بعضا امیدسیزلیک بیلن تولگن کونلرنینگ ایچیده، مملکتیمیزنینگ هر بیر چیککهسیدن امید و اراده سیسلری چیقهدی. بو بوتون بارلیگی بیلن یخشیراق کیلهجک قوریش یولیده حرکت قیله یاتگن یاشلر دیر. بلخ ولایتیدن بولمیش بیر یاش برچه قیینچیلیکلرگه قرهمهی اوزیگه بولگن ایشانچ بیلن یشهیاتگن شهر ایچیدهگی بنالر کورینیشینی اوزگرتیرگن.
۲۵ یاشر عاقلشاه بختیار، بالهلیگیدن بنالر و مهندسلیک لایحهلرگه قرهگنیده، یورهگیده بو کته دنیاده اونینگ رواجلنیشی اوچون جای بولگنینی حس قیلهر ایکن. مهندسلیک اونینگ اوچون یالغیز بیر مسلک صفتیده بولمهی، بلکیم بیر آرزو ایکن. او بو بولیم آرقهلی نه فقط اوز حیاتینی اوزگرتیرهدیگن، بلکیم اطرافیدهگی کیشیلرگه هم بویوک تاثیر کورستهدیگن بیر نرسه یرهتماقچین ایکن. قیینچیلیکلر بیلن توله بولگن دنیاده، اونینگ رواجلنیشی و سعیوحرکت قیلیشیگه سبب بولهدیگن نرسه، اوشه آرزوسی ایکن. طلبهلیک دورهسینی اوتکزیشدن کیین، عاقلشاه اوز مقصدیگه ایریشیب و بلخ بیلیم یورتینینگ مهندسلیک فاکولتهسینی بیتیرگن؛ لیکن هیچ بیر زمان یالغیز ساده بیر مهندس بولیب قالیشنی ایستمهس ایکن؛ او بویوک بیر ایشنی بجرماقچین ایکن. عایلهسی دایم اونی قوللب-قوتلهیاتگنی و اونگه ایشانچ بیلدیرگنی سبب، عاقلشاه ۷۰ مینگ افغانی سرمایه بیلن انشاآتی بیر شرکت قوریشگه قرار آلگن.
عاقلشاهنینگ ایتیشیچه: «شرکت قوریش قراری، مکتب زمانیده فکرمگه کیلگن ایدی. بیر انجنیر بولیب و انشاآتی شرکت قوریشگه کوپ علاقهم بار ایدی. عایلهنینگ حمایتی بیلن ایستهگنیم بولیمگه ییتیشه آلدیم و کیین درسلریم یکونلنگنیدن کیین انشاآتی شرکت قوره آلدیم. بو بولیمنی مملکتیمیز اساسی قوریلیشگه نیازی بولگنی سبب تنلهدیم.»
بیزلرنینگ «ایکس» ترماغی ده هم تعقیب قیلینگ!
ینگی فکرلر و اوچبعدی دیزاینلر بیلن، بنالرگه ینگی سیمالرنی دیزان قیله آلگن. بو دیزاینلر نه فقط بنالرنی قوریش اوچون سرمایه یاتقیزووچیلر فکرینی اوزیگه قرهتدی، بلکیم اهالیگه زمانهوی و چیرایلی ینگی بیر شهر سیماسینی کورستدی. ایشینینگ باشلهگنیدن یالغیز بیر ییل اوتگن؛ لیکن عاقلشاه نه فقط اوزی موفق بولگن، بلکیم شرکتیگه باشقه ۴۲ کیشینی ایشگه آلگن. «شرکت قوریلیشی اوچون نظرگه آلگنیم بودجه ۷۰ مینگ افغانی ایدی و شرکتیم نی قورگنیمدن قریب بیر ییل بولهدی و بو شرکتده زمانهوی دیزاینلر توزهتیلهدی. ۱۰-۱۲ مهارتلی ایشلاوچی و ۳۰ مهارتسیز ایشلاوچی بار.»
