمی حسابلنهدی. لغمان ده تورلیخیل ایکینچیلیک محصوللری ایکیلیشی بیلن، سونگی آیلرده «تربیهوی چیلان» ایکیلیشیگه مخصوص اعتبار قرهتیلگن. مذکور اورمانلرنینگ اساسی بولیمی قرغهای تومنی و مهترلام شهری اینیقسه دشت حدودلریده یرهتیلگن.
بو توغریده لغمان ایکینچیلیک ریاستی مطبوعات مسئولی سردار زیارنینگ ایتیشیچه: «حاضر ایسه لغمان ده ۱۵۰ هکتار چیلان اورمانی قوریلگن. شونینگدیک صنعی اورمانلر کوپهیشی اوچون سعیوحرکتنینگ دوامی بار. جاری ییل باشیده ۱۸ هکتار چیلان اورماتی و ۱۵ هکتار ینغاق اورمانی قوریلگن. بو تور کوچت مناسب گللشی سبب، عسل اریسینی ییتیشتیرهدیگنلر اوچون ایش زمینهسینی یرهتهدی. شونینگدیک ۱۱ میلیون افغانی خرهجتی بولگن ۱۸ هکتار چیلان اورمانینینگ قوریلیش لایحهسی، بیرلشگن ملتلر تشکیلاتی ترقیاتی دستوری آرقهلی عملگه آشیریلهدی. بو لایحه محل اهالیسیگه ایش امکانیتلرینی یرهتیشگه علاوه، توپراق خراب بولیشی کمهیشی و یشیل ساحهلر سطحی آشیشیگه سبب بولهدی.»
اونگه کوره، مذکور لایحه نهفقط محیطنینگ چیرایلی بولیشیگه رولی بار، بلکیم منطقهنینگ اقلیمی وضعیتی یخشیلنیشیگه هم یاردم بیرهدی. شوندهی بیرحالده، اوشبو لایحهده ایش بیلن شغللنگن محل یشاوچیلری، اونینگ عملگه آشیریلگنیدن خورسندلیک بیلدیریب؛ لیکن ایکینچیلیک و اورمانلر سقلهنیشی بولیمیده بو کبی برنامهلر کوپهیشینی سورهگنلر.
اوشبو لایحهدهگی ایشلاوچیلردن بیری محمد ربانینینگ ایتیشیچه: «مذکور اورمانلر یرهتیلیشی سوو تاشقینلر کوچینی کمهیتیرهدی؛ چونکه سوو تاشقینی قیشلاققه ییتیشمسدن آلدین آلدی آلینهدی. شونینگدیک منطقه یشیلراق بولیب و هوا افلاسلیگی کمهیهدی. بو کوچتلر حاصلگه ییتیشسه، عسل اریسینی ییتیشتیریش دستورینینگ کوچلنیشی ممکن.»
بو لایحهدهگی ایشلاوچیلردن باشقه بیری رحماناللهنینگ ایتیشیچه: «اوشبو لایحهده ایشلشدن خورسندمیز. کونده ۴۰۰ افغانی قولگه کیلتیرهمیز و مذکور ایش عایلهمیز اقتصادی اوچون فایدهلی. بونگه علاوه منطقهمیز یشیلراق بولهدی.»
باشقه بیر تاماندن، ییش محیط ایش بیلرمانلری هم صنعی چیلان اورمانلری یرهتیلیشینی اقلیم اوزگریشلری بیلن ماسلنیشده فایدهلی اقدام بیلهدیلر. بو توغریده یشش محیط بیلرمانی مصطفا حمیدنینگ ایتیشیچه: «چیلان اورمانلری هوا ایسیقلیگی کمهیشیده رولی بار و اقلیمی وضعیتنینگ بخشیراق مدیریت بولیشیگه یاردم بیرهدی. مذکور اورمانلر یاغینگرچیلیک میزانینی برابر قیلیب، قوروقچیلیک و سوو تاشقینلر برابریده مستحکملیکنی آشیرهدی. شونینگدیک چیلان عسل اریلری اوچون بای محیطنی یرهتهدی.»
ایش بیلرمانلرنینگ ایشانچیگه کوره، مذکور اورمانلر درست شکلده مدیریت بولیب و سقلنگنی صورتده، لغمان و قوشنی ولایتی ننگرهار ده عسل ایشلب چیقریلیشی یانیده اقلیم اوزگریشلری عاقبتلری کمهیشی، اوسیملیک بولگن ساحهلرنینگ مستحکملنیشی و قوروقچیلیک همده سوو تاشقینلر برابریده محلی جمعیتنینگ چیدهملیگی آشیشیده مهم رول اوینهیدی.
