ایرتهلب، ساووق و چنگلی هوا کابل شهرینینگ محیطینی آغیرلشتیرگن، انتانی و اندراگاندی کسلخانهلرینینگ هر بیر خانهسیدن قتیق ایسیتمهدن کویاتگن، آغریقدن قینلهیاتگن بیمارلرنینگ یوتهلی و نالهسینینگ آوازی ایشیتیلهدی – بو مملکتده موسمی کسللیکلرنینگ ینگی تولقینی باشلنگنیدن درهک بیرهدی.
قیش فصلی باشلنیشی و پایتخت هواسی افلاسلنیشی بیلن ، کابل یشاوچیلری آرهسیده سنچیق، نفس قیسیشی و تاماق آغریق کبی موسمی کسللیکلرگه چلینگنلر سانی کوپهیگن.
انتانی و اندراگاندی کسلخانهلریده شفاکارلردن بیرقطاری، هوانینگ ساووقلیگی و افلاسلنیشی، یوللرنینگ معیاری اېمسلیگی همده قشاقلیکنی، بو کسللیکلرنینگ کېنگ ترقهلیشیگه سبب بولهیاتگن اساسی عامللر صفتیده عنوان قیلهدیلر.
کابل شهری یشاوچیسی ۳۰ یاشر مرضیه، سلاموطندار بیلن صحبتده، آنهسی بیر هفتهدن بیری سنچیق کسلیگه چلینگن، بیراق اولر آغیر اقتصادی احوال سببلی وقتیده دوالش اوچون مراجعت قیله آلمهگنلرینی معلوم قیلهدی. او شوندهی دیېدی:«بیر هفته دن بیری آنم سنچیق، بوگون احوالی آغیرلشدی و شفاکار گه مراجعت قیلدیک بیر ساعت بولهدی – آنم بستری قیلینگن، چونکه اقتصادیمیز ضعیف اېدی و آنمنی وقتیده دوالش اوچون اقدام قیله آلمهدیک.»
اهالینینگ آغیر اقتصادی احوالی بیلن بیر قطارده، موسمی کسللیکلرنینگ دستلبکی علامتلری حقیده یېترلیچه معلوماتلری یوقلیگی، یشاوچیلرنینگ دوالنیش اوچون کیچ مراجعت قیلیشیگه سبب بولهیاتگن ېنه بیر عامل دیر.
کابل دهسبز تومنی یشاوچیسی ۳۵ یاشر سونمنینگ ایتیشیچه، ایکی آیلیک قیزی ۲۰ کوندن بیری سنچیق کسلی گه چلینگن. اونینگ کوپهیتیریشیچه، اۉزی بو کسللیکنینگ علامتلرینی بیلمسلیگی و شفاکارلرنینگ ناتوغری تشخیصی قیزینینگ ساغلیگینی ېنهده آغیرلشتیرگن.
اونگه کوره: «۲۰ کوندن بیری چقهلاغیم کسل، شفاکار گه مراجعت قیلدیم ایتدیلر یورهگی آغریدی دوالهدیک ساغلمهدی اوچ کون بولهدی صحت طفل گه مراجعت قیلگنیمدن، ایتدیلر سنچیق و اوچ کونلیک دارو بیریشدی ساغلمهدی و اېندیلیکده بستری دیر.»
پروانلیک ۳۲ یاشر جانگل، موسمی کسللیکه چلینگن کسللردن بیری، شوندهی دیېدی: «آلتی کون بولهدی کسل من، مین بیر ایشلاوچی من و قوریزهده ایشلهی من سۉنگی پیتلرده هواو ساویگن کسل بولدیم بیرینچی کونلرده دوالهدیم بیراق ساغلمهدیم و اېندی ایکی کون بولهدی بستر من و آلدینگی کونلرده نسبتن احوالیم یخشی.»
کابل شهریده اندراگاندی و انتانی کسلخانهلرینینگ مسئوللری، اوتگن بیر آی ایچیده هر کونی قریب ۳۰۰ موسمی کسللیکه چلینگن بیمار، بو کسلخانهلر گه مراجعت قیلهدیلر – اولرنینگ ۳۰-۴۰ نفرینینگ احوالی آغیر دیر.
اندراگاندی کسلخانهسیده ایچکی بولیم مسئولی محمدعارف حسنزی، سلاموطندار بیلن صحبتده شوندهی دیېدی: «موسمی سۉز تیلگه آلینسه بو معناده کی ساووق هواده مخصوص کسللر تاپیلیب و نفس قیسیلیشی آشهدی، بیر آی ایچیده بو کسللیکه چلینگنلر سانی کوپهیگن، اوتگن ۲۴ ساعت دوامیده قریب ۲۵ کیشینی بستری قیلدیک و هر کونی موسمی کسللیکه چلینگن قریب ۳۰۰ کیشینی تشخیص و دوالهیمیز و اولر آرهسیدن قریب ۳۰-۴۰ نفرینینگ احوالی آغیر دیر و دوالش اوچون بستر قیلهمیز.»
انتانی کسلخانهسیده ایچکی کسللر شفاکاری محمدیاسین هاشمی هم شوندهی دیېدی: «بو ییرگه مراجعت قیلهدیگن بیمارلرنینگ خبردارلیک درجهسی آز بیر کیشی بو کسللیکه چلینگن حالده طبی قاعدهلرنی رعایت قیلمهیدی و بو بو کسللیک اېسه باشقه ساغ آدملر اورتهسیده ترقهلهدی، سۉنگی کونلرده مراجعت قیلهدیگن کسللردن ۱۰ نفر دن بیش نفری موسمی کسللیکه چلینگن و اولرنینگ اکثریتی موسمی کسللیکه چلینگنلیگینی ایته آلهمیز.»
شو بیلن بیرگه، اسلام امیرلیگی ساغلیقنی سقلش وزیرلیگی مسئوللری، موسمی کسللر کوپهیگنینی تصدیقلسهلرده، بیراق بو کسللیک آلدی آلینیشی اوچون برچهنی خبردار قیلیش ایریم ریجهلر نظر گه توتیلگنینی ایتهدیلر.
بو وزیرلیک سۉزلاوچیسی شرافتزمان امرخیل گه کوره: «سنچیق و موسمی کسللیکه چلینگنلرنی رقمی معلوم اېمس بیراق کسلخانهلردن بیز بیلن شریک قیلینگن معلوماتلر شونی کورستهدی کی بو کسللیکلر اوتمیش گه نسبتن کوپهیگن. عادی اهالینی خبردار قیلیش، کسللرنی یخشی دوالش اوچون ساغلیق مرکزلر گه دارو و طبی اوسکونهلرنی یوباریش گه ایریم ریجهلریمیز بار.»
شفاکارلر، بالهلیک دوریدهگی اېملشلر، ساووق هواده تنهنی ایسیق سقلش، چقهلاقلرنی آنه سوتی بیلن آزیقلنتیریش، توییملی آوقتلر استعمال قیلیش و بیمارلرنی وقتیده شفاکار گه آلیب باریشنی، بو کسللیکلرنینگ ترقهلیشینی آلدینی آلیشده مهم دیب حسابلهیدی.
