خلقارا ییتکرمهلرنینگ گزارش بیریشیچه، هندوستان جنوبیده یولاوچی تاشووچی بیر اوتوبوسنینگ بیر موترسایکل بیلن توقنشگنیدن کیین آلاو آلگنی نتیجهسیده، ۲۵ کیشی قربان بولگن. پولیسگه کوره، مذکور واقعهده باشقه نیچه کیشی یرهلنگن.
الجزیره ترماغینینگ گزارش بیریشیچه، اوشبو واقعه بوگون ایرتهلب (۲-عقرب، جمعه)، هندوستاننینگ آندرا پرادش ایالتیده یوز بیرگن.
پولیسنینگ ییریک رسمیسی ویکرانت پاتیل، مذکور واقعهنینگ آندرا پرادش ایالتیده جایلشگن «کورنوول» تومنی یقینیدهگی قتناو یولده یوز بیرگنینی ایتگن.
الجزیرهنینگ گزارشی اساسیده، یولاوچیلردن قطاری شیشهلرنی سیندیریش بیلن اوزلرینی اوتوبوس ایچیدن چیقره آلگنلر؛ لیکن باشقه بیر قطاری ایسه یاردم بیرووچی کوچلرینینگ ییتیشیشیدن آلدین یانغین ایچیده قالیب و اولگنلر.
پاتیلگه کوره، یانغین ایچیده قالگن یولاوچیلردن ۱۸ تهسی قوتقریلیب و حاضر دوالنیش آستیده قرار تاپگن. حاضرگچه اوتوبوس ایچیدن نیچه کیشینینگ قاچقیشگه موفق بولگنی بیللی ایمس.
ویکرانت پاتیلنینگ ایتیشیچه، موترسایکل اوتوبوس بیلن توقنهشیب و اونینگ قویی قسمیده بند قالگن و اوتوبوس تیز سرعت بیلن حرکتده بولگنی سبب، موترسایکل بیر نیچه مدت ییرگه تارتیلیب و نتیجهده اوتوبوسنینگ تیل تانکی آلاو آلگن.
شونینگدیک اونینگ کوپهیتیریشیچه: «دود چیققنیدن کیین، اوتوبوس هیداوچیسی توختهگن و اوت اوچیرووچی بیلن یانغیننینگ اوچیریشگه حرکت قیلگن؛ لیکن یانغیننینگ کوچلی بولگنی سبب، اونی کنترول قیله آلمهگن.»
پاتیلنینگ اورغولشیچه، اوتوبوس بوتونلی شکلده کوییب و موترسایکل هیداوچی هم واقعه محلیده جان بیرگن. جنایی واقعهلرنی تیکشیرووچی بیر تیم، اوشبو واقعهنینگ اصلی سببینی تیکشیرماقده.
۴۴ یولاوچیسی بولگن بو اوتوبوس، «تِلنگانا» ایالتیدهگی «حیدآباد» شهریدن، «کرناتکه» ایالتیدهگی «بنگلور» شهری تامان بارماقچین ایکن.