گرچند عاقلشاه، بو یولده حکومت تامانیدن حمایت بولمهگن؛ لیکن مزارشریف شهری کورینیشیده تغییرات کوریلگنیدن خورسند دیر. اونینگ ایشانچیگه کوره، جمعیتده تاثیر قوییش، نهادلردن حمایت قولگه کیلتیریش معناسیگه ایمس، بلکیم اوز قوللری بیلن یخشیراق دنیا قوریش معناسیگه دیر. «بو شرکتنی قوریش و ایشلریمنی آلغه آلیب باریش توغریسیده هیچ بیر دولتی مرجعلردن حمایت آلمهگنمین؛ بو توغریده مینی حمایت قیلگن یالغیز کیشی عایلهم ایدی. بو شرکتنینگ قورگنیمدن کیین نه فقط شرکتده تغییر کیلگن، بلکیم لایحهنی عملگه آشیرگنیم جایلرده هم تغییر کیلیب و شهرلرگه یخشی سیمالر بیرگن. مملکتیمیزنینگ یخشی آستقورمهلر قوریلیشیگه نیازی بار که یخشیراق شهرلرنی قوریب و آز-آز باشقه مملکتلر بیلن رقابت قیلسهک.»
عاقلشاهنینگ موفقیتی یالغیز مهارتلی دیزاینلریگه بیتمهیدی. او زمامهوی و تینچ بیر شهرگه ایگه بولینیش اوچون انشاآتی ستندردلری و خوفسیزلیک مسئلهلرینی هم کوزگه آلهدی. اونینگ ایشانچیگه کوره، امنیتی نرسهلرنی نظرگه آلمسدن بنا قوریلیشنینگ کیلهجکده اهالیگه جدی قیینچیلیکلرنی یرهتیشی ممکن. «حکومتدن اوز باشیمچهلیک شکلده بنا قوریلیشنینگ آلدینی آلیشینی ایستهیمن؛ لایحهلردن کوپینچهسی تجارتی بولیب و اولرده امنیتی موضوعلر نظرگه آلینمهی و انجنیرلیک موضوعلر مراعات بولمهیدی.»
شونینگدیک اقتصادی مسئلهلر بیلرمانلرینینگ اورغولشیچه، کیچیک کسب-کارلر تورلی بازارلرده رقابت و رواجلنیش سببی بوله آلهدی و بو دیزاینلر و فکرلر تورلی اقتصادی بولیملرنی تغییر بیره آلهدی.
بیزلرنینگ فیسبوک صحیفهمیزگه باش اورینگ!
اقتصادی مسئلهلر بیلرمانلریدن حنیف فرزاننینگ ایتیشیچه: «کیچیک کسب-کارلر اقتصادی رواجلنیشیگه سبب بولهدی؛ چونکه کیچیک کسب-کارلر ینگیلیک یرهتیش، تکنالوژیده تغییر، صناعت رواجلنیشی، ایش فرصتی یرهتیلیشی و درآمد قولگه کیلتیریش جهتیدن اقتصادی ترقیاتگه یاردم بیرهدی و باشقه تاماندن، آز سرمایه بیلن بویوک کسب-کارلر شکللنیشی، درآمد بولهدی و کوپینچه کیشینینگ ایش بیلن شغللنیشیگه سبب بولهدی که بو ایش اقتصادی ترقیاتگه ایریشیش توغریسیده اساسی اورینگه ایگه دیر.»
سرپرست حکومت ایش و اجتماعی ایشلر وزیرلیگیده مسئوللرنینگ سلاموطندار گه ایتیشلریچه، بو وزیرلیک حاضرگچه کیچیک کسب-کار گه باشلهیدیگن یاشلرنی قوللب-قوتلاوچی برنامهلری عملگه آشیرمهگن.
ایتیش کیرهک که، ایشسیزلیک و قشاقلیک یاشلرنینگ اساسی قیینچیلیکلریدن بولیب و اولر تدبیرکارلیک و ینگی کسب-کارلرنی یرهتیش بیلن بو قیینچیلیکلرگه قرشی کورهش اوچون فایدهلی ییچیم یوللرنی یرهتیب و بو یول آرقهلی مالی مستقللیککه قول تاپه آلهدیلر.
