لغمان تورلیخیل سبزهوات و ایکینچیلیک محصوللری تولید بولیشی اوچون یخشی اقلیم گه ایگه بولیب و سونگی آیلرده اوشبو ولایتدهگی ییرلرگه لوبیا ایکیلیشی سیزیلرلی درجهده کوپهیگن. حاضر ایسه لغمان ولایتینینگ ایکینچیلیک ییرلریده لوبیا ایکینزارلری سیزیلرلی درجهده کوزگه کوریلیب و بو محصولنینگ ایکیلیشیگه دهقانلر قیزیقیشی آشگن. اوشبو ولایتدهگی دهقانلرنینگ ایتیشلریچه، لوبیا یخشی حاصل بیرهدیگن بیر ایکین دیر، بیراق ستندرد اوروغلر کملیگی و ییترلی فنی بیلیم یوقلیگی، تولید توغریسیده بیر قطار قیینچیلیکلرنی یرهتگن.
لغمان ولایتی دولتشاه تومنیده نیچه دههدن بیری ایکینچیلیک بولیمیده فعالیت قیلهدیگن ۵۰ یاشر سلطاننینگ ایتیشیچه، اسلام امیرلیگینینگ قدرت گه ایریشگنی و بنگیوار مادهلر ایکیلیشی تقیقلنگنیدن کیین، دهقانلر ایکینچیلیک محصوللری یانیده لوبیا ایکیشگه هم یوز کیلتیرگنلر.
او، سلاموطندار بیلن اوتکزگن صحبتلریده، حاصللری سطحی آشیشی اوچون مسئول نهادلر تامانیدن اصلاح بولگن اوروغلر و کیمیاوی کودلر تامینلنیشینی ایستهگن. «آز ییرلریمیزدن کوپینچه فایده آلیش اوچون حکومتدن کیمیاوی کود و اوروغ ترقهتیلیشی بولیمیده همکارلیک ایستهیمیز. بو ییرده اهالینینگ اونچه کوپ ییری یوق، بیر یا-ده یریم جریب ییری بار و بیزلرگه توجه قیلینیشیگه امیدوارمیز.»
بیزلرنینگ فیسبوک صحیفهمیزگه باش اورینگ!
شونینگدیک لغمان دهگی دهقانلردن باشقه بیری بهادرخان، جواری و بوغدای ایکیلیشیدن دهقانلرگه اونچهلیک فایده قالمسلیگینی بیان قیلیب و ایتیشیچه، انه شوو سبب اولرنینگ توجهسی کوپراق لوبیا ایکینیگه قرهتیلگن. اونینگ کوپهیتیریشیچه، لوبیا خراب بولمهیدی و کوپینچه پیت سقلنیشی ممکن. «بو ولایتده بیر تورلی لوبیا بار که بیر ییلده ایکی مرته ایکیلهدی. اونینگ اوروغی بیزلرگه بیریلسه، فایدهسی بوغدای و جواری گه قرهگنده کوپراق دیر. حکومت کیمیاوی و اصلاح بولگن اوروغلر بولیمیده دهقانلرنینگ قوللب-قوتلشی کیرهک.»
شوندهی بیرحالده، ایکینچیلیک ایش بیلرمانلرینینگ ایتیشلریچه، لوبیا ایکینچیلیک بیر محصول بولیب، معتدل اقلیمده حاصل بیرهدی و لغمان لوبیا ایکیلیشی اوچون مناسب ولایتلردن حسابلنهدی. اولرنینگ ایتیشلریچه، لوبیا ۱۵-۳۵ درجه سانتیگرادده یخشی رشد قیلهدی و لغماننینگ بیر قطار بولیملری بو کبی درجهگه ایگه دیر.
ایکینچیلیک بولیمی ایش بیلرمانی کرامتالله شفیقینینگ ایتیشیچه، لوبیا ایکیلیشی پیتده اوروغ مقدارینینگ کوپ بولیشی، ییر توری، اقلیم شرایطی، ایکیلیش اصولی، اوروغ تشلنهدیگن جای چقورلیگی و لوبیا ایکیلیشی اوچون سووغاریش سیستمی نظرگه آلینیشی کیرهک. اونینگ کوپهیتیریشیچه: «بیر جریب ییرگه، ۲۰ دن ۳۰ کیلوگرام اوروغ نیاز دیر. قطارلر آرهسیده فاصلهنینگ ۴۰ دن ۶۰ سانتیمتر بولیشی و بوتهلر آرهسیده هم ۱۰-۱۵ سانتی متر نظرگه آلینیشی کیرهک. اوروغلر تشلنهدیگن جای چقورلیگینینگ اوچدن بیش سانتیمتر بولیشی کیرهک. ایکیلیش چاغیده هم یخشی شکلده سووغاریلیش و نیاز اساسیده، آلتی-ییتی مرته سووغاریشی کیرهک. البته لوبیا ایکیلیشیده بیر قطار کسللیکلر هم بار که اونینگ بیلیشیمیز کیرهک. شونینگدیک تورلی منطقهلرده حاصل میزانی فرقلی دیر.»
شوندهی بیرحالده، لغمان ایکینچیلیک ریاستی مسئوللرینینگ معلوماتی اساسیده، حاضر ایسه بو ولایت مرکزی و تومنلریده ایکی مینگ ۱۲۰ جریب ییرگه لوبیا ایکیلگن. شونینگدیک مذکور مسئوللر، دهقانلردن هر قندهی حمایت بولیشی و اولرگه آسایشتهلیکلر یرهتیلیشی توغریسیده ایشانچ بیرگنلر.
بیزلرنینگ «ایکس» ترماغی ده هم تعقیب قیلینگ!
لغمان ایکینچیلیک ریاستی مسئوللرینینگ ایتیشلریچه، لغمان ولایتی هر تورلی ایکین اوچون مناسب بولیب و اولر دهقانلرگه ورکشاپلر اوتکزیلیشی همده اولر اختیاریگه اصلاح بولگن اوروغلرنینگ قرار بیریلیشی اوچون سعیوحرکت قیلگنلر.
لغمان ایکینچیلیک ریاستینینگ زراعتی خذمتلر بوییچه آمری بریالی همدرد گه کوره: «لغمان ده لوبیا ایکیلیشی کوپهیگنیگه سبب بولگن خاص عامللر بار. بیری لوبیا ایکیلگن هر بیر جایده، یخشی نتیجه بیرگن و باشقه ایکینچیلیک ریاستینینگ رواجلنیتریش خذمتلری، لوبیانینگ نمایشی میدانچعلر یرهتیلگنی و بو بولیمده دهقانلرگه آگاهیلیک بیریلیشی دیر. اوتگن ییلده ۱۲۸ جریب لوبیانینگ نمایشی میدانچهلرینی قورگن ایدیک.»
ایتیش کیرهک که، بوندن آلدین هم لغمان ده لوبیا ایکیلهر ایدی، بیراق بو ولایتده بیرینچی مرته لوبیا ایکیلیشی سطحی کوپهیگن. بنگیوار مادهلر ایکیلیشی تقیقلنگنی، پمیدار، بوغدای، جواری و باشقه محصوللر و سبزهواتلر ایکیلیشیدن دهقانلرنینگ قولگه کیلتیرهدیگن فایدهسی کمهیگنی و شونینگدیک لوبیانینگ کوپراق سقله آلیش سبب، لغمان ولایتیدهگی دهقانلر بو محصولنینگ ایکیشگه قیزیققنلر.
