ساغلیک وزیرلیگی نینگ اعلام قیلیشیچه، اوتگن ۲۴ ساعت ده مملکتده کرونا گه چلینگن ۶ کسل جان بیرگن و ۱۸۳ ینگی ایجابی واقعه قید ایتیلگن. مذکور ایجابی واقعهلر مملکت نینگ ۱۴ ولایتیده قید ایتیلگن.
ساغلیک وزیرلیگی بوگون (شنبه ۱۱- ثور) کرونا ویروسی توغریسیده کوندهلیک گزارشی نینگ ترقهتیش بیلن ایتیشیچه، اوتگن بیر کیچهوکوندوز ده کرونا گه شبههلی ۱ مینگ و ۱۶۲ کسل تیکشیریلگن. مذکور پیتده ۶۶ کسل ایسه دارولنگن.
ساغلیک وزیرلیگی نینگ گزارشی اساسیده، مملکتده کرونا ویروسی نینگ بیرینچی ایجابی واقعهسی قید ایتیلگنیدن بویان بو ویروس گه شبههلی ۴۰۴ مینگ و ۸۹۴ کیشی تیکشیریلگن. بولردن ۶۰ مینگ و ۱۲۲ تهسی کرونا ویروس گه چلینگن و ۲ مینگ و ۶۳۷ تهسی بو ویروس باعث جان بیرگن. شونینگدیک حاضرگچه کرونا گه چلینگن ۵۳ مینگ و ۲۷۲ کیشی قیته دارولنگن.
شونینگدیک دنیا ده حاضرگچه ۱۵۲ میلیون و ۶۷ مینگ دن آرتیق کیشی کرونا گه چلینگن. بولردن ۳ میلیون ۱۹۵ مینگ دن آرتیغی جان بیرگن و ۱۲۹ میلیون و ۳۸۱ مینگ دن آرتیغی ایسه قیته دارولنگن.
کرونا نینگ کوپینچه ایجابی واقعهلری آمریکا، هندوستان، برزیل، فرانسه، روسیه و انگلستان مملکتلریده قید ایتیلگن. آمریکا ده کرونا ویروسی نینگ بیرینچی ایجابی واقعهسی قید ایتیلگنیدن بویان ۵۹۰ مینگ دن آرتیق کیشی بو ویروس باعث جان بیرگن.
