هوانینگ ساووق بولیشی بیلن بیرگه، کابل ده هوا افلاسلنیشی هم کوپهیب و اهالینینگ خواطریگه سبب بولگن. کابل شهرینینگ تورلی بولیم یشاوچیلریدن قطاریگه کوره، کمبغل عایلهلر آرقهلی موترلر تایری و پلاستیکی نرسهلر یاقیلیشی طفیلی اورته گه کیلهدیگن دود، بالهلرینینگ کسل بولیشیگه سبب بولگن.
کابل شهری بیشینچی ناحیه یشاوچیسی حامد، هوا افلاسلیگی سبب عایله اعضاسیدن قطارینینگ کسل بولگنینی بیان قیلیب، حکومتدن هوا افلاسلنیشی آلدی آلیشی اوچون جدی چاره-تدبیر قولگه آلینیشینی سورهگن. «هوا ساووق بولیشی بیلن هوا افلاسلیگی کوپهیهدی. عایلهمدن قطاری کسل بولدی و شونینگدیک بو موسومده کسلخانهلر کسللردن توله دیر.»
شوندهی بیرحالده، خیرخانه و کارتهی نو منطقه یشاوچیلریدن حسینه و گلالی، کابل شهریده هوا افلاسلیگیدن شکایت قیلیب و مسئوللردن، کمبغل عایلهلرنینگ ستندرد یاقیلغی مادهلرنی تامین قیله آلیشلری اوچون یاقیلغی مادهلر قیمتی قویی کیلیشینی ایستهگنلر.
حسینهنینگ ایتیشیچه: «هوا ساووق بولگن و کمبغل عایلهلر اویلرینی ایسیتیش اوچون تکه، پلاستیک و ایسکی بوتلردن فایدهلنهدیلر و شونینگدیک کوچهلردن بیر قطار خامه دیر و بولر هوا افلاسلنیشی گه سبب بولهدی.»
شونینگدیک گلالیگه کوره: «قیش موسومی ییتیب کیلیشی بیلن، اهالی اویلرینی ایسیتیش اوچون یاغاچ و تاش کومیر آلالمهیدیلر. حکومتدن یاقیلغی مادهلر قیمتینینگ قویی کیلتیریلیشینی ایستهیمیز که هوا افلاسلنیشی آلدی آلینسین.»
شوندهی بیرحالده، شفاکارلرنینگ آگاهلنتیریب و ایتیشلریچه، جدی شکلده هوا افلاسلیگی بالهلر آرهسیده تنفسی و یورهک کسللیکلری کوپهیشی، حساسیت و حتا اولیمگه سبب بوله آلهدی. کابل ده انتانی کسلخانهسینینگ انتانی کسللیکلر بوییچه متخصص ترینری فریدالله عمرینینگ ایتیشیچه: «هوا افلاسلیگی تورلیخیل کسللیکلرگه سبب بولهدی و شونینگدیک بالهلرنینگ اولیمی و حاملهدار عیاللر آرهسیده چقهلاقنینگ توشیشیگه سبب بوله آلهدی. هوا افلاسلیگی دوام قیلگنی صورتده، سرطان گه هم باعث بولهدی.»
شونینگدیک یشش محیط ایش بیلرمانی، جمعیت کوپهیشی، اویلر و صناعتی پارکلرده ستندردسیز یاقیلغی مادهلردن فایدهلنیش و فلتر نصب قیلینمسلیکنی، کابل ده هوا افلاسلیگی اصلی عامللریدن دیگنلر.
یشش محیط بیلرمانی عبدالهادی اچکزینینگ ایتیشیچه: «فلترلر اوچون بیر ستندردنینگ نظرگه آلینیشی کیرهک. نصب بولگنیدن کیین کوریلیشی کیرهک، چونکه بو فلترلر کوپ برققه نیازی بار و اهالی آز فایدهلنهدی. کمبغل عایلهلرگه یاردم بیریلیشی و شونینگدیک ستندرد یاقیلغی مادهلر کیلتیریلیشی کیرهک.»
کابل ده بلدیه مسئوللری، هوا افلاسلیگی آلدی آلینیشی اوچون جدی چاره-تدبیرلر قولگه آلینگنینی بیان قیلهدیلر. کابل بلدیهسی عامه آگاهیلیک و نشرات بولیمی باشلیغی واسعالله زاهدنینگ ایتیشیچه: «کابل بلدیهسی هوا افلاسلیگی آلدی آلینیشی اوچون سعیوحرکت قیلهدی. سیار تیملرنی تشکیل بیرگنمیز، مرکز گرمیدن فایدهلنهدیگن شهرچهلر و نیچه قوتلی اویلر گه فلتر نصب قیلیشلرینی ایتگنمیز. اهالیگه آگاهیلیک بیریلیش برنامهلریمیز بار و اهالیگه آگاهیلیک بیریلیشی اوچون ییتکرمهلر و بلبورددن فایدهلنهمیز.»
هوا افلاسلیگی، کابل شهریدهگی دایمی قیینچیلیکلردن بیری بولیب، هر ییل ساووق موسومی ییتیب کیلیشی بیلن کوپهیهدی. بو موسومده، اهالی اویلرینی ایسیتیش اوچون ستندردسیز یاقیلغی مادهلردن فایدهلنهدیلر که، هوا افلاسلیگی میزانینینگ کوپهیشیگه سبب بولهدی.
