ناروی مهاجرلر کینگشی، پاکستان و اسلام امیرلیگی اورتهسیدهگی توقنشوولر، مینگلب عایلهنی اوز اوی-جایلرینی ترک ایتیش گه مجبور قیلگنینی بیلدیردی.
اوشبو اداره، ۲۰ حوت/۱۱ مارچ، چهارشنبه کونی ایکس صحیفهسیده بیر بیانیه ترقهتیب، توقنشوولر طفیلی آواره بولگنلر گه نقدی یاردم کورسهتماقدهلیگینی یازگن.
ناروی مهاجرلر کینگشینینگ تأکیدلشیچه، افغانستان یشاوچیلرینی دایمی قوللب-قوتلش ضرور و دنیا همجمعیت هم بو احوال گه نسبتن بیفرق بولمسلیگی کیرهک.
شو بیلن بیرگه، بیرلشگن ملتلر تشکیلاتینینگ بالهلرنی قوللب-قوتلاوچی صندیغی، افغانستان شرقی حدودلریده اسلام امیرلیگی و پاکستان حربی کوچلری اورتهسیدهگی توقنشوولرده ۶۸ مینگ باله آواره بولگن و ۸ مینگ باله مکتب باریشدن محروم بولگنینی اعلان قیلگن ایدی.
مذکور اداره گه کوره، بالهلرنی قوللب-قوتلاوچی صندیغینینگ فعالیتلریدهگی قیینیچیلیک، افغانستان شرقیده ۱۳۸ مینگ اهالی حیاتیگه سلبی تأثیر قویگن.
اسلام امیرلیگی و پاکستان اورتهسیده توقنشوولر قویاش ۱۴۰۴ ییل، جوزا آییده پاکستاننینگ ننگرهار و پکتیکا گه هجوم قیلیشی بیلن باشلندی و هنوزگچه دوام ایتماقده؛ بیرلشگن ملتلر تشکیلاتیگه کوره، اوشبو توقنشوولرده ۱۸۰ کیشی اولیب و یرهلنگن.
