خلق‌ارا قاچقینلر تشکیلاتی، اوتگن کون (یک‌شنبه، ۱-میزان)، بیر هفته‌لیک گزارشی نینگ ترقه‌تیش بیلن ایتیشیچه، سونگی بیر هفته‌ده ۸۶ مینگ‌دن آرتیق افغانستان‌لیک قاچقین ایران و پاکستان دن افغانستان گه قیتیب و بو مدت‌ده باشقه ۵۷ مینگ‌دن آرتیق کیشی مملکت نی، مذکور ایکی مملکت مقصد ترک قیلگن.
ایران و پاکستان فرهنگی، تیل و دینی یقین‌لیکلری طفیلی افغانستان یشاوچیلری نینگ مهاجرت قیلیش ایسته‌گن مملکتلریدن دیر؛ بیراق اوشبو مملکتلرده قاچقینلر برابریده قتیق سیاست یوریتیله‌دی.
ایران ده‌گی افغانستان‌لیک قاچقینلردن قطاری نینگ سلام‌وطندار گه ایتیشلریچه، سونگی آیلرده اوشبو مملکت‌دن جبری شکلده چیقریلیش و پولیس تامانیدن اذیت قیلینیش کوپه‌یگن.
بیزلرنینگ «ایکس» ترماغی ده هم تعقیب قیلینگ!
ایران ده‌گی افغانستان‌لیک قاچقینلردن بسم‌الله محمدی نینگ ایتیشیچه، افغانستان یشاوچیلری چیقریلیشی کوپه‌یگنی سبب، قاچقینلر آسان بیر شکلده اوی‌دن چیقه آلمه‌یدی.
اونینگ کوپه‌یتیریشیچه: «قاچقینلر یامان بیر وضعیت‌ده قرار تاگن و اویلریدن چیقه آلمهیدیلر. ایش‌ده بولگن کیشی ایشی‌دن چیقه آلمه‌یدی. نان و سوو قیین‌چیلیکلری بار؛ هیچ بیر جای گه باره آلمهیدیلر. ساغلیق قیین‌چیلیکلری بولسه هم، هیچ کیم تشقری گه چیقه آلمه‌یدی.»
ینگی‌لیکده ایران دن جبری شکلده چیقریلگن ریحانه عزیزی نینگ ایتیشیچه: «برچه افغانستان‌لیکلر نی قولگه آلینگنلر دیب مأمورلر وقت تعیین قیلگن. مذکور دیپورت بوله‌دیگنلر آره‌سیده مین هم بار ایدیم. بیزلر گه ویزه بیرمه‌دیلر. کوپ قیین‌چیلیکلرنی کوردیک.قیتیش چاغیده کوپینچه وسیله‌لریمیز یوقالدی.»
شونینگدیک تورکیه ده حیات کیچیره‌دیگن افغانستان‌لیک قاچقینلردن قطاری نینگ ایتیشلریچه، مذکور مملکت‌دن ناقانونی افغانستان‌لیک قاچقینلر نینگ چیقریلیش پروسه‌سی کوپه‌یگن.
تورکیه ده‌گی افغانستان‌لیک قاچقینلردن جمشید نظامی نینگ ایتیشیچه، اوشبو مملکت‌ده‌گی افغانستان‌لیکلر چیقریلیش خصوصیده خواطرلنیش سبب، تشقری گه چیقه آلمه‌ی و دستلبکی نیازلرینی تامین قیله آلمهیدیلر.
اونینگ کوپه‌یتیریشیچه: «تورکیه ده‌گی افغانستان‌لیک قاچقینلر قوله‌ی و آسان شکلده ایش گه باره آلمهیدیلر. بازاردن اوزیمیز گه آزیق-آوقت محصولاتی نی ساتیب آلالمه‌یمیز. کسل بولگنیمیزده شفاکار، کسل‌خانه یا-ده دارو خانه گه باره آلمه‌یمیز. حاضر وضعیت کوپ یامان بولگن.»
اوچ کون آلدین تورکیه دن چیقریلگن ناشر نینگ ایتیشیچه، ایش‌سیزلیک و قشاق‌لیک سبب مهاجرت قیلگن ایدیم. «ایکی‌یریم یا-ده اوچ ییل تورکیه ده ایدیم، مذکور مملکت‌ده قاچقینلر کیم‌لیک‌سیز ناقانونی شکلده حیات کیچیره‌دی. اوشبو مملکت‌ده ناقانونی قاچقینلر گه هیچ امکانیت یوق.»
باشقه بیر تاماندن، مدنی و اجتماعی فعال احمدراشد صدیقی نینگ ایتیشیچه، مهاجرتلردن کوپینچه‌سی اقتصادی و ایش‌سیزلیک قیین‌چیلیکلری سبب یوز بیره‌دی. «افغانستان ده کوپینچه موضوع‌لر مهاجرت گه سبب بوله‌دی؛ مثلا ایش‌سیزلیک مهاجرت نینگ اصلی عامللریدن دیر. نابیللی کیله‌جک. هر کیم گه بیر فرصت یره‌تیلگنی‌ده مملکت‌دن کیته‌دی. باشقه بیر موضوع روحی آسایشته‌لیک دیر.»
بیزلرنینگ فیسبوک صحیفه‌میزگه باش اورینگ!
عین حالده، سرپرست حکومت قاچقینلر وزیرلیگی سوزلاوچیسی عبدالمطلب حقانی، میزبان مملکتلردن افغانستان‌لیکلر نینگ جبری چیقریلیش پروسه‌سی توخته‌تیلیشی نی ایسته‌گن.
اونینگ کوپه‌یتیریشیچه: «میزبان مملکتلر بیلن بعضا ییغیلیشلریمیز بار. ایسته‌گیمیز شو که جبری چیقریلیشلر نی یکونلنتیرسینلر و افغانستان‌لیکلر گه فرصت بیرسینلر که اوز ایسته‌کلری بیلن مملکت قیتسینلر؛ لیکن خلق‌ارا برچه قاعده-قانون گه قرشی قاچقینلر نی جبری شکلده چیقرماقچین بولگنلری صورت ده، اولر گه هر قنده‌ی یاردم بیری گه تیارمیز. اولر گه یشش اوی بیریب و ایش فرصتلرینی یره‌ته‌میز.»
ایتیش کیره‌ک که، سونگی آیلرده پاکستان گه علاوه ایران هم افغانستان گه قاچقینلر نینگ قیتیریلیشی اوچون باسیم‌لرنی کوپه‌یتیرگن.
